مەسەلا پارتیا عەڤدللا (پەکەکێ)یا “ئەم خوەدیێ رۆژئاڤا نە” چیرۆکا رێوییێ کو راستی کەسەک ل کەرێ خوە سوار بوویە ھات تێنە بیرا من دەما گۆتی: ما تو لگەل خوە دا من ل “کەرێ خوە” سوار ناکی.؟  و دەما کو خوەدیێ کەرێ ئەو ل پشت خوە ل کەری سوار کری، رێوی پشتی دەمەکێ گۆت: “کەرێ تە” چقاس خورتە… پاشێ پشتی دەمژمەرکا دن دیسا گۆتێ: ب خوەدێ “کەرێ مە” گەلەکێ خورتە… پشتی کو دلنزمی و دلنەرمیا خوەدیێ کەرێ دیتی، وی ب لنگێ خوە خوەدیێ کەری پالدا و گۆت: دێ وەرە خوارێ ل سەر “کەرێ من”.  و ئەڤە ژی چیرۆکا پارتیا عەڤدللا (پەکەکێ)یە لگەل کوردێن سووری، مال و ملکی ب دارێ زۆرێ ژ وان دستینە و زارۆکێن  وان درەڤینە لێ ھەر سست و نەرم و خەمسارن، لەوما ئێدی دبێژن ئەم خوەدیێ ڤێ خاکێ نە، تەڤی کو جھێ خوە ل کوردستانا ترکیێ چۆل کریە و ناچن ل ور کۆزکا مریشکەکێ ژی رزگار بکن.

مخابن بێدەنگیا کوردان بوو سەدەما کو پارتیا عەڤدللا (پەکەکە) دەست ب وێ باوەریێ بکە کو ئەو ژ پارتیێن دن جودا و تایبەتن و ئەو پارتیا رزگارکەرە (پارتیا زارۆکێن رەڤاندی و ب خوینا وان بھێز بوویە). لێ – بێیی راڤەکرنەکێ، کو دایک و بابێن وان زارۆکان ژ کارووکریارێن پەکەکێ رازی بوون ب رەڤاندنا زارۆکێن وان یان ژی ژ دەستدرێژی و زکرەشیا پەکەکێ و چاڤسۆریا کو ژ کوردان دھلینە. گەلۆ پەکەکە ھەستێن ڤان کەچ و خۆرتان ژ دیمەنێن شەری ددە دیار کرن کو د خەیالێن وان دا ئاسێ مایە.

دیمەنێن دوبارەیێن رەڤاندنا زارۆکان ل سەر دەستێ پەکەکێ پێک تێ و ژ ئالیێ کوردان ڤە تێتە تەماشەکرن، و ئەڤ بویەرێن وسا چەوت بوونە تشتێن ئاسایی، ل شوونا رەدکرن و شەرمەزارکرنا وان، ئێدی کورد رازیبوونا خوە بۆ پەکەکێ ددن خویا کرن و تاوانێن پەکەکێ قەبوول دکن. ئەڤ ھەمی سەدەم ئەشکەرنە کو پارتیا عەڤدللا (پەکەکە) خوەدی تێگھشتنا گرینگ یا خوە بە و درەو و ڤران بکە ل سەر مەزنکرنا دەستکەفتیێن خوە.

دەربارێ رەڤاندنا زارۆکان، رەوشەنبیر و نڤیسکاران ژی  ئەڤ یەک پاشگوھکریە و نە ئەوقاس جھێ دلێشیێ یە، ئەڤ دیاردە ژ بۆ وان بوویە رەوشەک ئاسان و ئاسایی و ل بەر چاڤێن وان دەرباس دبە، بێیی کو پچەکێ پۆشمان ببن و هەست ب بەرپرسیاریێ بکن. چ زیانەک د ئەشکەراکرنا چارەنڤیسا زارۆکان دا نینە، لێ پرانیا وان ھەول ددن کو زەلال بکن پەکەکە تەڤی کو زارۆکان ددە کوشتن لێ وەلاتپارێزە!

ماهر حەسەن