دارا بلەک
ل ترکیا و باکورێ کوردستانێ ھندەک بابەت دکەڤن سەرێ رۆژەڤا سیاسی و تێنە گۆتوبێژ کرن. پرانیا جاران مرۆڤ دبینە کو، ھەمان بابەت د مەدیایا بەشێن دن یێن کوردستانێ دا ژی بەرفرەھی جھ دگرە . لێ ئەگەر مرۆڤ باش بەرێ خوە بدەت بابەتێن کو دکەڤن رۆژەڤێ و تێن گۆتوبێژ کرن، گەلەک گرینگن و تایبەتی پرسا کورد ڤە گرێدایینە.
د ڤێ قۆناغا کو ل ترکیا و باکورێ کوردستانێ بەحسا ھلبژارتنا تێ کرن، دو بابەتێن ھەڤراگرێدایی د رۆژەڤێ دا نە. یەک ژێ “پرسا کورد”ە،یا دن ژی “پێڤاژۆیا چارەسەریێ”یە. ئەڤ ھەردو بابەت د بنگەھێ خوە دا یەکن و گەلەک ب زانابوون د ناڤا چارچۆڤەیەک تایبەت دا تێنە گۆتوبێژ کرن.
ژ بەری ھەر تشتەکێ ئەوێن د ڤێ قۆناغا ھلبژارتنان دا بەحسا پرسا کورد دکن، ئەڤە دەھان سالن ھەردەما کو ھلبژارتن چێدبن ڤێ پرسێ ل گۆرا کو ئەو چارچۆڤەکێ ژ بۆ داتینن دهێت گۆتوبێژ کرن. دەما ناڤ ل “پرسا کورد” نەیێ کرن، یانی ئاوایێ چارەسەریا ڤێ پرسێ ڤەکری نەیێ گۆتن، چ واتەیا بەحسکرنا پرسا کوردی تونەیە.
ل سەر ڤێ پرسێ رۆژا جومھوریەتا ترکیا ھاتیە ئاڤاکرن ھەتا نھا گۆتوبێژ ھەنە و ھەر ئالیەک ل گۆرا خوە ڤێ پرسێ تینە رۆژەڤێ. لێ دەما کورد سەرێ خوە ھلددن و ژ بۆ خوە داخوازا مافێن نەتەوی دکن، ئەڤ ئالیێن ترک ھەموو دبن یەک دەنگ و ل دژێ کوردا ھەلوەستێن ھەڤبەش داتینن. یانی دبن پارێزڤانێ کۆمارا ل سەر ئینکار و ئیمھاکرنا کوردا ھاتیە ئاڤاکرن و پارێزڤانیێ ل ئایدۆلۆژیا فەرمی یا ترکیا دکن.
د دیرۆکێ دا، گەرەک باش بێ زانین، بۆرجۆوازیا ترکا کورد خاپاندینە، چەپێن ترکێن کورد خاپاندنە، لیبەرالێن ترکێن کورد خاپاندنە، بازرگانێن ترکێن کورد خاپاندنە، ئۆلدارێن ترکێن کورد خاپاندنە، کارکەرێن ترکێن کورد خاپاندنە، جوانێن ترکێن کورد خاپاندنە، ژنێن ترکێن کورد خاپاندنە. یانی دیرۆکا پێوەندیێن پارتی و ئالیێن کورد و ترکا دیرۆکا خاپاندنێیە.
دەما ئەڤ یەک بێ گۆتن نە تەنێ ئالیێن ترک تاوانبارن، ئەو ل گۆرا خوە وەلاتێ خوە، یەکتیا ئاخا کو دەولەتا وان ل سەر دەستھلاتە دپارێزن، ئەو دزانن چ دکن و ھەمی د چقرچۆڤەیەک دیزاینکری دا پرسا کورد گۆتوبێژ دکن.
لێ گەلۆ ژ بۆ چ ئالیێن کورد تێنە خاپاندن؟ پێدڤیە ل سەر ڤێ یەکێ بێ سەکناندن و د ڤێ دەربارێ دا گۆتوبێژێن بەرفرەھ بێنە کرن، جڤاکزان ڤێ پرسێ بشۆپینن و ل سەر ڤێ لێکۆلین بێنە کرن. داکو سەدەمێ ڤێ برینا کوردا یا کو دەرمان نابە بهێت زانین. ھەتا پارتی، رێخستن، دەزگەھ و ئالیێن ل سەر ناڤێ کوردا سیاسەتێ دکن داخوازیێن خوە ژ بۆ پرسا کورد ڤەکری نەبێژن و د سیاسەتا خوە دا نە زەلالبن، ھەتا ل سەر خەتەک نەتەوی کوردستانی سیاسەتێ نەکن، ھەتا بەرژەوەندیێن نەتەوی ل سەر ھەر تشتەکیرا نەگرن دێ ھەر هێنە خاپاندن.
پرسا کو جارەکا دن د رۆژەڤێ دایە “پێڤاژۆیا چارەسەریێ”یە. لێ چارەسەریا چیە نایێ زانین و نە زەلالە. ژ بەری نھا ئەڤ پێڤاژۆ ھاتە ژیاندن، ھەرکەسەک شاھدە کو تەڤگەرا ئازادخوازا کورد گەلەک زیانەک مەزن ژێ دیت. “پێڤاژۆیا چارەسەر”یێ چارەسەریا ناڤبەرا دەولەتێ و پەکەکێ دایە. نە چارەسەریا پرسا کوردە. چ پەیوەندیا ڤێ یەکێ ب دەستخستنا مافێن رەوایێن کوردان نینە.
باوەرم ل شوونا مەدیایا کوردی خوە ب ڤان رۆژەڤێن دەستچێکری ڤە مژوول بکە، ھەولبدە راستیا پرسا کورد و ئاوایێن چارەسەریێ گۆتوبێژ بکە، دێ پێتر خزمەتا تەڤگەرا ئازادیا کوردستانێ بکە.
