ناڤەندا راگھاندنا ھەسەدێ، دەربارێ گەفا سەرۆک کۆمارێ ترکیێ و ئەگەرا دەستپێکرنا ئۆپەراسیۆنەکێ ل سەر رۆژئاڤایێ کوردستانێ دا خویاکرن، “چ گوھارتنێن ستراتەژیک د بەلاڤکرنا ھێزێن ناڤنەتوەیی یێن گارانتۆر ل ھەرێمێن باکور و رۆژھلاتێ سووریێ دا تونە نە.”
د داخویانیا ناڤەندا راگھاندن و چاپەمەنیێیا ھێزێن سووریایا دەمۆکراتیک (ھەسەدێ) دا ھات: “چ گوھارتنێن ستراتەژیک د بەلاڤکرنا ھێزێن ناڤنەتوەیی یێن گارانتۆر ل ھەرێمێن باکور و رۆژھلاتێ سووریێ دا تونە نە. گەرمکرنا رەوشێ و نیشاندانا ھێزێ ژ ھێلا دەولەتا ترکا داگیرکەر ڤە د چارچۆڤەیا ھەولدانێن دەربەکرنا ئیستیقرارێ دایە، ھەر وھا ئارمانجا داگیرکەریێ ژنووڤە زندیکرنا داعشێ یە.”
ھەر وھا د داخویانیا ھەسەدێ دا ھات گۆتن: “ھێزێن مە ئاستا گەفێن دەولەتا ترک یێن ئاکتیف و پێشبین ل دژی ھەرێمێن باکور و رۆژھلاتێ سووریێ لێکۆلین دکن و ئاگاھیان لگەل ھێزێن ناڤنەتەوەیی یێن گارانتۆر پارڤە دکن.”
ئەڤ داخویانیا ھەسەدێ پشتی وێ تێ، سەرۆک کۆمارێ ترکیێ دوھی دابوو خویاکرن، پلانا وانا ئاڤاکرنا ھەرێمەکا ب 30 کیلۆمەتران کووراھی ل رۆژئاڤایێ کوردستانێ بەردەوامە و ئەو دێ رۆژا پێنجشەمبێ د جڤینا ئەنجوومەنا ئاساییشا نەتەوەیی یا ترکیێ دا بریارێ بدن.
