ترکیا ب رێیا بەلاڤۆکان ژ چەکدارێن پەکەکێ دخوازە خوە رادەست بکن!

ترکیا ب رێیا بەلاڤۆکان ژ چەکدارێن پەکەکێ دخوازە خوە رادەست بکن!

ب درێژاهیا زنجیرە چیایێ مەتینا ل باشوورێ کوردستانێ، بالەفرێن ترکیێ ب رێیا هەوایی پەیامەک ب زمانێ کوردی ژ بۆ ەکدارێن پەکەکێ شاند.

چاڤکانیێن پێگەها «دارکا مازی» ل باشوورێ کوردستانێ ئەشکەرە کر، ل پرانیا دەڤەرێن دکەڤنە چیایێ مەتینا هندەک کاغەز کو ب زمانێ کورمانجی ل سەر هاتیە نڤیساندن هاتنە دیتن کو ووسا دیار دبە ژ لایێ بالەفرێن ترکیا ڤە هاتبن ئاڤێتن داکو گەریلایێن پەکەکێ وان رووپەلان ببینن و پەیاما ترکیێ بزانبن.

د ڤان بەلاڤۆکان دا ترکیا ژ گەریلایێن پەکەکێ دخوازە کو خوە هشیار بکن و ل ژیانا خوە و فەرماندارێن خوە بنێرن کا ب چ ئاوا ئەو خوەش و باش دژین و گەریلا ژی د زەحمەتیان دا دژین، ترکیا داخوازێ ژ گەریلایان دکە کو تەسلیم ببن و خوە بسپێرن دادگەهێ، داکو بکارن جارەکە دن ب خوەشی لگەل مالباتێن خوە دا بژین.

بەلاڤۆکا ترکیێ ب ڤی رەنگی یە:

  • ل سەر ئەزیەت کرنا خوە بێدەنگ نەبە.

  • نە مرنێ! ژیانێ هلبژێرە!

  • باوەر ب عەسکەرێن ترک بکە.

  • خوە بسپێرە خۆشگرییا مەزنێ دەولەتێ.

  • ژیانا تە ئێدی د بن گارانتیێ دایە.

  • ئێدی دەما رزگار بوونێ ژ ڤێ سەفالەتێ نەهات؟

  • د ناڤ رێخستنێ دا هوون وەک خزمەتکار و خولام تێن بکارئانین ئێدی هوون ژ وێ ئاجز نابن؟

  • بێژە یێن کو تە بکارتینن، “ئێدی بەسە”، نەهێلە کو تە بخاپینن.

  • ژیانا خوە د ناڤا شکەفتێدا دەرباس کرن نە قەدەرێ تەیە.

  • تو د ناڤا زەحمەتیان دا ژیان دکی، بەرپرسیارێن وە د جهێن ئەولەهی دا د ناڤ زەوق و سەفایێ دا ژیان دکن.

  • د چیایان دا شینا کو د ناڤا ترس و سەفالەتێ دا بژی، ب مالباتێن خوە رە ژیانەکا شاد و درێژ تەرجیهـ بکە.

  • هین ژی تە تشتەک وەندا نەکرییە. ژ وێ تاریێ دا چقاس زوو جودا ببی تو دێ ئەوقاسی زوو رزگار ببی.

  • حەژێکەرێن تە ل بەندا تەنە. ئاڤاکرنا ژیانەک شاد ژ بۆ وان د دەستێ تەدایە.

  • دەولەتا مە هەر دەم ب شەوقات و مەرحەمەتە.

  • تو ب چ ئاوایی قەت زرار نابینی.

  • باوەر ب دەولەتا مە بکە و بگهیژە ئازادیا راست.

ئەڤ د دەمەکی دا یە کو بەرا نها ل 20/5/2021ێ ژی جارەکە دن دەولەتا ترکیێ ب رێیا پارڤەکرنا ڤان بەلاڤۆکان ل ناڤچەیێن «کانی ماسێ و سیریێ-شێلادزێ» ل باشوورێ کوردستانێ، ژ چەکدارێن پەکەکێ خوەستبوو خوە رادەستی دەولەتێ بکن.

پوستێن ھەمان بەش