نووری چەلیک
ئەزێ د ڤێ نڤیسا خوە دا بخوازم پێویستیا مناقەشەیا پرسگرێکا چارەسەریا پەکەکێ یا ب ئالیێ کوردان ڤە گرێدایی و ب تایبەت ژی ئەرکا سەر ملێ کوردێن باکورێ کوردستانێ بدم کرن.
ئیرۆ ھەرێمەک ژ وەلاتێ کوردان، باشوورێ کوردستانێ، بەر ب دەولەتبوونەکا سەربخوە ڤە دچە، پێنگاڤێن پێشەرۆژا سەرخوەبوونا کوردستانێ ل وی بەشی تێ ئاڤێتن.
دڤێ ئەڤ، سەربلندی و کاما دلێ ھەر کوردەکی بە، ھەر کوردەک دەستێ ئالیکاری و پشتگریێ درێژی ڤی بەشی بکە دا کو رۆژەک بەری رۆژەکێ کورد چارەنووسا خوە ب دەستێ خوە بنڤیسن.
د دەمەک وەک ئیرۆ دا کو داگیرکەرێن کوردستانێ ب ھەر شێوەیی ئێریشی باشوور دکن و دخوازن دەستکەفتیێن ھەیی ژ ھۆلێ راکن، مافێ چ کوردەکێ نینە کو ڤە ئارامیا ھەیی ژ بۆ بەرژەوەندییێن ئۆل یان ھەرێما خوە تێک بدە.
پێدڤییە سەرۆک و دەزگەھێن باشوورێ کوردستانێ ژی ل گۆر حەقیقەت و بەرژەوەندییێن کوردستانێ خزمەتێ بکن.
د ئاڤابوونا ھەر دەولەت و دەزگەھەکێ دا خەلەتی و کێماسی چێدبن. سازکرن و برێکووپێکبوونا وێ دەولەتێ پێدڤی ب دەمەک دوور و درێژ ھەیە.
ھەلبەت پێدڤییە ئەو خەلەتی یان کێماسییێن کو تێن دیتن ب زمانەکێ برایەتی و دۆستانی بێن رەخنە کرن. لێ گاڤا رەخنە ژ رەخنەبوونا خوە دەرکەت و بوو چەکا پاراستنا بەرژەوەندییێن ھەرێمی، وێ دەمێ سینۆرێن رەخنەکرنێ ژ ھۆلێ تێن راکرن و دژمناتی دەستپێدکە.
ئەڤ ژی خزمەتا دژمن و خێرنەخوازێن کورد و کوردستانێیە. ئەز باوەر ناکم (ژ بلی سەرۆک و ھن رایەدارێن پەکەکێ) کوردەک رابە بێژە: “ئەز کوردستانەکا سەربخوە یان ژی فەدەرە ناخوازم”.
د دلێ ھەر کوردی دا خەون و خەیالا کوردستانا مەزن و یەکگرتی ھەیە. لێ شەرتان وسا کریە کو ئەم بخوازین و نەخوازن، کوردستان چار پارچەیە، کورد د وەلاتێن خوە دا ژ ھەڤ ھاتنە تاروومار کرن. 4 ھەرێمێن جودا و ھەر یەک ژ وان دخوازە ب سەرێ خوە ببە ھەرێما سەرەکی.
گاڤا ئەم ھەژمارا کوردان بدن سەر ھەڤ، باکورێ کوردستانێ بەشێ ھەری مەزنە. گاڤا ئەم ل گۆرا ھەژمارێ بلڤن، ھندەک دکارن بێژن؛ پیدڤییە باکور سەپەرشتیا کوردا بکن.
لێ رەئالیتا ھەیی مرۆڤان ناچاری دیفاکتۆیا ھەیی دکە کو، ئەو ژی ئەوە ھەرێمەک ژ ھەرێمێن کوردستانێ ئازادیا خوە بدەست خستیە.
پێدڤییە ئەم کورد ڤێ دەستکەفتیێ د قادا ناڤدەولەتی دا باش ب کار بینین دا کو ھەرێمێن دن ژی بکاربن وان دەستکەفتیا ب رێیەکا یاسایی بێخن رۆژەڤا جیھانێ. کوردێن ل ھەرێمێن نە ئازاد کری د ڤی واری دا خوەدی مافن.
لێ وەک مە ل ژۆر ژی بەحس کری، پارچەبوونا کوردستانێ کورد د ھەر واری دا تاروومار کرنە.
ژ بەر ڤێ ژی، پیدڤییە پەنجەرا رۆناھیا باشوورێ کوردستانێ وەک رۆناھیا چاڤان بهێتە پاراستن. و پیدڤییە ئەم چ فەرقیێ نەخن ناڤبەرا نەتاوا خوە.
چاوا کو سەرۆک مستەفا بارزانی د دەما خوە دا گۆتبوو: “چ کەسێ کو روحا نەتەوەپارێزی بۆ چێنەبووبیت، دێ رۆژەک ژ رۆژان خیانەتێ ل گەلێ خوە کەت” ئەڤ گۆتن ژ بۆ ئیرۆ و ژ بۆ ھەر دەمێ ژی دەرباس دبە.
ئیرۆ پرسگرێکا سەرەکی یا د ناڤ کوردا دا، پرسگرێکا پەکەکێ و کوردێ دەرڤەی پەکەکێ یە. ھەر چقاسی ھەبوونا پەکەکێ یا ل قەندیل و دەڤەرێن دن ژبۆ حکوومەتا کوردستانێ ژی سەرئێشاندنەکێ لگەل خوە دا بینە ژی، پێدڤییە ژ باشوورییان زێدەتر ئەم کوردێن باکور سەرێ خوە ب ڤێ پرسگرێکێ بێشینن.
د داخویانی و ھەلوەستێن ھندەک رایەدارێن پەکەکێ دا دیار دبە کو، پەیوەندیێن ھەرێما کوردستانێ لگەل داگرکەرێن جیران دا ئەو نەرەحەت کرنە. گەر پەکەکە بکاریت سەبەبێ نەرەحەتیا خوە ل سەر ئەساسێ کوردایەتیێ ژ بۆ حکوومەتا فەدەرەیا کوردستانێ بینە سەر زمان، ئەز باھوەرم دێ وەک حکوومەت، ھەرێما کوردستانێ ژی کاریت چارەسەریەکێ ژ بۆ نەرحەتیا پەکەکێ بینیت.
ژ خوە بەیانێن سەرۆکێ کوردتان یێ د وی واری دا گەلەک زەلالن. سەرۆکێ کوردستانێ د ھەر فرسەندێ دا چارەسەریێ د ریا دیالۆگ و رێیێن بێچەک بوونێ و دەمۆکراتیک دا تینە سەر زمان. پیدڤییە ئەم باکوری ژ نھا دا بزانین کو، ھەگەر سبە یان دوسبە باکورێ کوردستانێ ئازاد بوو، وێ ئەڤ پرسگرێکا پەکەکێ ل باکور ژی دەستپێبکە. پرسگرێکا ھەیی پرسگرێکا هەموو کوردستانێ ژی بە، دڤێ ئەم باکوری ژ ئیرۆ دا ب بەرپرسیاری تەڤ بگەرین و خوەدی سیاسەتەک نەتەوی بین. یان نە سبە ئەم ژی دێ دیسا تووشی شیدەتا پەکەکێ بین. و وێ گاڤێ ئەم ژی دێ کەڤینە رەوشا کو نھا ل باشوور د ناڤبەرا داگیرکەرێن کوردستانێ و ھەموەلاتیێن وێ دا ھەیی.
چارەسەریا پرسگرێکا پەکەکێ و خوەدیلێدەرکەتنا وێ، نە ئەرکا باشوورە. ھەگەر ل باشوور پرسگرێکا تونەکرنا پەکەکێ ھەبە، ئەرکا پێشین دکەڤیتە سەر ملێن باکوریان بخوە و دڤێت ئەو ل خوە و ل دەسکەفتیێن خوە خوەدی دەرکەڤن.
دڤێت د سەری دا پەکەکە ب رێیێن دەمۆکراتیک ل چارەسەرییا ڤێ پرسگرێکێ بگەرە. لێ گاڤا پەکەکە وان دەستکەفتیێن کوردا بکە قوربانا شەخس یان ھەرێمەکێ پێدڤییە ئەم کوردێن باکور ب دەنگەک بلند نە رازیبوونا خوە ل ھمبەر ھەلوەستێن پەکەکێ یێن نە د بەرژەوەندیا مللەتێ کورد دا بقێرین. ئەو رۆژ ژی ئیرۆیە…. پەکەکێ ژ نوو ڤە دەست ب رەڤاندنا زارۆکێن مە کریە؛ ئێریشی پەشمەرگە و دەزگەھێن مەدیا و سڤیلا دکە. ژ وێ بۆنێ ژی پێدڤییە هەموو کورد ب دەنگەکێ بلند بقێرن و بێن ئێدی بەسە ژ بۆ زلما پەکەکێ.
