نەشێنە کەری دبەزنە کورتانی!

نەشێنە کەری دبەزنە کورتانی!

نەیارتی و بەربەرییا ناڤخوەیی وەک پەنچەشێرێ کەتیە مەژی و بەدەنا ھندەک کوردان. پەنچەشێرا بێ دەرمان بێتفاقی و نەیارتییا ناڤخوەیییە. داگیرکەرێن مە ڤێ یەکێ باش ب کار تینن و ب سەد سالانە کوردان ژ ھەڤ را دکن دژمن.

دل دخواست کو نەیارتی د ناڤ کوردان دا نەبایە و ب تفاق و یەکیتییەک نەتەوی کورد ژی وەک خەلکێ ببن خوەدان دەولەت و ئازاد بژین. لێ مخابن دەستێ دژمن ژ ناڤ مە دەرناکەڤە، گەھ ب ناڤێ ئیسلامێ و گەھ ژی ب ناڤێ چەپیتییێ مە ژ ھەڤ تار و مار دکن. کوردان جان و مالێ خوە، ھەر تشتێ خوە د بەر پەکەکێ دا فەدا کر.

ژ بۆ ئازادییا ملەتێ کورد و کوردستانەک سەربخوە تو فەداکاری نەما کو نەکر. لێ مخابن ئەنجام و فرێزا شەرێ 40 سالی ل بەر چاڤایە. ھوون دەڤ ژ گوند و باژاران بەردن، ھەتا نھا کۆخکەک مریشکان ژی نەھات ئازاد کرن و ژ بۆ ئیدۆلۆژییێن بیانی، ژ بۆ خەیالێن بێ ئارمانج کەد و خوینا سەد ھەزار کوردان بێی سەبەب ھات رژاندن. دەست ژ ئارمانجا کوردستانەک سەربخوە ھات بەردان، باکورێ کوردستانێ کاڤل و وێران بوو، کورد دەربەدەر بوون، ئاسیمیلە بوون، ژ ھزرا نەتەوی دوور کەتن و کێفا نەیاران ل مە ھات. ھەم ژی ب دەستێ کەمالیستێن ترک و ب کەد و خوینا کوردێن رەبەن.

ئیرۆ بەشەک ژ وەلاتێ مە نیڤ ئازادە، ئەو ژی باشوورە. نیڤ ئازادییا کوردان ژی بوویە کەلەم و ستری و کەتیە چاڤێ ھندەک خێرنەخوازان. نەیارتییا داگیرکەرێن کوردستانێ تێ فێھمکرن. لێ گاڤا بەشەک ژ کوردان پەدەکێ و بارزانییان بکن بەهانە و دژمناتییا دەستکەفتییێن باشوورێ کوردستانێ بکن، ئەڤ نە خێرە و نایێ داقورتاندن. ھەروەھا ھەگەر ھندەک رابن و پەیەدێ بکن بەهانە و دژمناتییا دەستکەفتییێن رۆژئاڤایێ کوردستانێ بکن، ئەڤ ژی نە ل خێرا مەیە و دڤێت نەیێ داقورتاندن. پرسگرێک و ناکۆکییێن پارتیتییێ جودا نە و نەیارتییا دەستکەفتییێن ئازادی و سەرخوەبوونێ جودایە.

دژمناتی و نەیارتییا پەدەکێ و بارزانییان ژ بۆ پەکەکێ و ئالیگرێن وێ بوویە خالەک سەرەکی.

حەیف! پەکەکا کو بنێ وێ کورد و پرانییا سەرکێشێن وێ ترکێن عەلەوی و کەمالیستن، نەیارتییا پەدەکێ و بارزانییان کرنە خالەک ژ خالێن خوە و د کەسایەتییا پەدەکێ و بارزانییان دا نەیارتییا نەتەو-دەولەتێ و کوردستانەک سەربخوە دکن. بێگومان پەدەکە و بارزانی ژ بۆ وان بەهانەنە. ئارمانجا بنگەھین نەیارتییا نەتەو-دەولەتێ و سەرخوەبوونا کوردستانێیە. ئێریشا سەر پەدەکێ و بارزانییان ئێریشا سەر نرخێن نەتەوییە. ژ خوە د چاپەمەنی و داخویانییێن رێڤەبرێن پەکەکێ دا ھەر تشت ب زەلالی و ئاشکەرا تێن گۆتن و نڤیساندن.

ھەلبەت سەرۆک و رێڤەبرێن پەکەکێ باش زانن پەدەکە چیە و بارزانی خزمەتا چ دکن. باش زانن کو بارزانییان ژ بۆ کوردستانەک سەربخوە شەر کریە و دکن. سەدەما ئێریش و نەیارتییا وان ئەڤە. ژ بۆ کو راستییا بارزانییان ڤەشێرن، ئیجار ب بەهانە و دەک و دۆلابێن دن دخوازن بارزانییان د چاڤێ ئالیگرێن خوە دا رەش بکن. ئەو ئالیگرێن کو بەلکی قەت وەشانێن پەدەکێ ناشۆپینن و دیرۆکا بارزانییان نەخواندنە و ناخوینن، ب دەرەوێن سەرۆک و رێڤەبەرێن خوە دخاپن و وەک کۆما پەزی ددن دووڤ گۆتنێن وان.

ژ خوە ئەو کەسێن کو پانکارتێن ل دژی پەدەکێ و بارزانییان ھلدگرن و بارزانییان تۆھمەتبار دکن، پرانییا وان کوردێن نەخویندەوارن و یێن خویندەوار ژی پرانییا وان عەلەوی و کەمالیستێن چەپێن کو ل بەر دەستێ «یالچن کوچوک» مەزن بوونە. یالچن کوچوک بێی سەبەب نەدگۆت “من کوردێن باکور کرن دژمنێ بارزانییان “. وەلحاسلێ کەلام، باپیرێن مە بێی سەبەب نەگۆتنە “فلانکەس نەشێتە کەری، دبەزیتە کورتانی”. ئەوێن کو باکورێ کوردستانێ وێران کرنە و د 40 سالی دا بھوستەک ئاخ ئازاد نەکرنە، رەڤیانە باشوور، بەشەک ژ خاکا باشوورێ کوردستانێ داگیر کرنە، ب سەرۆکاتی و رێڤەبەرییا کەمالیستێن ترک و ل سەر پشتا گەریڵایێن کورد دژمناتییا دەستکەفتییێن باشوورێ کوردستانێ دکن. یانی، مخابن ھەڤال-لەرێن مە نەشێنە دەولەتا ترک، دبەزنە کوردێن رەبەن.

پوستێن ھەمان بەش

کێ «ئوگور مومجوو» کو گۆتبوو دێ په‌یوه‌ندیێن «ئۆجالان و میتێ» ئاشکرا که‌م، کوشت؟

ugur mumca-darkamazi-arami