دانپادانێن بالکێشێن سیاسەتمەدارا پەکەکێ: گەریلا ژ بۆ کو سینۆرێن لۆزانێ نەھێن گوھەرین شەری دکە!
د ڤان سالێن داوی دا نیقاشێن کو پەکەکە ژ بۆ چ تێدکۆشە و ئارمانجا وێ چیە پڕ گەرم بوونە، گەلەک کادرۆ و سیاسەتمەدارێن پەکەکێ ب داخویانیێن خوە ئارمانجێن خوە زێدەتر ئەشکەرا دکن. ھەری داوی ژی خەباتکارا پەکەکێ «نیلووفەر کۆچ» ل سەر ئارمانجا رێخستنا خوە ئاخڤی.
ئەنداما کۆمیتەیا رێڤەبەرا «کەنەکێ» «نیلووفەر کۆچ» کو ب سالانە د دیپلۆماسیا ئەورۆپایێ دا جھ دگرە، د بەرنامەیا کو تەڤلی بوو دا سەدەمێن دژبەریا پەکەکێ یا ل ھەمبەری پەدەکێ ڤەگێران. ھەر وھا گۆت کو شەرت و مەرجێن گونجاو ھەنە کو کورد دەولەتەکێ ئاڤا بکن.
ل باشوور دو خەتێن چارەسەرییێ ھەنە، چارەسەریا یەکەم ئەڤە کو کورد بێی کو سینۆران بگوھەرن ل سەر بنگەھێ دەمۆکراتیزەکرنا جڤاکێ پسگرێکێن خوە چارەسەر بکن. یا دویەم ژی خەتا دەولەتا سەربخوەیا کوردستانێ یە.
گەریلا ل رۆژھلاتا ناڤین سینۆرێن ل لۆزانێ ھاتینە نەخشاندن دپارێزە؟
«نیلووفەر کۆچ» د بەرنامەیێ دا دیار کر کو تێکۆشینا گەریلا ژ بۆ وێ یەکێ یە کو سینۆر نەھێن گوھەرین. وێ گوھارتنا سینۆران کو د شەرێ جیھانێیێ یەکەم و پشتی وێ دا پارچەبوونا کوردستانێ لگەل خوە دا ئانی، وەکە پێشکەتنەکا خراب نیشان دا.
«نیلووفەر کۆچ» د ئاخاڤتنا خوە دا ئەڤ گۆتنە ب کار ئانی: “ژ بەر ڤێ یەکێ ئەز هندەکا گلۆپا کەسک بۆ هلکریە و گۆتیە ئەزێ دەولەتێ بدم تە، دێ ھندەک تشتا بدم تە، د ناڤبەرا خەتا زەر و کەسک دا ویلایەتەک هێتە دانان. و بەلکی کۆنفەدەراسیۆنا د بن کۆنترۆلا ترکیایێ دا بدنێ. نھا ئالیەکێ مەسەلێ ئەوە کو گەریلایێ کو ژ 17ێ نیسانێ و ڤر ڤە ل بەر خوە ددە، نە تەنێ پارچەیەک بەلکو وەلاتەکی ل ور دپارێزە.
ھەرێما کوردستانێ ناڤەندا گوھەرتنێن رۆژھلاتا ناڤینە؟
«نیلووفەر کۆچ» د ئاخافتنا خوە دە دیار کر کو ناڤەندا دیزاینکرنا رۆژھلاتا ناڤین ھەرێما کوردستانێیە. کۆچ د ئاخافتنا خوە دا “پرۆژەیا رۆژھلاتا ناڤینا مەزن کو ژ ئالیێ سیستەمێ نوویێ جیھانێ ڤە ھاتیە پێشبینیکرن، نھا ل ئەمەریکایێ ژ نوو ڤە دهێتە دیزاینکرن، ئەمەریکا د ختماندنەکێ دا د ژیت، ل ور دیزاینەکێ چێدکە و کوردستانێ وەکە ناڤەند دگرە.”
ئەڤ گۆتنێن نیلووفەر کۆچ وەکە دانپێدانەکێ بوون کا چما ژ چار ئالیان ڤە ھەرێما کوردستانێ د بن ئێریشان دایە. سەدەما کو ھێزێن رەوشپارێز، ب تایبەتی ترکیا و ئیران کو ناخوازن سینۆرێن رۆژھلاتا ناڤین بێنە گوھەرتن، دخوازن ھەرێما کوردستانێ دۆرپێچ بکن، ئەڤ راستی ژ ئالییێ رێڤەبەرا پەکەکێ «نیلووفەر کۆچ» ڤە ھات قەبوولکرن. لێ کۆچ د ئاخافتنا خوە دا دانپیدان ب مژارەک دن ژی کر.
سیستەما ناڤنەتەوی ل گەل دەولەتبوونا باشوورێ کوردستانێیە.
نیلووفەر کۆچ د ئاخافتنا خوە دا ھەر وھا دەستنیشان دکە کو شەرت و مەرجێن ھەرێما کوردستانێ ژ بۆ خوەدیدەرکەتنا ل دەرفەتێن بەرفرەھێن رێڤەبەریێ پێک ھاتنە. دەر بارێ ڤێ مژارێ دا ژی نیلووفەر کۆچ وھا گۆت: د ڤر دا ھەر دو خەتێن کوردان د ناڤا پەڤچوونێ دا نە: یەک چارەسەریا دەمۆکراتیکا ل سەر جڤاکان بێی گوھەرتنا سینۆران، یا دن ژی خانەدانیەکا بچووکە، ئەز نکارم بێژم خانەدانی ژی، ژ بەر کو شێخاتییە. چارەسەریەک ب رێیا سازیەکا شێخاتیێ دهێتە فەرزکرن و وسا دخویە کو وان ل سەر دەولەتەکا بچووک لهەڤ کریە. د سالا 2017ێ دا نە وسا بوو، کۆنژۆنکتوور “رەوشا ئابۆری و سیاسی و جڤاکی” ل دژی وان بوو، نھا وە خویایە کو ئەڤ سۆزە ب وان ھاتییە دایین. لەوما پەدەکە ئێریشکارترە.”
کۆچ دەڤوکا ترکیێ یا ل دژی کوردان ب کار ئانی
د ئاخافتنا، نیلووفەر کۆچ دا سەدەمێن ئێریشا پەکەکێ یا ل سەر ھەرێما کوردستانێ ئاشکەرا بوون. پەکەکە ھەول ددە کو سینۆرێن لۆزانێ نەخشاندین بپارێزە و ڤێ ژی وەکە خەتا خوە یا ستراتەژک دیار دکە، ئەڤ راستی د ئاخافتنا کۆچ دا ئاشکەرا دەردکەڤە پێش. ئەڤ ژی ڤێ راستیێ دەردخە ھۆلێ کو ھەم پەکەکە و ھەم ژی کەنەکە نە ل دژی سینۆرێن لۆزانێ نە، بەلکو سیستەما سەربخوەیێ ئان ژی کۆنفەدەرالا کوردستانێ پڕ خەتەرناک دبینن.
ژ بلی ڤێ ئاخافتنا کۆچ دەردکەڤە کو ئەو دەولەتبوونا کوردان کێم دبینە و د ھەمان دەمێ دا بنەسازییا جڤاکا کوردان ب چاڤەکەکێ بچووک دنرخینە. کۆچ د ئاخافتنا خوە دا ژ بۆ دەولەتبوونا کوردان دبێژە “دێ وەکە پارێزگەھەکا بچووک بە” تشتێ بالکێش ئەوە کو نیلووفەر کۆچ ژ بۆ کو ناڤێ ھەرێما کوردستانێ بکار نەینە، د ئاخافتنا خوە دە پەیڤا “ھەرێما کەسک و زەر” بکار تینە. نیلووفەر کۆچ د نێزیکبوونا خوە دا چاوا کو ترکییا بێرێزیا ل ھەمبەری کوردان دکە و دبێژە “دەولەتەکا عەشیری” ئەڤ رێڤەبەرا پەکەکێ ژی ھەمان ئسلووبێ دەولەتا ترک بکار تینە و دبێژە “دەولەتا شێخا”.
