ئەم ئێدی ھەڤدو فێم ناکن!

ئەم ئێدی ھەڤدو فێم ناکن!

بووبێ ئەسەر

دەما مە دەست ب تەکۆشینا ئازادیا ژ بۆنا گەلێ خوە ل باکورێ کوردستانێ کر. ئەم ھەمی وێ دەمێ هێژ گەلەک گەنج بووین، کەچ و خۆرتێن دلسۆزێ گەلێ خوە بووین.

مە وێ دەمێ ھەمیان چاڤێن خوە ب زلما لەشکەرێن رۆمێ، لێدان و ئێشکەنجەیێن وان دانین سەرێ باب و باپیرێن مە، ڤەکر. ڤەکر و دیت کو وەلاتێ مە دشەوتینن، مرۆڤێن مە رۆژ ب رۆژ وەندا دبن و تێنە وەنداکرن.

د ناڤا وی ئاگرێ ئەم و وەلاتێ مە دشەوتاند، ئەم ب خوە حەسیان کو دڤێ ھندەک ڤی ئاگری ڤەمرینن. لۆما ژی مە گەنجێن وان دەمان یێن سالێن (1965.1980) دەست دانە ھەڤ و مە ھەر یەکی/ێ راگھشت سەتلەک ئاڤێ و مە خواست ب وان سەتلێن خوە یێن تژی ئاڤ ئەم وی ئاگرێ مە و وەلاتێ مە دشەوتاند ڤەمرینن.

ل سەر ئاساسێ ڤێ بیر و باوریێ، گەنجێن وان دەمان دا، ئەم هەموو ب ھەلوەستا ئازادیا کوردستانێ، ب ھەڤرا کەتن لەجێ. ھا ل ور و ھا ل ڤر، بێ سەکن و بێ قەید و شەرد، ب فەدەکاریێن مەزن مە دەست ئاڤێت کارێ سیاسی ژ بۆنا ئازادیا وەلاتێ خوە.

تام ئەم ھێدی ھێدی ژ بەر وان ئێشکەنجە و زلمێن کاربدەستێن ترک دانین سەرێ گەلێ خوە شیار بوون و مە دەست ب ئامادەکاریا خوە ب رێخستنێ کر. مە کارێ خوە ب کوردی و ھەلوەستێن خوە ل سەر خەتا نەتەوەیی ب قاسی زانین و کانینێن خوە دمەشاند.

دمەشاند لێ کاربدەستێن دەولەتا داگیرکەر، ژ بەر کو دەولەت بوو، ئیمکانێن د دەستێن خوە دا ھەمی ب کار ئانین دا کو جوانێن کوردان نەبن یەک و ب ھەڤرا کار نەکن، خەباتێن مەزن کر. وەھا ژی بوو. ئەو خەت ھێژی بەردەوامە…

چاوا؟؟؟

دیتن کو جوانێن ملەتەکێ ل سەر ئاساسێ نەتەوەیا خوە دەست ب کارێ ئازادیا گەلێ خوە بکە، دێ سەد سەدێ رۆژەکێ ئەو گەل گەهیتە ئازادیا خوە. ژ بەر ڤێ بوو چ ب رێیا ئایدۆلۆژیان و چ ژی ب رێیێن دەرەو و فێلبازیان کەتن ناڤا مە جوانێن وێ دەمێ و ب ئالیکاریا دەولەتا خوە ئەم ژ ھەڤ تار و مار کرن.

ل مە وەھا کرن کو ئەم بوونە 10 – 15 رێخستن و پارتی. ب دەستێ کەمالیستێن خوە ئایدۆلۆژیا کەمالیزمێ ل سەر ناڤێ سۆسیالیزمێ د ناڤا مە دا گەشکرن و خوەشکرن. گەلەک ژ جوانێن وەکە مە و کەکێن مە ئانکو یێن ژ مە مەزنتر ل ھای ژ خوە نەبوون و ب وێ یەکێ هاتن خاپاندن.

وێ خاپاندنێ وەھا ل مە کر کو ئەم ژ دۆزا خوە یا نەتەوەیی ب دوور کرین، ل سەر ئایدۆلۆژیان ئەم ب ھەڤ کەتن. مە پارچە، کر قوربانا تەڤایی (تەئۆریا سۆسیالیزمێ ئەو بوو کو دڤێت تم پارچە ببان قوربانا تەڤایی. یانی مە کوردستان دکر قوربانا سۆسیالیزمێ). دەما مە ئەڤە کری ئاھا د وێ ھەنگەمانێ دا ئێدی رۆژ ب رۆژ ھزر و باوەریا نەتەوەیی ژی د ناڤا مە دا کێم بوو. ژ نەتەوەبوونێ ئەم بوونە ئایدۆلۆژیک…

چ دەما ھزرا نەتەوەیی، ل جەم گەنجێن ملەتەکێ کێم بوو ئاھا د ڤردا مالوێرانی ژی دەست پێ دکە. مە ئەو ژی کر. مە دۆزا خوەیا نەتەوەیی کر قوربانا ئایدۆلۆژیان و ئێدی ئەم ب ھەڤ کەتن. شەر و پەڤچوونێن د ناڤا جوانێن کوردان دا ژ نوو دا گەش بوو و ئەڤ ژی ب دلێ داگیرکەرێن مە بوو.

پشتی ھاتنا حوکمێ لەشکەری یێ 12 ئیلۆنا 1980یێ تەڤگەر و پارتیێن باکورێ کوردستانێ کو ژ جوانان پێک دھات و ژ بەر بێ تەجروبەیی وەکە تو نۆکا ل کەڤری بدەی، وەھا ل وان ژی ھات. ژ بۆنا نەیێن گرتن و کوشتنێ ژ ناچاری رەڤیان. ل کوچە و کۆلانێن ئەورۆپا ب جھ بوون.

مە د دەستپێکێدا دگۆت: ئەم دێ خوینین کێماسیێن خوە تەمام کین، ژ دیرۆکا خوە ھندەک دەرسان وەرگرین دا کو ئەم ب زانینێن ھێژا، ب باوەریێن نەتەوەپەرەستێ ل وەلاتی ڤەگەرین و ژ بۆنا ئازادیا وی ژ نوو دا دەست باڤێژین خەباتێن سیاسی. ئەم د ڤردا ژی ب سەرنەکەتین. لۆما جوانێن وەلات، نڤشێ ل دوو مە ژی ب دەستێ کەمالیستێن کورد ھاتن خەساندن.

لێ مخابن مە ئەڤە ژی د دەستپێکێ دا باش فێم نەکر. ھەر یەک ژ مە د ناڤا پێڤاژۆیەکا درێژ دا ل دەرەکێ کەتن، ب خوە و ب مالباتێن خوە ڤە مژوول بوون. پرانیا مە دەست ژ کارێ سیاسی و رێخستنی بەردان. ھن بوونە نڤیسکار، ھن بوونە کارساز، ھن بوونە فێلباز و ھن ژ وەکە خوە مان.

لێ نە مە و نە ژی چ رێخستنێن مە ل سەر وێ پێڤاژۆیا مە وەندا کربوو نەسەکنین. کێمانی و شاشیێن خوە نەگۆتن و تو تەجروبەیێن خوە ژی نەدان نڤشێ ل دوو خوە. یانی نڤشێ ل دوو مە، ژ مە و خەباتێن مەیێن وان سالانا نە ھایدار بوون.

پشتی ئەم د ناڤ سالان دا چووین و ئێدی پشتی 65ێ ھندەک جامێر (ژ بەر کو جانک د ناڤا وان دا تونەیە) ئێدی تو تشتەکی پێ مژوول ببن نەھشتبوون. لۆما وان کەسێن د ناڤا چل سالان دا سلاڤ ژی نە ددانە ھەڤ، ژ نوو دا ھاتن با ھەڤ و چەند کەسێن خوەدی باوەری کو ھێ ل وەلات مابوون ژی دانە دوو خوە و گۆتن: ئەم ژ نوو دا ئالتارناتیفا وەلاتێ خوە ل ھەمبەر داگیرکەرانین. ھەلبەت ئەڤ ژی باشە و ھەقێ وانە.

لێ وەرن لێ بنێرن، زارۆکێن کەسی ژ وان نە لگەل وان دایە. پرانیا زارۆکێن وان چ ل وەلات و چ ژی ل دەرڤەیی وەلاتی خوەدێ کارێن باش و سەرکەتی نە. زیرەک و ژێھاتینە، لێ بابێ وان، وان ژ تەڤگەرا خوە ب دوور دھێلن. و ل سەر ئاساسێ چەند ریسپیێن کو تەمەنێ وان چەند سالەک مانە، دخوازن کوردستانێ ئازاد بکن(!) تەڤگەران دادمەزرینن. ئەڤ ژی ھەقێ وانە.

لێ دخوازن عادەتێن سالێن 1970-1980 ب کار بینن، ژ بەر کو ب چاندا ئیدەۆلۆژیان مەزن بوونە. لۆما ھەول ددن کو کەسێن نە بلگەل وان دا بن، یان ل گەل وان کار نەکن، سلاڤێن ناڤا وان دا ژی راکەن و رادکەن. (ئەڤە مەسەلەیەکە ب سەرێ خوە ب نڤیسەکێ نایێ نڤیسین)

کەسێن ب تەمەنێ خوە د سەر شێست سالان را بن و بخوازن ژ نوو دا بکەڤن ناڤا تەکۆشینا ئازادیا گەلێ خوە، دڤێت دەستپێکێ زارۆکێن وان ل گەل وان بن.  دڤێت ئابۆریەکا وان یا خورت ھەبیت. دڤێت مەدیایا وان یا ب ھێز ھەبیت. ھەگەر ئەڤە نەبیت ھاتنا با ھەڤ وێ ببە خوارنا ب ھەڤرە. ئەو دێ بیتە گەر و سەیران و دێ تەنێ بیتە زییارەتا سەر قەبران دا کو د داویا تەمەنێ خوە دا ژ بۆ خوە پیچەکێ بژین. ژ بەر کو ئێدی ب پۆر سپیان تەڤگەر چێنابە و نە مەعقوولە ژی.

تەکۆشینا ئازادیا وەلاتەکی ل سەر ملێن جوانێن وی وەلاتی دهێتە مەشاندن و مخابن نھا حیزب و تەڤگەرێن باکورێ کوردستانێ یێن ژ سال مەزنان ئانکو پۆر سپیان پێک دهێت ژی دخوازن بێ جوانان شۆرەشێ بکن(!)

ئەم ئێدی ھەڤدو فێم ناکەین ژ بەر کو دڤێت ئەم بزانین ب کەسێن تەمەنێ وان د سەر 60 سالیێ دا سیاسەت ناهێت کرن. سیاسەت ل باکورێ کوردستانێ ب زیارەتا ل سەر قەبران و ب ھەڤدیتنێن رەستوران و خوارنێن خوەش ناهێت کرن. یا ھەری گرینگ بێی گەنجان تو تەڤگەر ب سەر ناکەڤن و ھوون ساخ و سەلامەت بن…

پوستێن ھەمان بەش

کێ «ئوگور مومجوو» کو گۆتبوو دێ په‌یوه‌ندیێن «ئۆجالان و میتێ» ئاشکرا که‌م، کوشت؟

ugur mumca-darkamazi-arami