ب تایبەتی ژی مەدیایا ملەتەکێ وەک مە کوردان، ب هەبوونا گەلەک دژمن و خاینان، ب ئاوایەکێ خوەزایی پێدڤییە گەلەک بهێزتر بە. دەما کو ژ ھەر ئالی ڤە ئێریشەک ب ڤی رەنگی ل سەر ھەرێما کوردستانێ تێ کرن، ھەتا ژ ئالیێ ناڤخوەیی ڤە ژی، پیدڤییە د سەری دا ل دژی دژمنان راگەهاندن رۆلێ خوە بگێریت. یانی پیدڤییە ل کوردستانێ خەباتکارێن مەدیایێ ژ بۆ ئاژانسان نووچەیان بەرھەڤ نەکەن و چەند بوویەرێن پۆپولیست دەرنەخن پێش. خەباتکارێن راگھاندنێ یێن ل ھەرێما کوردستانێ ل ھەمبەری ئێریشێن ل دژی وەلاتێ مە وەکە فیدایی کار بکەن و بەرسڤێ بدن. مخابن د ڤی واری دا کێماسیێن گەلەک مەزن ھەنە.
چاپەمەنیا کوردستانێ ژ ئالیێ خوەیێ ھزری، خەتا سیاسی، ئەرکێن خوە، یا کو پێدڤییە بپارێزە دا لاوازە. بەلێ، ئەم نەھەقیێ نەکن، ل کوردستانێ خەباتکارییا مەدیایێ نە ھێسانە و د مەدیایێ دا ناڤێن پر ھێژا و وەلاتپارێزێن رەسەن ژی ھەنە. لێ ھەستێن پاک ھەر دەم تێرێ ناکن. پێویستە کو خوە پەروەردە بکە، ھشیار بە، پلان بکە، ستراتەژیەک دیار بکە و د سەری دا ژی نەکەڤە ناڤا خەفکان.
“یێ لایەنگر نە دێ وندا بە”
یەک ژ شاشییێن فکری و سیاسی کو مەدیایا کوردستانێ تووشبوویێ ئەوە کو دبێژە “ئەم مەدیایەک بێ لایەنین، ئەم ژ بۆ ھەر کەسێ د ھەمان دووراتیێ دا نە”. بنیاتێ “بێ لایەنیێ” تەنێ د مژارێن جڤاکی دا واتادارە. د مژارێن سیاسی دا بێ لایەنی نینە. د راستیێ دا، یێ بێ لایەن بە دێ وندا بە.
ل کوردستانێ خەباتکارێن رووداوێ پێشەنگێن ڤێ خەتێ نە. دەما کو رووداو ئیدیعا دکە کو دەنگێ ھەر کەسییە، جارنا ژ بلی کوردان د بیت دەنگێ ھەر کەسی. د راستیێ دا دەم ب دەم د رایا گشتی یا جیھانێ دا کوردان رەش دکە.
د بەشا ئینگیلیزی و ترکی یا رووداوێ دا د ڤی واری دا جودابوونەکا جدی ھەیە. بەشا ئینگلیزی ب بەردەوامی ب بوویەرێن نەرینی یێن ل کوردستانێ ڤە مژوول دبە. کەسێ کو رووپەلا ئینگلیزی یا رووداوێ بشۆپینە، دێ وسا بفکرە کو کوردستان تەنێ جھێ کوشتنا ژنان و جنایەتانە. رووداو کو دکاریت ببە روویێ ڤەبوونا ھەرێما کوردستانێ ژ بۆ جیھانێ و دکارە کوردان ب ئاوایەکی ھەڤسەنگ نیشانی جیھانێ بدە، لێ مخابن بەرۆڤاژی ڤێ یەکێ دکە.
بەشێ رووداوێ یێ ترکی، مخابن قاسی کو بوویە دەنگێ دەولەتا ترک، رەجەب تەییب ئەردۆگان، پەکەکێ، ھەدەپێ و هتد… نکاریە ببە دەنگێ پێشمەرگە و دەنگێ ھەرێما کوردستانێ. یا بالکێش ئەوە کو رووداو ھەر رۆژ ژ ئالیێ پەکەکێ و ھەدەپێ ڤە ب سیخورتیێ دهێت تەوانبار کرن و ئێریش ل سەر وان تێ کرن.
چاوا کو د ئارتێشەکێ دا ھەر سەرەکێ دەنگەک ژێ دەرنەکەڤە و ھەر کەس ل گۆری نێرینا حەرەکەت نەکە، ل راگاھاندنێ دا ژی پێدڤییە ھەر کەس ل گۆری فکر و نێرینێن خوە نووچەیان چێنەکە.ھەر کەس نکارە ل گۆری رایا خوە د مەدیایەکێ دا تەڤبگەرە. رووداو یان ژی مەدیایەکا دن جیاوازی نینە، لێ پێدڤییە کارمەندێن وێ د سەر ھەموو تشتی را ھەبوونا ھەرێما کوردستانێ ئەساس بگرن. ئەم ژ بیر نەکن کو کوردستان مالا مە ھەموویا نە. گەر ئەم نکاربن مالا خوە بپارێزن، نە مەدیا د مینە نە ستودیۆ و نە ژی تشتەک دن. ژ بۆ ڤێ ژی پیدڤییە ئەم ھەموو ببن ئالیگر. پێدڤییە ئەم ھەموو ئالیگرێ پاراستنا ھەرێما کوردستانێ بن.
مەدیایا کوردی کییە؟
مەدیایا کورد و کوردستانی ھەر دەم دکارە دەستھلاتا سیاسی، تاکەکەسێن سییاسی، گەندەلی و بێعەدالەتیێ رەخنە بکە. ئەڤ ژی ئەرکا وایە. لێ ھندەک ھەنە کو ھەر چقاس کورد بن ژی لێ ئەو نە مەدیایا کوردی نە.
ژ بۆ کو ببە مەدیایا کوردی، پێویستە دەستپێکێ مافێن کوردان بپارێزن. مەدیایا کوردی نە ئەون کو ھەر رۆژ ب گۆتنا “سەددام باشتر بوو” بێھێڤیتیێ د ناڤا خەلکێ دا بەلاڤ بکن و پرۆپاگاندایێ بکن و بێژن ئەگەر ئەم کوردستانێ ب بەغدایێ ڤە گرێبدەین و بەغدا پەترۆل و ئابۆرێ ئیدارە بکە ئەم دێ ئارام تر بن. ژ بۆ ڤێ ژی کەسێن کو د مەدیایا جڤاکی دا دژمناتیا کوردستانێ دکن، نکارن وەک مەدیایا کوردی بێن ناڤکرن. ھەروھا مەدیایا پەکەکێ ژی وەک مەدیایا کوردی نایێ دیتن. چاپەمەنیا پەکەکێ کو ھەر رۆژ لەعنەتا ل دەستکەفتیێن باشوورێ کوردستانێ دکە، دیرۆکێ بەرۆڤاژی دکە، ژ حەشدا شەعبی بگرە هەتا دگەهە هەموو جورەیێن مرۆڤان، ژ بۆ تێکبرنا ستاتوویا ھەرێما کوردستانێ، فکر و ھەستێن دژمناھیێ د مەدیایێ دا بەلاڤ دکە.
ژ بەر ڤێ یەکێ، ئەم ژ وان تشتەکێ ھێڤی ناکن. ب ئاوایەکێ خوەزایی دەما کو بەندەواری نەبە پێدڤیی رەخنەیێ ژی نینە. ژ بەر کو ل دژی بەرژەوەندیێن کوردستانێ رادوەستن. ب راستی ژی ئەرکا چاپەمەنیا کوردیا رەسەن ئەوە کو ڤێ راگاھاندنا دژمنکار بسەکنینە.
کورد و کوردستان د بن سیڤانا حکوومەتا ھەرێما کوردستانێ دا ببن خوەدی ستاتویا سییاسی و ناڤدەولەتی. لێ دەولەتێن کۆلۆنیالست و جەحشێن وان ئانکو ئەنیا دژ-کورد ناھێلە ئەڤ دەستکەفتا زێرین باش جێبەجێ ببە. دژمنێن مە گەلەکن. ئەم نە وەکە وەلاتەکێ سکاندیناڤیایێ نە. سینۆرێن مەیێن نەتەوی و سیاسی نەیێن ئەولەهن. ئەم نکارن ل کوردستانێ ڤی مۆدەلا سکاندیناڤیایێ ب کار بینن. پێدڤییە کورد ل دژی هەموو جورێن دژمنێن ناڤخوە و دەرڤەیێن کو ئێریشی ھەبوونا وان دکن تێبکۆشن. ئەڤە نە تەنێ ئەرکێ رێڤەبەریا سیاسی و پێشمەرگەیە. ژ بەر کو مەدیا ھێزا چارەمینە. پێدڤییە مەدیایا نەتەوەیی د بابەتێن گەل و وەلات دا یەک دەنگ و یەک رەنگ بن. ھەر سەرەکێ دەنگەک ژێ نەھێ. راگاھاندن و چاپەمەنییا باشوورێ کوردستانێ د بن سازییێن پارلەمەنتۆیا کوردستانێ دا ژ ئالییێ کۆمیتە یان ژی سازییەکێ ڤە بهێنە چاڤدێریکرن و مەشاندن. د ڤێ سەردەمێ دا چاپەمەنی، ئارتێشا ھەری مەزن و گرینگە.
ئەم ل رۆژھلاتا ناڤین دژین، دۆرا مە ب دژمنان ھاتیە دۆرپێچکرن. ئەڤە نە وەلاتەکێ سکاندیناڤیایێ یە کو مافێن خوەیێن نەتەوی، سینۆرێن سیاسی و ھەبوونا خوە مسۆگەر کر بە. ئەڤ دەر کوردستانە. وەلاتەکە کو بوویە چار پارچە و ھێژ ژی مێتنگەر ل بەندێ نە کو مە بەلاڤ و تونە بکن. پێدڤییە دەمۆکراسیا مە ل گۆری شەرت و مەرجێن وەلاتێ مە و راستییا جڤاکا مە بە.
