دەمیرتاش: دەولەتا مە یا هەڤبەش کۆمارا ترکیێ یە!

دەمیرتاش: دەولەتا مە یا هەڤبەش کۆمارا ترکیێ یە!

ل باکورێ کوردستانێ کێشەیاکا جڤاکی ھەیە کو چ کەسەک ھەولنادە بەحس بکە. بەشەک ژ جڤاکی دایە دووڤ سیاسەتا پەکەکێ، پەکەکە و ھەموو ئالیێن پێڤە گرێدایی چ بێژە ئەوە. خوە نەرازیکرن نینە. بەرێ خوە بدن سیاسەتا پەکەکێ گەلۆ ئەڤ سیاسەت چەوانە و چیە؟ ل دژێ کی تێ کرن؟

ژ بەری ھەر تشتەکێ د بنگەھێ سیاسەتا پەکەکێ دا دژبەریا دەولەتا ترک نینە و بەرەڤاژی ڤێ یەکێ ڤێ سیاسەتە ھێڤێنێ خوە ژ کەمالزمێ وەرگرتیە و پاراستنا دەولەتێ ژ بۆ خوە کریە ئارمانجا سەرەکە. ئەڤە 40 سالن جڤاکا کورد تەخریب دکە، ھەولددە کوردا دەولەتا ترک ڤە گرێ بدەت. فۆرموولا سیاسەتا پەکەکێ و ھەموو دام و دەزگەھێن پەکەکێ ڤە گرێدایی ئەڤەیە.

ھەدەپە د چارچۆڤا سیاسەتا پەکەکێ دا رۆژەکێ ل ھمبەر دەولەتێ و سیاسەتا دەولەتێ یا دژێ کوردا دەرناکەڤە. دژتیا حکوومەتێ، ئاک پارتیێ و ئەردۆگان دکە. ئەڤ یەک ووسا تێ فام کرن کو دژاتیا دەولەتێ دکە. نھا ل ترکیا، جەهەپە، چەپێن ترک، و چەپێن ناسیۆنالیست ھەمی دژێ دەستھلاتا ئاک پارتیێنە ، لێ بناغەیێن دەولەتا ترکیا کو ل سەر ژناڤبرن و ئینکارا کوردا ھاتیە ئاڤاکرن دپارێزن. ترسا وان یا ھەری مەزن ئەوە کو ئەڤ ستۆنێن بنیاتا دەولەتێ، رۆژەکی دەولەتێ برووخینن. ھەدەپە ژی بەشەک ژ ڤێ سیاسەتێیە.

ئیرۆ ئاک پارتی دەستھلات و نوونەراتیا دەولەتێ دکە، سبەھی دبە پارتیەک دن وەرە سەر دەستھلاتێ. لێ ژ بۆ جڤاکا کورد ژ ئالیێ مافێن نەتەوی دا تشتەک نایێ گوھەرتن. ژ بەر کو ھەدەپە ژی د ناڤ دا ھەموو پارتی خوەدیێ بەرنامەیەکێ نە و ڤەکری دبێژن کو دەما ببن دەستھلات دێ چ بکن. لێ رۆژەڤا وانا سیاسی دا پرسا کورد تونەیە. ھەدەپە ژی وەک پارتیەکا ئۆپۆزسیۆنێ تەڤدگەرە و ژ بۆ کوردا نە خوەدیێ تو بەرنامەیەکێ یە.

ژ ئالیەک دن ڤە د ناڤا ھەدەپێ دا ئەڤە دەمەکە زرنایا دەمرتاش تێ لێدان. ھەتا گەلەک جڤاتان دا خەلکێ گرێدایی ھەدەپێ پرانی ژ ئۆجالان پێتر بەحسا دەمیرتاش دکن و وی ژ ئۆجالان پێتر دحەبینن.

سەلاحەدین دەمیرتاش ل گرتگەھێ دا رۆژانە دیتنا خوە ب داخوویانیا د مەدیا جڤاکی دا رادگھینە. تو ئاستەنگ ژێ رە تونەیە. ھەتا دەمیرتاش نھا ژ بەرێ پیتر پۆپوولەرە.

دەمیرتاش ھەری داوی تویتەک وەشاند و تێ دا گۆت: “ژ بۆ گوھەرینێن مەزن ئامادەبن. بلا ھەرکەس دەستبدە ھەڤ و ل تەنشتا ھەڤدوو بسەکنە. پیڤانا مەیا ھەڤبەش “کۆمارا دەمۆکراتک”ە. مالا مەیا ھەڤبەش ترکیایە.دەولەتا مەیا ھەڤبەش کۆمارا ترکیایە.

گەلۆ ما ئەڤ داخویانیە پیدڤی شرۆڤەیێ دکەت؟ چ جیاوازی د ناڤبەرا ڤێ گۆتنێ و گۆتنێن سەرۆکێن پارتیێن ترک دا ھەیە. ئەردۆگان ژی، باخچەلی ژی، کلچدارۆغلو ژی ھەموو ھەر ڤێ یەکێ دبێژن. دەمیرتاش راستیا خوە دبێژە، لێ پرسگرێک ئەوە کو کورد ب ڤێ یەکێ تێ ناگھن. جڤات ھاتیە گێژ کرن. ژ بۆ ڤێ ژی ئەڤ گۆتن گەلەک نایێن شرۆڤە کرن. پارتیێن کورد ب خوە ژی گەلەک گوھ نادن ڤان گۆتنا و شرۆڤەیەکێ ل سەر ناکن. گەلۆ ژ بۆ چ پارتیێن کورد بێ دەنگ دمینن؟

گەلەک ڤەکری سەلاحەدین دەمیرتاش ھەولددە کو شڤانەتیا کەرییەکێ پەزی بکە و بەرێ وی پەزی بدە ھەڤشییێ دەولەتێ..

رۆژەڤا کورد

پوستێن ھەمان بەش