Skip to contentمالا خوه‌دێ ئاڤا!!
د شه‌رێ پێشمه‌رگه‌یێ كوردستانێ یێ ل دژى ده‌وله‌تا ته‌رۆرا داعشێ، من سه‌ردانه‌ك ئانی باشوورێ وه‌لات وه‌كه پشتگری ژ بۆی هێزا پێشمه‌رگه‌هان، هه‌ر وها وه‌كه كورده‌كی باكور بكارم مل ب ملێ پێشمه‌رگه لدژى ده‌وله‌تا كو ژێره دگۆتن ده‌وله‌تا ئیسلامى یا ل ئیراقێ و شامێ «داعش» ته‌ڤبگه‌رم.
ل ور من پر تشت ب چاڤێ خوه دی و ژیان كرن، ماتمایی مام كو من گۆتنا «مالا خوه‌دێ ئاڤا» هه‌ری زێده ژ پێشمه‌رگه‌هێن كوردستانێ دبهیست، ڤێ گۆتنێ بالا من وه‌كه كورده‌كی باكور دكشاند.
جاره‌كێ من ژ پێشمه‌رگه‌هه‌كی ره گۆ: گه‌لۆ مه‌به‌ستا وه ژ ڤێ گۆتنێ چیه؟ چما هوون هه‌ری زێده بكارتینن؟ وی گۆت: «مرۆڤ ڤێ گۆتنێ ل وێ چاخێ دبێژه چاخا كو باوه‌ر نه‌كه ئه‌ڤ گۆتن وێ ژ ده‌ڤێ كه‌سه‌كی ده‌ركه‌ڤه، ئانگۆ وه‌ختا مرۆڤ باوه‌ر نه‌كه تشته‌ك وێ چێببه، لێ به‌لێ چێدبه، ل وێ چاخێ مرۆڤ دبێژه: مالا خوه‌دێ ئاڤا».
ڤێ جارێ وه‌كه كورده‌كی باكور ئه‌زێ ببێژم: مالا خودێ ئاڤا!! كو ژ به‌رى بمرم من بۆ جارا یه‌كه‌مین دیت كو راستی ژ ده‌ڤێ يێك ژ رێڤه‌برێن په‌كه‌كێ ده‌ردكه‌ڤه، من به‌حسا خانما برێز «ره‌وشه‌ن ماردینی» ئا ئه‌نداما كوردیناسیۆنا كه‌ژه‌كێ یه، ڤێ خانمێ ل رۆژا 13/5/2022 ل كه‌نالا ستێرك یا په‌كه‌كێ ده‌ركه‌ت و دگۆت: «هه‌رێما كو فكرا ئاپۆ، یان گه‌ریلا لێ به، په‌ده‌كه ژ وێ هه‌رێمێ دترسه»!!
به‌لێ ئه‌ڤ گۆتن راسته، لێ پرس ئه‌ڤه چما په‌ده‌كه دترسه؟
گۆتنه‌كه كوردان هه‌یه دبێژه: «ئه‌و مرۆڤێ مارى پێڤه دایی، ده‌ما ئه‌و وه‌ریسی ژی دبینه دترسه».
په‌ده‌كه ژی وه‌كه وی مرۆڤی یه، ژ به‌ر كو په‌ده‌كه دیرۆكا رێخستنا په‌كه‌كێ ب باشی شۆپاندییه و فكرا ئاپۆ پڕ ب لۆژیك شیرۆڤه‌كرییه و ل گه‌ل رێخستنا په‌كه‌كێ ته‌ڤگه‌ریاییه، لۆما باش دزانه كو جوداتى د نێڤبه‌را مارى، په‌كه‌كێ و ئاپۆ ده تونه، چا‌وا مار ژه‌هرێ تێخه ناڤا به‌ده‌نا مرۆڤ و هه‌گه‌ر عاجل نه‌یێ ده‌رمانكرن ژیانا خوه ژده‌ست دده، عه‌ینی تشت گه‌ر په‌ده‌كه ژه‌هرا ئاپۆ ده‌رمان نه‌كه وێ گه‌لێ كورد به‌ر ب تونه‌بوونێ ڤه بچه.
پرس ئه‌ڤه، چما په‌ده‌كه دترسه و په‌كه‌كێ ب ژه‌هرا مار دشوبهینه ؟ سه‌ده‌م ئه‌ڤن:
جوداتی د نێڤبه‌را ره‌ژیمێن داگیركه‌ر و په‌كه‌كێ ده د مه‌سه‌له‌یا تا‌سفیه‌كرنا ولاتپارێزێن كورد تونه، میناك پڕن.
ره‌ژیمێن داگیركه‌ر و په‌كه‌كه ده‌ربارێ ڤه‌ژینا زمانێ كوردى هه‌ڤهه‌لوه‌ستن، ژ بۆ كو زمانێ شێرین تونه ببه، هه‌ردو ئالی د ناڤا لڤ و ته‌ڤگه‌رێن مه‌زن ده نه.
ئارمانجێن ره‌ژیمێن داگیركه‌ر و په‌كه‌كێ ده‌ربارێ فكرا نه‌ته‌وی یێكه، ئه‌و ب كه‌ڤنه‌شۆپی حه‌ساب دكن.
ره‌ژیمێن داگیركه‌ر و په‌كه‌كه ده‌ربارێ سه‌رخوه‌بوونا كوردستانێ هه‌ڤهه‌لوه‌ستن و ل دژی ده‌وله‌تا كوردی ته‌ڤدگه‌رن.
ره‌ژیمێن داگیركه‌ر و په‌كه‌كه وه‌كه گورێ كه‌ڤلێ میهان ل خوه كری، په‌كه‌كه ب ناڤێ كورداتیێ و داگیركه‌ر ب ناڤێ مافێن مرۆڤان خوه دده‌ن قه‌بوول كرن، لێبه‌لێ نه‌په‌كه‌كێ باوه‌ر ب كورداتیێ و نه‌ژی داگیركه‌ران باوه‌ر ب مافێن مرۆڤان هه‌یه.
ژ روویێ له‌شكه‌ری ڤه په‌كه‌كه عه‌ینی رۆلا ئارتێشا حه‌مید ژ بۆ داگیركرنا كوردستانێ دلیزه، باكور و روژئاڤا میناكێن هه‌ری به‌رچاڤن.
پڕ وه‌كهه‌ڤیێن دن هه‌نه، لێ ئه‌م ناخوازن خوه‌نده‌ڤانێ خوه یێ ب رومه‌ت ئیزا بدن.
ب كورتاسی ئه‌ڤ ئه‌و سه‌ده‌من یێن كو ترسێ ل جه‌م ولاتپارێزێ كورد چێدكه، لۆما هه‌ر جیهێ په‌كه‌كه و فكرا ئاپۆ لێبه، ترس ژ وێ ده‌رێ چێدبه.
