مەجلیسا پارتیێ و دەستەیا کارگەریا نەڤەندی یا پارتیا سۆسیالیستا کوردستان-پەسەکێ، د 14-15ێ گولانا سالا 2022یێ جڤنا خوە ئەنجامدا. د جیڤنێ دا گفتوگۆ ل سەر خالێن رۆژەڤێ ھات کرن و بریار ھاتە داین، کو بەلاڤۆکا ژێری پێشکەشێ رایا گشتی بهێت کرن.
داخویانیا پارتیا مە ب ناڤێ “ژ بۆ ئازادی، دەمۆکراسی و ئاشتیێ بانگا چارەسەرییەک لەزگین” ھەیامەک بەرێ بۆ رایا گشتی ھاتبوو پێشکەش کرن. داخویانیا ھەنێ نەخشەرێیا پارتیا مە یا دەمێن کورت و مامناڤەندییە. مە د داخویانیێ دا گۆتبوو، کو “پارتیا سۆسیالیستا کوردستان، ئەو پارتییە کو ل گۆر پەیرەوا خوەیا دیرۆکی، ژبۆ ئازادیا گەلێ کورد دەرکەتیە رێ. لگەل ڤێ یەکێ ژبۆ ئاڤاکرنا سیستەمەکێ فەدەرال، ئازادیخواز و دەمۆکراتیک ل ترکیایێ ئامادەیە کو بەرپرسیاریا خوەیا د ڤی واری دا، جێبەجێ بکەت”. ھەروەکی مە گۆتیە ئەم ئامادەنە ئەرکێن خوە د وارێ خەباتا ئازادی و دەمۆکراسیێ دا جێبەجێ بکەین.
لی ترکیێ قەیرانەکا ھەمورەنگ و کوور ھەیە و قەیرانا ھەنێ رۆژ ب رۆژ کوورتر دبە. ترکیا د وارێ سیاسی، چاندی و جڤاکی، ب تایبەتی د وارێ ئابۆریێ دا گھیشتیە بنبەستێ. سەدەما سەرەکی یا قەیرانا ھەنێ فەلسەفە و سیاسەتا یەکپارێزی، زۆردار، حاشاکەر و دژ-دەمۆکراتیکە، کو دەولەتا ترک ل سەر ڤێ بنگەھی ھاتیە دامەزراندنێ.
قەیرانا ئابۆری ل کوردستانێ کوورترە. بێدادی، بنپێکرنا ماف و ئازادیان، تەپساندنا داخوازێن دەمۆکراتیک، گرتن و دەست ب سەردا گرتن، توندوتژی و ئۆپەراسیۆنێ لەشکەریێ، کو رۆژ ب رۆژ زێدە دبن، ھەڤرێین قەیرانا ئابۆری نە. لگەل ڤان، سیاسەتا ئێریش و داگیرکرنا حکومەتا ئاک پارتی ل کوردستانا باشور و کوردستانا رۆژئاڤا، ئێریشێن نژادپەرەستی بۆ سەر کوردان، کو ل رۆژئاڤایێ ترکیێ دژین، دبنە سەدەما پرتر و کوورتر بوونا ئالۆزی و قرژیا جڤاکی.
ل ھەمبەرێ رەوشا ھەنێ داخوازا ئاساییبوونا جڤاک و دەمۆکراسیێ رۆژ ب رۆژ بلند دبە.
بێ گومان ئاساییبوونا جڤاک نە تەنێ د بەرژەوەندیا ھێزێن دەمۆکراسی دایە، ھەر وسا د بەرژەوەندیا تەڤگەرا وەلاتپارێزێن کوردستانێ دایە. پەسەکە ب ڤی ھشمەندیێ ڤە، جارەکا دن جەخت دکە و دبێژە کو ئاساییبوونا جڤاکی ژ بۆ کوردان ژی گرینگە.
د ناڤا خەباتا دژی زەدێبوونا بهایێ کەلوپەلان، ژ بۆ باشتر کرنا ژیان و گوزەرانا گەل و خەبات بۆنا دادوەری، ماف و ئازادیێ دا پەیوەندیەکا خورت ھەیە.
پەسەکە ئەرکێن خوەیێن د ڤی وارێ دا ژی دێ جێبەجێکەت.
ل پێشیا خەباتا وەلاتپارەز و دەمۆکراتا کوردستانێ پێڤاژۆیەکا ھەستیار ھەیە. تەڤگەرا ئازادیا کوردستانێ روو ب روویێ دەرفەت و مەترسیێ دایە.
شەرێ روسیا و ئوکراینا بوویە سەدەما ڤێ یەکێ، کو دەولەتێن ئەورۆپا و زلھێزێن جھانێ پێتر بالا خوە بدنە ناڤچەیێن پەترۆل و گازا سروشتیێ.
نرخا رۆژھلاتا ناڤین و کوردستانێ بلند بوو.
کوردستانا باشوور، کو د وارێ پەترۆل و گازا سروشتیێ دا دەولەمەندە، رۆژ ب رۆژ بالا جیھانێ ب ئالیێ خوە دا دکشینە. د ھەمان دەمێ دا ئێریشێن دەولەتێن داگیرکەر وەکی ئیران و ترکیێ بۆ سەر کوردستانا باشوور زێدەتر دبن.
پەسەکە باش دزانە، کو تەڤگەرا دەمۆکراتیک و وەلاتپارێزێن کوردستان پێڤاژۆیەکا دژوار و سەختە و ھەول ددە، ئەرکێن خوە د ڤی وارێ دا جێبەجێ بکە.
پێکاننا سازیەکا نەتەوی و دەمۆکراتیک، کو تێدا ھەمو پارتی و ئالیێن سیاسی، سازیێن جڤاکا سیڤیل و کەسایەتیێن وەلاتپارێز جی بگرن، وەکی ئەرکەکێ بنگەھین ل پێشیا مەیە.
پەسەکە ژ ئالیەکێ ڤە کار دکە کو ئەرکا خوەیا ھەنێ جێبەجێ بکە، ئالیەکێ دن ڤە ژی کار دکە، کو پەیوەندیا خوە لگەل ھێزێن دەمۆکراتیک یێن ترکیێ گەرم و گورتر بکە.
پەسەکە ژ بۆ سەرکەتنا خەباتا ئاڤاکرنا ناڤەندەکا کورد ل سەر بنگەھا ولاتپارێزی، لگەل ھەڤبەشێن خوە دێ کارێ خوە بەردەوام کەت.
ناڤەندەکا ب ڤی رەنگی نە تەنێ بۆ مە کوردان پێوستیەکا دیرۆکییە، ھەر وها پشتگریەکا خورتە ل خەباتا دەمۆکراسی و ئاساییبوونێ.
ناڤەندا ھەنێ ھەر وها پشتگریەکا مەزنە ل خەباتا وەلاتپارێزیا پارچەیێن دنێن کوردستانێ. ژ بەر کو باشترین و ب واتەترین پاراستنا دەسکەڤتێن کوردستانا باشوور و رۆژئاڤا، ئاڤاکرنا نەڤاندەکا نەتەوی و دەمۆکراتیکە، کو ل ھەمبەرێ سیاسەتا ئێریشکارا دەولەتا ترکیێ، لگەل ھێزێن دەمۆکراتیک کار بکە.
د ڤی واری دا بلا ئەم ئەرکێن خوە جێبەجێ بکەین و ئەم باش دزانین و پشتراستین کو سەنگەرێن پاراستنا ھەولێر و قامشلۆ پیدڤیە ل ئامەد، سلۆپی، جزیرێ و رحایێ بهێنە دانان.
17 گولانا 2022
پارتیا سۆسیالیستا کوردستان-پەسەکە
