پشتی کوشتنا لەشکەرەکی ترکیێ ل نێزیکی دەریێ سینۆری یێ سەرزێرێ یێ ناڤبەرا باشوور و باکورێ کوردستانێ، ترکیێ ئەو دەری ل بەر وەلاتیێن هەردو ئالیان گرت.
چاڤکانیەکی ژ دەریێ سینۆری یێ سەرزێرێ ژ كوردستان 24ێ رە راگهاند، ئیرۆ د دەمژمێر 12:00ێ دە، ترکیێ دەریێ سەرزێرێ گرت و هەتا نها ژی گرتی مایە.
هەروها ئەشکەرە کر، ئەڤ بریارا ترکیێ پشتی وێ یەکێ هات کو لەشکەرەکی ترکیێ ل نێزیکی دەریێ سینۆری کەتیە کەمینەکە چەکدارێن په‌كه‌كێ و هاتیە کوشتن.
چەند کەسێن کو ب مەبەستا سەردانا کەسوکارێن خوە یێن ل هێلا باکورێ کوردستانێ بەرێ خوە دانە دەریێ سینۆری، ژ كوردستان 24ێ رە راگهاندن کو ژ بەر گرتنا دەریێ سینۆری ل ئالیێ ترکیێ، رێ ل چوونا وان نەهاتیە دایین.
دەریێ سینۆری یێ سەرزێرێ دکەڤە سینۆرێ ناحیا کانی ماسێ یا سەر ب ناڤچەیا ئامێدی و ژ بەر کو نیشتەجهێن هەردو ئالیێن سینۆری یێن باکور و باشوورێ کوردستانێ کەسوکارێن هەڤن، رۆژانە گەلەک وەلاتیێن ل ناڤچەیێ ب رێیا وی دەریێ سینۆری ڤە سەردانا هەڤ دکن.
ئەڤنە جارا ئەولە کو چەکدارێن په‌كه‌كێ ئێریشی دەریێ سینۆری و جهێن دەردۆرا وێ دکن. رۆژا 8ێ جۆتمەها 2020ێ، بەرپرسێ ئاساییشا دەریێ سینۆری یێ سەرزێرێ غازی سالح ئالیخان ل گوندەکی سینۆری یێ ناڤچەیا ئامێدیێ ژ ئالیێ چەکدارێن په‌كه‌كێ ڤە تەقە لێ هات کرن و بەریا بگهینن نەخوەشخانەیێ، جانێ خوە ژ دەست دا.
