ئاپۆینۆ و ئالیگرێن ئاپۆییان، ژ کەرەما خوە ڤێ نڤیسێ باش باش بخوینن. باھوەر بکن، یا من لگەل وە دا نە پەڤچوونە، ئەز دخوازم ھوون فێر ببن، ئەز ژ نەچاری ئالیکاریا وە دکم. نھا ئەگەر وە خوە ب خوە ھەڤدو بکوژتبا خەم نەدکر، لێ ھوون لگەل خوە دا مە ھەمیان ژی دکوژن!
د ڤان چەند مەھێن داویێ دا ئەم ل پارلەمەنتۆیا ترکێن زالم و ڤێرە و وێرا هە دبینن کو پارلامەنتەرێن ھەدەپێ ب شێور، دەست ب خەبەردانا کوردی کرنە. ئەڤ دیسا چ مەسەلەیە گەلۆ؟
ئاپۆینۆ کا بنێرن ئەز دێ چ ببێژم:
ل ھەر دەرێ دنیایێ شەرت و مەرجێن شەر و پەڤچوون و لبەرخوەدانا نەتەوی سیاسی، دیپلۆماسی، عەسکەری، ئابۆری و کولتورییە.
د ھن ھێمانێن نەتەوی دا ھن داخواز کارن ژ ھەڤ گوھەرتیبن، لێ پرەنسیپ ھەر وەک خوە نە، ب تەنێ جھ تێن گوھەرتن. ئیجار ژ ڤێ سرتێ گاڤا مە ل سەرسەدێ نێری، ب ھێسانی ئەم دێ ببینن کو دبە کوردێن باکورێ وەلات یەکسەر نکاربن سەرخوەبوونێ، لێ کاربن ئۆتۆنۆمیێ ب دەست بخن. د ڤێ دەربارێ دا ژ بۆ کو پەکەکە و ھەدەپە ئۆتۆنۆمیەکا ئیداری-کولتوری داخواز کرنە رۆناکبیر و کوردپەروەران ئێریشی سەر وان نە کرنە؛ ئێریش ھەموو ل سەر کو پەکەکە و ھەدەپە بێ پرەنسیپ ب کار و بارێ نەتەوەیی رابوونە و ھەر تشت سەر و بنی ھەڤ کرنە. ئەڤ یەک.
دودو: سیاسەت ل سەر بنگەھێ پرەنسیپان دمەشە. و ھەر چ پرەنسیپن ژی ژ بۆ کو ھەر کەس کاربە بخوینە ب گۆتنێن ھەری مەزن تێن نڤیساندن. وەک نموونە:
“ئەز دەولەتەکا کوردی دخوازم. ئەز ئۆتۆنۆمیا کوردان دخوازم. ئەز دەمۆکراتیک جومھووریەتا ترکان دخوازم…” و ھتد.
د ھەرسێ پرەنسیپان دا مرۆڤ وەک کورد دڤێت یەکێ سەرەکی ببینە و ژ بۆ خوە ھلبژێرە، دا رەنگ و دەنگێ لبەرخوەدان و پەڤچوونا خوە ژی ل گۆری وێ فەسل بکە و بمەشینە.
ھەدەپە تو چ دخوازی؟
ھەگەر تو ژ بۆ کوردان ئۆتۆنۆمیەکا کولتوری دخوازی، سەر چاڤان ئەز ژی لگەل تە دا مە. لێ د ڤێ دەربارێ دا دڤێت تو خوەدی پرەنسیپ بی. نە کو چەند رۆژەکان ب کوردی بپەیڤی، کوردان ل دۆرا خوە بجڤینی و دیسا ب ترکی دۆلابا خوە بگەرینی.
دڤێت تو ھەما نھا ڤێ بکی: ب سەد ھەزاران کوردان ل باژارێن گەرمیان و زۆزانێن کوردستانێ ب کوردی دەربێخی کۆلانان و ببێژی،
“یان زمان و یان نەمان، بژی بژی کوردستان!” و بەردەوام بی. ب تەلاق هەموو ملەتێ کورد، و ژ بلی مسلمانان، دێ دنیا ھەموو ببە ھەڤالێ وە، ھوونێ ژ گرتیگەھ و زندانان بێن بەردان و زمانێ کوردی ژی دێ بیتە زمانێ فەرمی یێ دەولەتا ترکان، و تو ساخ!
دێ بکن! دێ گدی! دێ ھا! و ئەز ژی دێ بمە خولامێ وە! و ھەتا دێ بمە چانتەچییێ سەرۆکا وە پەروین خانمێ ژی! لێ ھوونێ نەکن، نەکن دبێژم ژ بەر کو ھوون پیبەر و بەردۆشەکێن زالمێن ترکانە، ھوون ژ بۆ کو کوردان بخاپینن، دۆزا کورد ڤەمرینن و ھەر کەسی بکن ترک ھەنە، ئەوقاس.
لالەس قاسۆ
