بەسێ هۆزات داخۆیانییەکا ژ خوە گەنیتر دا
ھەڤسەرۆکا کۆنسەیا رێڤەبەر یا كه‌جه‌كێ «بەسێ ھۆزات»، بۆ رۆژنامەیا «یەنی ئۆزگور پۆلیتیکا» یا پەکەکێ هەڤدیتنەک كر و بەرسڤا پرسێن گەنی یێن ئۆزگور پۆلتیکایێ دان.
بەسێ هۆزاتا مەژی گەنی، وەک هەر جار ب هێرشا ل سەر بارزانییان و پەدەکێ دەست ب ئاخفتنا خوە کر، ئاخفتنێن ئەوقاس گەنی و بێسەرووبەر كرن کو مرۆڤ ناخوازیت ب چ ئاوا بەرسڤا وان بدەت، ژ بەر کو هەر کەس دزانیت چاڤکانییا ڤان ئاخفتنێن وێ چی یە، لێ دەما بەرسڤا دره‌وێن و ئیستفزازێن پەکەکێ و رێڤەبەرێن وێ نه‌هێته دان، ئەو پر بێ رۆمەت تر دبن و ئاخفتنێن پر بێ ئەخلاقتر دکن.
په‌كه‌كه و كریزا ده‌به‌نگیێ!
ئاخفتنێن مەزن و رێزکرنا پەیڤێن بیانی بوویە کارێ رۆژانە یێ رێڤەبەرێن پەکەکێ، ستێرک ژ ئاسمانی بکەڤیت، تۆز بباریت، ل پارچەیەکا کوردستانێ کارەساتەکا خوەزایی دروست ببیت، دێ رایەدارێن پەکەکێ دەرکەڤن و د مه‌دیایێ دا بێژن: «ئەڤ کارێ پەدەکێ یە، پەدەکە ژ بۆ کو پەکەکێ تاسفیە بکەت ڤێ یەکێ دکەت، په‌ده‌كه ڤێ ب فەرمانا ترکیێ دكه‌ت»، پشترە ترۆلێن وێ یێن سۆشیال مەدیایێ بێی کو بفکرن وەک تووتییان دێ ڤان ئاخفتنێن رێبه‌رێن په‌كه‌كێ دوبارە كه‌ن و هێرشان ل سەر پەدەکێ و بارزانییان ده‌ست پێ كه‌ن، دێ پیرۆزیێن کوردان بێ رومه‌ت كه‌ن و خوە وەک ولاتپارێز نیشان ده‌ن، لێ یا راست پەکەکە ب رایەدار و ئالیگرێن خوه یێن بێ هش ڤه ژ بلی خیانه‌تێ چ ناڤەکێ دی نینه، ئاخفتنێن ڤێ دوماهیێ یێن «بەسێ، کالکان و نیلووفەر کۆچێ» ڤێ راستیێ پتر روهن دكه‌ن.
ب دیتنا رایەدارێن مینا بەسێ کو د كۆنسه‌یا پەکەکێ دا یه، وێ راستیێ نیشان دده‌ت کو پەکەکە ب چ ئاوا کەسێن تێگه‌هشتی، شۆرەشگەر، وه‌لاتپارێز د كۆنسه‌یا خوە دا ئەرکدار ناکەت، ژ بۆ کو د ناڤا پەکەکێ دا بگه‌هیه ئاستێ ژۆر ب تەنێ ئەڤ یەک بەسە کو مەژیکێ خوە رادەستی پارتیێ بکه‌ی و ئۆجالانی ب رێبەرێ جیهانێ بده‌یه ناساندن و رۆژانە ببێژی: «بژی سەرۆک ئاپۆ، بێ سەرۆک ژیان نابە».
به‌سێ د هەڤدیتنێ دا پەدەکه، بارزانی و نرخێن کوردستانێ ئارمانج كرن و هه‌روه‌ها په‌یوه‌ندیێن دیبلۆمسی یێن حکوومەتا هەرێما کوردستانێ ل گه‌ل ترکیێ وەک خیانه‌ت دان ناساندن، و راگه‌هاند، «نه‌ڤشارتی یه كو په‌ده‌كێ رێككه‌فتنێن نوو ل گه‌ل ترکیێ كرینه، ئاشكه‌رایه کو دخوازیت پەترۆل و گازا باشوورێ کوردستانێ د سەر ترکیێ را دەرباسی ئەورۆپایێ بکەت و ئه‌مه‌ریكا و ئەورۆپا ژی پشتگرییا ڤێ دکه‌ن. ھنده‌ك شرۆڤە دهێنه کرن کو کریزا گازێ یا كو ژبەر شەرێ رووسیا و ئوکراینا بۆ ئه‌ورۆپا چێبووی ژ ئالییه‌كی دێ ب ڤی ره‌نگی چاره‌سه‌ر كه‌ن، لێ ئەڤ شرۆڤە تنێ به‌شه‌كێ راستیێ یە، په‌ده‌كه ب سالانە پەترۆل و گازا باشوور دفرۆشیتە ترکیێ، وان ب خوە ئاشکەرە کر کو د ڤێ مژارێ دا رێككه‌فتنه‌كا 50 سالی كرییه».
بەسێ یا گەنی باش دزانیت نەپەدەکەیە رێككه‌فتن ل گه‌ل ترکیێ کری، بەلکو حکوومەتا هەرێما کوردستانێ رێككه‌فتنا ژ بۆ کێشانا بۆرییا پەترۆلا هه‌رێمێ «نە فرۆشتنا پەترۆلا هەرێمێ ب ترکیێ» ئیمزا کرییه، لێ ژ بەر بەرژەوەندیێن شەخسی و پارتییا خوە دخوازیت وه‌ها بدەته خۆیا کرن کو پەدەکەیە ب ڤێ رێككه‌فتنێ رابووی، په‌كه‌كه دخوازیت ب ڤێ یەکێ دژایه‌تییا هەرێما کوردستانێ وەک هەرێمەکا فیدرال بکەت.
هەر وه‌لاتەکێ کو چ سنۆرێن دەریایی نەبن، نه‌چار دمینیت ژ بۆ فرۆشتنا پەترۆلا خوە رێككه‌فتنێن راکێشانا بۆرییا پەترۆلێ ل گه‌ل وه‌لاتێن جیران ئیمزا بكه‌ت، لێ عاجزییا پەکەکێ و رایەدارا وێ یا گەنی یا ب ناڤێ بەسێ، نە ئه‌وه کو بۆرییا پەترۆلێ د ترکیێ را دەرباس دبیت، بەلکو عاجزییا وێ ئه‌وه كو پێگەها هەرێما کوردستانێ ل ئاستا ناڤدەولەتی بهێزتر بوویه و ئەڤ یەک ژی ل دژی بەرژەوەندیێن وێ و رێبەرێ وێ یە، ئەم هه‌موو دزانین رێبەرێ هۆزاتێ یێ کو ل ئیمرالیێ پالدای و خوە ددەته تاڤێ چەوا کەتییە د خزمەتا دەولەتا داگیرکەرا ترکیێ دا و دەما هاتییە گرتن ژی چ سۆز و پەیمان ب رایەدارێن ترکیێ دابوو، عاجزییا بەسێ ب تەنێ ئەڤەیه کو ئه‌و دزانیت ب فرۆشتنا پەترۆلێ دێ هەرێما کوردستانێ بهێز كه‌ڤیت و خەونا رێبەرێ پەکەکێ و دەولەتا داگیرکەر یا نه‌هێلانا هەرێما کوردستانێ دێ ژ هۆلێ رابیت.
په‌كه‌كه پتر ژ تركیێ هێرشی په‌ده‌كێ دكه‌ت
د داخویانییا خوە دا بۆ «ئۆزگور پۆلتیکایێ» بەسێ ب تەمامی روویێ خوە یێ قاییم پتر دیار كر، وێ ب ئاوایەکی پر بێ ئەخلاق باسی بارزانی کر، ب قاسی کو هێرشی بارزانی و په‌ده‌كێ کری، هند هێرشی ترکیێ نەکر، هەلبەت ئەڤه نە تشتەکێ عەجێبە، بەسێ و رێڤەبەرێن پەکەکێ ب تەنێ هێرشی کەسێن وه‌ك بارزانی ولاتپارێز و کوردپەروەر دکه‌ن، ئەو چ جاران هێرشی کەسێن وەک ئاتاتورک، خومەینی و خامەنەئی، سەدام و ئەسەد ناکه‌ن کو ب هەزاران کورد ب دەستێن وان هاتنە کوشتن، وه‌لاتێ کوردان داگیرکری، بەسێ و هەڤالبەندێن خوە گەر بخوازن ژی نه‌شێن باسی ڤان کەسان بکه‌ن، ژ بەر کو ئەو وەکه وان حەیوانانه یێن کو د یەک کانیێ دا ئاڤێ ڤەدخوەن و ژ بۆی یەک ئارمانجێ خه‌باتێ دكه‌ن.
بەسێ داخویانیا خوە ب ڤی ئاوایی بەردەوام دکەت و دبێژیت: «ئارمانجا ستراتیژی یا ترکیێ خوەگھاندنا سنۆرێن میساقا میللی یە، ژ بەر کو په‌كه‌كێ وەکە ئاستەنگا ھەره مەزنا ل پێشییا ڤان ئارمانجێن خوە یێن ستراتیژی دبینیت، تاسفیەکرنا په‌كه‌كێ ژ بۆ خوە کرنە پرسگرێکا مایندەبوونێ، ژ خوە په‌كه‌كه ل ھەمبەری پۆلیتیکایێن قڕکرن، داگیرکرن و دەستەسەرکرنێ یێن دەولەتا ترک قڕکەر، مینا دیوارەکێ مەزن دسەکنیت«.!!
یا كو په‌كه‌كێ بۆ ده‌وله‌تا ترك كری، ده‌وله‌تێ ب خوه نه‌شیایه بۆ خوه بكه‌ت!!
یا راست چ جاران دەولەتێ نەخواستییە نە رێبەرێ بەسێ و نەژی پارتییا وێ تاسفیە بکه‌ت، رێبەر و پارتییا کو دەولەتێ ب خوە دروستکری چما دێ هێته تاسفیە کرن؟!
گەلۆ قەی کارێ دەولەتێ ب ڤێ پارتیێ و ڤی رێبەری ب دوماهی هاتییه کو بخوازن وان تاسفییە بکه‌ن؟ نا چ جاران دەولەت ڤێ یەکێ ناکەت، ژ بەر کو یا نها پەکەکە بۆ دەولەتێ دکەت، دەولەت ب خوە ژی نه‌شێت بۆ خوە بكه‌ت، پەکەکە ل هەر چار پارچەیێن کوردستانێ بوویە پرەک ژ بۆ دەرباسبوونا ئارتێشا ترکیێ بۆ ناڤا خاکا کوردستانێ، بوویە بەشەک ژ ئەجێندایێن دەولەتا کوورا ترکیێ و بوویە بەشەک ژ جێبەجێکارێن «میساقا مللی»، دەولەتێ چ جاران نەخواستییە پەکەکێ و ئۆجالان تاسفییە بکەن، گەر پەکەکە ب خوە ژی بخوازیت خوە تاسفییە بکەت ترکیه دێ یەکەم دەولەت بیت ل دژی ڤێ یەکێ راوه‌ستیت.
بەسێ ل دەربارێ سەرەدانا فەرمی یا «مەسروور بارزانی» سەرۆکێ حکوومەتا هەرێما کوردستانێ، ژ بۆ بریتانیا ژی ژەهرا خوە درێژیت و دبێژیت: «د رەوشەکا وه‌ھا دا، مەسروور ژ بۆ كو رێككه‌فتنێن قرێژ یێن ل گه‌ل ترکیێ ڤەشێریت و کوردان بخاپینیت گۆت، ‘عیراق دشێت ببیته کۆنفەدەراسیۆنەک ژ گەلەک دەولەتان کو پارچە بوویە’ و ھەول ددەت راستیێ ڤەشێریت، بەرەڤاژی بکەت. ھەروه‌ھا ئەڤ داخویانی وەکە نیشانەیا ھەولدانا قوتکرنا باشووره ژ ئیراقێ و گرێدانا وێ وەک ویلایەتەک ب ترکیەیێ دهێته نرخاندن.
ب راستی ژی دڤێت مرۆڤی روویەک پڕ قاییم هەبیت کو بشێت ب ڤی ئاوایێ بێ ئەخلاق بپەیڤیت و درەوان رێز بکەت، ئەز ناخوازم وەکە وان بپەیڤم، لێ جاران نەچار دبم وەک وان بپەیڤم، ژ بەر کو ئەو ب تەنێ ژ ڤی زمانێ ئاخفتنێ فێم دکه‌ن، وان تەڤ سنۆرێن بێ ئەخلاقیێ دەرباس کرینە و چ بێئەخلاقییەک نەمایه کو نەکری، ئەو هێرشی هەر کەس و ئالییەکێ وه‌لاتپارێز دکه‌ن.
ئەڤ رێڤەبەرا پەکەکێ دبێژیت: «ئەگەر نە ژ ھەڤکاری و خیانەتا په‌ده‌كێ با، دەولەتا ترک یا قرکەر مێتنگەر نه‌دشیا هێرشێن داگیرکەریێ بینیته سەر باشوورێ کوردستانێ».
پەکەکە بوویە پرا دەرباسبوونا ترکیێ بۆ باشوور و رۆژئاڤا کوردستانێ
لێ هەر کەس دزانیت ئەڤه درەوەکە کو پەکەکە رۆژێ ب سەدان جاران دوبارە دکەت و پەدەکە ب چ ئاوایی هەڤکارییا ترکیێ ناکه‌ت، ژ خوە پەدەکە و بارزانی ل عەفرینێ، سەرێ کانیێ، حەفتەنینێ، کورەژار، زنارا کێستە و تەڤ هەرێمێن سنۆری یێن د نێڤبەرا باشوور و باکورێ کوردستانێ دا نەبووینە، په‌كه‌كێ ئه‌ڤ هه‌موو ده‌ڤه‌ر تەسلیمی ترکیێ کرن، 40 سالن ئەڤ هەرێمه د دەستێن په‌كه‌كێ دا بوون، نە ب تنێ پەدەکە ل وێرێ نەبوو بەلکو په‌كه‌كێ رێ نەددا سڤیل ژی بچنه وان ده‌ڤه‌ران و گوندێن خوە ئاڤا بکه‌ن.
یا راست پەکەکە بوویە پرا دەرباسبوونا ترکیێ بۆ باشوور و رۆژئاڤا کوردستانێ، پرانییا جهێن بەری نها د دەستێ پەکەکێ دا، نها ترکیێ داگیر کرینە بێی کو پەکەکە بشێت یەک بوهست ئازاد بکەت، پەکەکە تنێ د مه‌دیایێ دا شەرێ ترکیێ دکەت، چ شەرەکێ دی د نێڤبەرا وان دا نینه، پەکەکە وەک رێنیشاندەر بۆ ترکیێ رە کار دکەت، هەر جهێ پەکەکە لێ هەبیت ترکیە ژی لێ هەیە و داگیر دکەت.
بەسێ ب ئاوایەکی بێ ئەخلاق باسی پێشمەرگەیان دکەت و ب مافێ پێشمەرگەیان نزانیت کو ل ده‌ڤه‌رێن نها ترکیا دخوازیت داگیر بکەت هەبن و رێ ل رێككه‌فتنا ژێر ب ژێر یا پەکەکێ و ترکیێ بگریت، وێ ژ بیر کرییە ئەڤ ده‌ڤه‌ره بەرێ د دەستێ پێشمەرگەیان دا بوون، پێشمەرگەیان ژ بۆی ئازادکرنا ڤان ده‌ڤه‌ران ژ دەستێ رژێما ئیراقێ ب سالان خه‌بات کرییە و دەریایەک خوینێ رژاندییه، ب هەزاران پێشمەرگە ل ڤان ده‌ڤه‌ران بریندار بووینە، شەهید بووینه، لێ ل سالا 2014ێ پشتی هێرشا تەرۆریستێن داعشێ، پێشمەرگە نەچار مان وان ده‌ڤه‌ران بەرده‌ن و بچنه به‌ره‌یێن شەرێ داعشێ، پشترە پەکەکێ وەک ده‌ستكه‌فتی دەست دانا سەر و جهێ خوە ل نێزیكی باژاران کر.
هەر جهێ کو بەسێ و پارتییا وێ لێ بووینە، نها ئارتێشا ترکیێ هەیە
ب کورتی، ل هەر جهێ کو بەسێ و پارتییا وێ لێ بووینە، نها ئارتێشا ترکیێ هەیە، ل هەر جهێ کو ئەو لێ بووینە وێرانکاری ل پاش خوە هێلایه، خەلک كوشتییه، شەرێ عەشیران چێکرییە، کارساز کوشتینە و رۆژنامەڤان به‌رزه کرینە، باژار وێران کرینە و گوند چوول کرینە، شەرێ خەندەکان و ڤالا کرنا گوندێن باکورێ کوردستانێ کو دکەڤنه سەر سنۆرێ باشوور باشترین میناکن ژ بۆ رێڤەبەرییا بەسێ و پارتییا وێ، کێ مافێ رەخنەکرنا حکوومەتا هەرێما کوردستانێ و رایەدارێن وێ هه‌بیت، بەسێ و پارتییا وێ ئەو ماف نینه، ژ بەر کو ئەو ب تنێ ب ناڤ پارتیەک کوردی یە، د ئەسلێ خوە دا، هەر وەک د هەلوەستێن رێبەرێ پەکەکێ د رۆژا یەکەم یا ڤه‌گه‌را وی بۆ ترکیێ دە خۆیا بووی، رێبەرێ بەسێ و پارتییا وان ب تەنێ ژ بۆ دژایه‌تیکرنا خەتا نەتەوه‌یی و پاراستنا میساقا مللی یا ترکیێ هاتینە چێکرن، داخویانیێن رێبەرێ پەکەکێ ژی باشترین ئارگومەنن ل سەر ڤێ یەکێ.
پێویست بوو نها رۆژنامەڤان و کادرێن پەدەکێ، رەوشەنبیر، هونەرمەند و عاقلمەندێن کوردستانێ پەکەکێ و داخویانیێن رایەدارێن وێ رەخنە بکه‌ن و بەرسڤا وان بده‌ن، لێ چ کەس ل سەر داخویانیێن دژمنکارانە یێن پەکەکێ بەرسڤا وان نادەت، له‌وما من وەک کوردەکێ باکور کو زۆلما پەکەکێ و راستییا وێ ب چاڤێن خوە دیتی نە خواست كو گه‌ر كێمه‌ك ژی بیت ژ ڤێ ئەرکا نەتەوه‌یی یا ل سەر ملێن خوە راکه‌م و ل گۆری خوە بەرسڤا ڤان بێئەخلاقیێن پەکەکێ و رێڤەبەرێن وێ بده‌م.
