ماھەر حەسەن

پشتی دەمەک کورت ژ راگھاندنا کۆنسەیا پەکەکێ گەلەک پرسگرێک، ئاستەنگی دەرکەتن، و رەوشا کوردان ئالۆزتر کر، ھەتا رادەیا ھەولێن کوشتنێ، و ئشکەنجە کرنێ ب رەنگەکێ ھۆڤانە، تاوانبارکرنا ب خییانەتێ و کریارێن ب ھلوەشاندنا راستیێ.  ب ڤی ئاوایی پەکەکێ ل گۆر ستراتەژیا خوە کار کر و دکەت و ب بوویەرێن خاپینۆک د ئەدەبیاتا خوە و د ناڤ گرسەیێن خوە دا بەردەوامە.

جودا بوونا چەند سەرکردەیێن دامەزرینەر:

پشتگریا «حافز ئەسەد» بۆ کۆنسەیا پەکەکێ نە ژ ئەنجاما ڤالاھیەکێیە، سەدەمێن راست ھەنە کو ئەڤ یەک ئافراندیە. ژ بۆ ئەز گەلەکی کوور و دوور نەچم، ئەز دێ ل سەر سەرکردەیێن کو د رێزا پێشی دا و ژ رێڤەبەرێن دامەزرینەرێن پارتیا کارکەرێن کوردستانێ بوونە ئاخڤم و گەلۆ چما ئەڤ گرۆپا ژ ئەندامێن کۆمیتەیا ناڤەندی ژ پەکەکێ رەڤیان و ھەمبەری وێ راوەستیان. ئەڤ ژی ناڤێ چەند کەسانە:

محەمەد شەنەر، شاھین دۆنمەز، ئولدەرم مەرکەت، سەلیم گۆرکایا، و در. سلێمان یێ د شەر داعشا تەڕۆریست دا شەھید بوو و بەرپرسێ رێخستنا پارتیا پەکەکێ ل ئەورۆپایێ، چەتین گونگۆر “سەمیر” یێ کو ل سوێدێ دمینیت و گەلەک کەسێن دن مینا برایێ ئۆجەلان ئۆسمان کو ژ ناڤ رەفێن پەکەکێ رەڤیانە ب خیانەتێ تێنە تاوانبارکرن.

لێ لێکۆلین و ڤەکۆلینا چاڤکانیان بەرۆڤاژی ڤێ یەکێ پشتراست دکەت.

ھەما چ کەسێ کو پەکەکێ گۆتێ خایین، وی کارێ خوە ب ھەموو ھێزا خوە د بەر کوردایەتێ دا کریە، مینا شەھیدێ پێشمەرگە در. سلێمان و ئەڤە ژی ئەو سەدەمن کو پەکەکە زمانێ دژمناتیێ ل ھەمبەری وان ب کار تینیت.

پەکەکێ ب کریارێن خوە یێن نە رەوا و نە دورست و ل گۆر بەرژەوەندیا خوە و ل گۆری ئاژاندایێن وەلاتێن ھەرێمێ و ب تایبەت دەولەتا ترک و رێژیما بەعس، نیەتا خوە یا خراب ھەمبەری کوردان و دۆزان وان تەکەز کریە.  ب ڤی ئاوایی کۆنسەیا پەکەکێ ھەول ددەت ھشمەندیا کوردان تەڤلیھەڤ بکەت، و خوە ددەنە دیارکرن کو ژ ھشیاری و رزگاریێ کەلەجانەک مەزن چێدکەن کو ئەو وەک پارتیەک ژیر، گارانتیا شۆرەش و ژیانێ نە و سەرکردایەتیا وان بوویە تەڤگەرەک بیردۆزی کو بەرسڤا ھەموو پێویستی، داخواز و ھێڤیێن جڤاکا کورد ددەت.

سەدەمێن تەڕۆر کرنا محەمەد شەنەر:

محەمەد شەنەر ئەندامێ کۆمیتەیا ناڤەندی و یەک ژ کادرۆیێن دامەزرینەرێن پارتیا کارکەرێن کوردستانێ یە.  بەریا 12ێ ئیلۆنا 1980یێ ژ ئالیێ مەجلسا لەشکەری ڤە دهێتە گرتن و د زندانا دیاربەکرێ دا چیرۆکا وی ژ سەری ھەتا داویێ تراژدیکە.  ل ھەمبەری لێپرسینێن پۆلیسان ل بەر خوە دا، د گرتیگەھێ دا بەرپرسیاریا د ناڤا رێخستنێ دا گرت سەر خوە. 44 رۆژان دەست ب گرەڤا برچیبوونێ کر. د سالا 1990ێ دا دیسا دەست ب چالاکیا خوە کر، خوە دسپێرە ئەحمەد بایک یێ ب ناسناڤ مستەفا، کو برایێ جومعا یە و ب ناڤێ جەمیل بایەک دهێتە ناسکرن. شەنەر لگەل ئەحمەد ل سەر سەدەمێن خەمساریا رێڤەبەریێ و نەبوونا دەستوەردانا د کارووبارێن رێنیشاندەر ئاخڤی.

مستەفا ئەڤ ئاخافتنە گۆتنە برایێ خوە (جەمیل بایەک )، جومعا ژی بەرسڤ دا و گۆت کو ئەڤ کۆم کەتیە بن سەیوانا کەسیرە یلدرم، ھەڤژینا ئۆجالان دا.

و ژ بۆ ئەم ژبیر نەکەین کەچێن تەڤلی پارتیا پەکەک-ێ بوونە ژ ئەورۆپا وان ژی کو گلینامەیێ دا ڤێ یەکێ تەکەز دکەن کو د ناڤبەرا شەنەر و جەمیل دا گەلەک نەخوەشی و دلمانی چێ بویە.

ھەتا جومعا بریار دا کو خوە نێزیکی عەبدولا ئۆجالان بکەت، و ل سەر ڤێ یەکێ گوفتووگۆ کرن و بێ ئامەدبوونا شەنەر، تەڤی کو شەنەر ئیسرار کر کو ب ھەڤ را ھەرسێ کۆم ببن، لێ جومعا ب توندی رەد کر.

شەنەر د کۆنگرەیا چارەمینا پارتیێ دا کو ل داویا سالا 1990ێ دا پێک ھات، پێشنیارێن خوە پێشکێش کرن.

پێشنیارێن ھەری گرنگێن محەمەد شەنەر ئەڤە بوون:

بریارا پارتیێ ژ کۆمیتا ناڤەندییە، و پێدڤییە بریارێن ئۆجالان بێنە سینۆردارکرن و دوورخستن.

دیارکرنا دارایی یا پارتیێ ل سووریێ، لوبنان و ئەورۆپایێ، ب تایبەتی د ڤان سالان دا، ژ بلی راڤەکرنا دارایی یا پارتیێ ل ئیرانێ کو د دەستێ عۆسمان ئۆجالان (فەرھاد) دا بوو.

ژ بۆ باکورێ کوردستانێ ئارمانج ب سەرھلدانان کر کو خورت و دۆمدار بن،  و ھێزێن گەریلا رووبروویێ ھێزێن ترک ببن.

یەک ژ بریارێن کۆنفەرانسا چاران ژی ئەو بوو کو ب ھەموو ئیمکانان پشتگری بدەنە ھێزێن پێشمەرگە ل ھەمبەر ئێریشێن ئارتێشا ئیرقێ، و تایبەت پشتی کو ھێزێن ھەڤپەیمانیێ یێن ل دژی سەدام حوسێن پشتی داگیرکرنا کووەیتێ بریار دان.

پێڤاژۆیا تەرۆر کرنا شەنەر:

خانم کەچا موختارێ تاخا «ئانتاریێ» ل قامشلۆ کو ب ناڤێ دجلەیێ دهێتە ناسین، نامەیەک ژ بۆ شەنەر شاندیە و تێ دا ناڤێ ھندەک ھەڤالێن خوە ژ بۆ ھەڤگرتنێ و پشتگریا وی ژ بۆ پێشنیاران و نەرازیبوونا خوە یا ژ رێبەرتیێ (ژ ئۆجەلان و جەمیل و دوران و موراد…)  تینیتە زمان. یەک ژ دێرکا حەمکۆ ژی، ئەو پەیام رادەستی فرات، برازیێ ئۆجالان کر، و ئەڤ پەیام بوو سەدەم کو ناڤێن کو تێ دا ھاتنە گۆتن، ب ئیشکەنجە و گرتنێ بێنە تەڕۆر کرن.

 ل سەر ناڤێ گرتیان ژ بۆ خییانەتکرنا شەنەر و ھەڤالێن وی کۆنفەرانسەک ھات لدارخستن و لێپرسینەرێ گرتیگەھێ و کۆردیناتۆرێ گشتی «عەبدولرەحمان کاکج» یێ ب ناسناڤ «فایێق» د دەستپێکێ دا ژ بۆ کوشتنا شەنەر ھات ھلبژارتن، لێ ئۆپەراسیۆن ب داوی نە بوو. بەرۆڤاژی پلانا پەکەکێ بوو، ژ بەر کو فایێق بەشداری رزگارکرنا وی و تێکبرنا وێ پلانێ بوو، و ژ بۆ ژیانا شەنەر بێتە پاراستن، پارتیا دەمۆکراتا کوردستانێ پێشنیارا وی کر کو ل ھەرێما کوردستانا ئیراقێ بمینیت، لێ وی خواست کو ل گەل ھەڤالێن خوە بمینیت کو ل دژی سەرکردایەتیێ شەرمەزارکرن و لڤ و تەڤگەر کر.

ئەو ل باژارێ قامشلۆ ل 1/11/1991ێ دا ل بەر دبستانا تشرین ھاتە تەڕۆر کرن، و ھێژایی گۆتنێیە کو کەسێ ژ ئەندامێن پەکەکێ نەوێریبوو دژبەریا خوە ل ھەمبەری بریارێن خراب و چەوت دیار بکەت و ل ھەمبەری ھێزەکا ژ تەڕۆر کرنێ چ تشتێن دی ناناسیت، راوەستیت.