دارا بلەک
ترکیا و باکورێ کوردستانێ کەتینە د ناڤا پێڤاژۆیا ھلبژارتنان دا و رۆژانە وەک کو دێ سبەھی ھلبژارتن چێببن ھەر ئالیەک ل گۆرا خوە حەسابا دکە و پرانیا داخویانیا و گۆتوبێژان د ڤێ چارچۆڤەیێ دانە.
ل وەلاتێن وەک ترکیا د پێڤاژۆیا ھلبژارتنان دا گۆتنا چ بھایێ خوە نینە. ژ بەر کو ھەر ئالی چ دبێژە بلا بێژە، پشتی ھلبژارتن داوی تێ، ھەرکەس پشتا خوە ددە گۆتارێن خوە و سۆزێن دایین. ئەڤە ژ سالێن 1946ێ پێڤە ب ڤی ئاواییە. ژ بەر ڤێ یەکێ پرانیا سیاسیان د ڤێ دەربارێ دا چ بها نینە.
نھا پرانیا ئالیێن سیاسی د پەنجەرەیا خوە دا ل پرسگرێکان دنێرن و پرسێن ھەیی شرۆڤە دکن، ھەروەھا د ڤی چەرچۆڤەیێ دا ھەڤدو رەخنە یان ژی تاوانبار دکن.
لێ ئەم دەما وەک کورد د پەنجەرەیا کوردستانی دا، دەستخستنا مافێن نەتەوی پیڤان وەربگرین، گەلەک تشت تێنە گوھەرتن و دیمەنەک تایبەت ل ترکیا دەردکەڤە پێشیا مرۆڤ.
ھەمی پارتیێن سیاسی د دەما ھلبژارتنان دا بەحسا پرسا کورد دکن و ل گۆرا وێ ژی ھەولددن دەنگێ کوردا بدەستڤە بینن. ژ ئالیەک دن ڤە ھنەک پارتیێن ب ناڤێ کوردا تەڤدگەرن و سەری دا ژی ھەدەپە د ڤێ پێڤاژۆیێ دا ل گۆرا خوە پرسا کورد دکن دەرنجکەک و بەرژەوەندیێن خوەیێن رێخستنی و کەسایەتی بنگەھ دگرن و تەڤدگەرن.
ژ بەری دەمەکێ ھەڤسەرۆکێ بەرێ یێ ھەدەپێ «سەلاحەدین دەمیرتاش» نامەیەک دەرخست و ئەو نامە د رۆژەنەمەیا ئینتەرنەتی T24ێ دا ھاتە وەشاندن. دەمیرتاش وەک سەرۆکێ پارتیەک ترکیا یا کەمالیست پێشنیارا دکە. د بەشەک ژ نامەیا خوە دا بەحسا پرۆسەسا ھلبژارتنا دکە و بانگی ھێزێن وەک خوە دکە و دبێژە ژ بۆ ئەم ڤێ دەستھلاتێ بگوھەرن دڤێ دەست د ناڤ دەست تەڤبگەرن و دەست بدن ھەڤ. دەمیرتاش پیڤانێن دەستداناھەڤ ژی ئاشکەرا دکە و دبێژە: ژ بۆ گوھەرتنا مەزن ئامادەبن. بلا ھەرکەس دەستبدە ھەڤ و ل تەنشتا ھەڤدو بسەکنە. پیڤانا مەیا ھەڤبەش ‘جومھوریەتا دەمۆکراتک’ە. مالا مە یا ھەڤبەش ترکیایە. دەولەتا مەیا ھەڤبەش جومھوریەتا ترکیایە.
دەمیرتاش بەحسا ژ نوو ڤە ئاڤاکرنا ترکیا دکە و دبێژە کو ئەم ترکیا ل سەر ستوونێن جومھوریەتێ ژ نووڤە ئاڤابکەین و دەمۆکراسیەک راستەقینە بینین ترکیا. دەمیرتاش باسی کوردستانێ و مافێ کوردا ناکە. ژ بەر کو، دەما تە گۆت ترکیا دەولەتا مەیا ھەڤبەشە، نە ھەوجەیە تشتەک دن بهێت گۆتن.
د سەری دا جەهەپە، چەپێن ترک و کەمالیستان پشگریەک مەزن دان ڤێ گۆتارا دەمیرتاش. باشە ئەم وەک کورد دەما کو دەستکەفتیێن نەتەوی وەک پیڤان قەبوول بکەین و د پەنجەرەیا کوردستانی دا ڤێ یەکێ بنرخینین، پیدڤییە ھەلوەستا مە چبە؟ ئەڤ خالا ھەری گرینگە کو، ئەم دیتنا خوە ب ئاوایەک زەلال بێ کو تو بەرژەوەندیەکێ بنگەھ بگرن ھەلوەستا خوە دیار بکن.
وێ دەمێ ئەم چەوا ئالیێن کو هەیا نها کوردا ئینکار دکن، ئەو دەولەتا کو بناغەیێ وێ ل سەر ئینکار و ئیمھاکرنا کوردا ھاتیە ئاڤاکرن دپارێزن شرۆڤە دکن، دڤێ گۆتارا دەمیرتاش ژی ب ھەمان ئاوایی شرۆڤە بکن و ببن خوەدی ھەلوەست.
ل ڤێ دەرێ پیڤان، گۆتارێن ل دژێ دەستکەفتیێن کوردا و خوەدی لێ دەرکەتنا دەولاتا جومھوریەتا ترکیایە.
