كۆمیتا رێڤه‌به‌ر یا په‌كه‌كێ، ئیرۆ داخویانییه‌ك پڕعه‌جێب دا، وێ گۆ: «مه ده‌وله‌تا ترك گێژ كرییه ئه‌و نكاره خوه بلڤینه»!، هه‌ما هنه‌كی مابوو بلندبوونا شه‌كرا ئاردۆگان ژی وه‌كه ده‌ستكه‌فتییه‌ك گرینگ ئیلان بكه!.
كۆمیته‌یا رێڤه‌به‌ر یا په‌كه‌كێ ئیرۆ گۆت: «ده‌وله‌تا ترك ب ده‌ربێن گه‌ریلایان گێژ بوویه، ئه‌و نكاره خوه بلڤینه»، گه‌لۆ ئه‌م دپرسن ب راستی ژی په‌كه‌كێ كی گێژ كر، هه‌رێما كوردستانێ یان داگیركه‌ر؟ هه‌گه‌ر ده‌ستكه‌فتی پشتی 43 سالێن شه‌ر گێژبوونا ده‌وله‌تێ به، قه‌ی چ قاس سال و زه‌مان لازم هه‌تا كو ده‌وله‌ت تێ نیڤ رح كرن!.
پێگه‌ها «داركا مازی» ل سالا 2020 زانیاریێن هه‌ری حه‌ساس ده‌ربارێ نه‌خشه‌رێیا «په‌كه‌كێ و تركیێ» پارڤه‌كر، ته‌ڤی كو ئه‌م ل وێ ده‌مێ ب میت هاتن سووچبار كرن، لێ به‌لێ تشتا كو مه ل وێ ده‌مێ گۆتی چێبوو، په‌كه‌كێ لوتكه‌یێن ستراته‌جی و چیایێن به‌هدینان یێك ب یێك ل سه‌ر سێنیێن زێر دانه تركان، «خامتیر، زنارا کێستە و كوره‌ژار» میناكێن زه‌لالن، ئانها په‌كه‌كێ مه‌تینا خستییه نوبه‌تێ، ب ئحتیماله‌ك پڕ مه‌زن قۆناخا پێش مه ئه‌و ژی ب ده‌ردێ زنارا کێستە بچه.
هه‌ر كو دچه په‌كه‌كه پێتر تركێ داگیركه‌ر كێشی كووراهییا خاكا هه‌رێما كوردستانێ دكه، ب كورتاسی هه‌ر ده‌را په‌كه‌كه لێ به، ئارتێشا ترك ل وێ ده‌رێ یه، به‌رخوه‌دانا په‌كه‌كه قالا وێ دكه، 5 سالان به‌رێ ل خه‌تا سینۆر بوو، نها ل گوند و هاوردورا باژارنه، هه‌گه‌ر ره‌وش ووسا به‌رده‌وام به، د ناڤا سێ سالان ده ترك وێ ژ سەدی 50 یا خاکا باشوور داگیر بکە، ل وێ چاخێ یێ كو نكاره بلڤه وێ گه‌لێ هه‌رێما كوردستانێ به، نه ده‌وله‌تا ترك.
په‌كه‌كه هه‌ول دده خزمه‌تا خوه یا ژێر ب ژێر بۆ تركیێ ب رییا مه‌دیایێ بپه‌چنه، هه‌رۆژ ب نووچه‌یێن ده‌ره‌و یێن وه‌كه: «مه ئه‌وقاس عه‌سكه‌ر جه‌زا كرنه، مه ئه‌وقاس هه‌لیكۆپته‌ر ده‌رب دانه، ئه‌وقاس به‌رخودان گه‌ش كرییه و داگیركه‌ر تێكبرییه» دخوازه گه‌ل بخاپینه و هه‌ول دده بازدانا خوه و ب ده‌سڤه‌به‌ردانا لوتكه‌یێن ستراته‌جی یێن كوردستانێ ژ بۆی عه‌سكه‌ری ترك ڤه‌شێره.
چاپه‌مه‌نییا په‌كه‌كێ ئیرۆ ژ زارێ ئه‌ندامه‌كی كۆمیته‌یا ناڤه‌ندی یا رێخستنێ گۆتییه: «ده‌وله‌تا ترك ب ده‌ربێن گه‌ریلایان گێژبوویه، نكاره خوه بلڤینه»!! ئه‌م دپرسن قه‌ی گێژبوونا ده‌وله‌تێ و ئه‌نسۆلینا ئاردۆگان دێ خاكا كو په‌كه‌كێ دایه ده‌ستێ ده‌وله‌تا ترك ڤه‌گه‌رینه؟
هه‌ر كورده‌ك دزانه په‌كه‌كێ د شه‌رێ خه‌نده‌كان یێ 2015 ده چ قاس هەرێمێن باكورێ كوردستانێ وێران كرن، نوكه عه‌ینی ته‌جروبه ل هه‌رێما كوردستانێ دكه، گوندێن به‌هدینان یێ دبنه قادا شه‌ر، ژ شێنی و ژیانێ ڤالا دبن، قه‌ره‌قوول و نوقته‌یێن تركان لێ تێن چێكرن، لۆما پێویسته گه‌لێ هه‌رێما كوردستانێ ڤێ راستیێ ببینه و ب ده‌ره‌وێن په‌كه‌كێ نه‌یێ خاپاندن، دوهی خامتیر و زنارا كێسته و ئیرۆ كوره‌ژار چوون، سبه مه‌تینا، به‌رخوه‌دانا په‌كه‌كه دكه به‌رخوه‌دانا خه‌ندقاندن و دۆرپێچا هه‌رێما كوردستانێ یه، هه‌گه‌ر ره‌وش ووسا بدۆمه و سینۆره‌ك ژ بۆی په‌كه‌كێ نه‌یێ دانین، د سالێن پێش مه ده وێ تەڤ باشوورێ کوردستانێ ژی وەکە ناڤچەیێن سینۆری و باکورێ کوردستانێ بخە دەست ده‌وله‌تا ترك ئینیته سه‌ر سه‌رێ م و ل وێ چاخێ یێ كو نكاره خوه بلڤینه وێ کوردێن بەلەنگاز بن، نه ده‌وله‌تا تركا داگرکەر!!.
