ھەرێما کوردستانێ دوھ بوویەرەکە دل ب ئێش ژیان کر، بوویەرا “پەرەخێ” یا کو دەولەتا ترک یا داگیرکەر کۆمکوژیەک تێدا ئەنجام دایی، ھەگەر کێفا کوردەکێ ب ڤێ بوویەرێ ھاتبە، وەکە ئینسان دڤێ ئەو گومانێ ژ خوە ببە، ژ بەر کو ئەڤ ژی وەکە بوویەرێن کوشتنا کوردان یا دل بئێشە و فەرھەنگا کوردان ل سەر ئاشتی و مرۆڤاتیێ ئاڤابوویە. لێ راستییا کو دڤێ وەرە ئیزاح کرن ئەڤە، “پەرەخێ” مژ و دۆمان ل سەر پرسەکە گەوھەری ڤەرەڤاند، پرسا کو “ھەیا عەرەب نەھاتن قەتل کرن ئیراقێ بەرتەکەکە ووسا دژوار نیشانی ترکیێ نەدا”، لۆما ژی دڤێ کورد ڤێ پرسێ ژ خوە بکن، قەی چما خوینا کوردان وسا ئەرزانە ویا عەرەبان پیرۆزە؟
ئارمانجا ڤێ نڤیسێ نە فۆکسا ل سەر نەژادپەرەستیێ یە، لێ ئەمێ ھنەک بوویەرێن کو ل ڤێ داویێ ھاتن ژیان کرن دانین بەر چاڤان و ھوون نرخاندنێ ژ بۆی بکن.
10 سالە کورد ب عەینی بوویەرا “پەرەخێ” تێن قەتلکرن
ھەگەر لڤ و تەڤگەرێن پەکەکێ و ترکیێ یێن 10 سالێن رابووری ل ھەرێما کوردستانێ بینین زمان، ھەری کێم 130 کوردێن سڤیل پرانی ژێ ژ بەھدینانێ ب عەینی کۆمکوژیا پەرەخێ شەھید کەتنە، لێبەلێ چ جاران دەنگ ژ کەسێ نەھات، حکوومەتێن ئیراقێ جارنا ب شەرمۆکی شەھیدکرنا کوردان شەرمەزار دکر و ھەو، ژ ڤێ گرینگتر ئیراقێ ژ پەکەکێ رە نەگۆ تو سەبەبی، ژێرە نەگۆ یێ کو بەهانەیان ددە ترکیە کو سەروەریا وەلات بخە ژێر لنگان ھوونن، ژێرە نەگۆ کوردێن مەیێن ئیراقێ ب سەبەبا وە تێن قەتل کرن.
بوویەرا پەرەخێ و سەیرانا نێروەییان
ل بەھدینانێ ئەڤ 10 سالن سڤیل، وەزیفەدار، گوندی، جۆتکار و سەیرانچی دبن قوربانیێن شەرێ سەختەیێ د ناڤبەرا ترکیێ و پەکەکێ دا، پێشمەرگە ژ ئالیێ پەکەکێ ڤە تێن ئارمانج گرتن، ژ خوە ل ئامێدی، دێرالۆکێ و شێلادزێ دەنگێ تۆپ و بالەفرێن ترکیێ پێتری تەکبیرێن بانگێ خوەدێ تێن بھیستن، لێ نە رایەدارێن ئیراقێ و نەژی ئیراقیان ژ ھەڤرێیێن خوە ترکیایا فاشیست و پەکەکەیا کرێگرتیا دەولەتێن داگیرکەر رە نەگۆت ئەڤ چما ھوون ووسا دکن.
ھەری داوی بوویەرا ل نێزی بامەرنێ پێکھاتی، دەما سەیرانا خەلکێ گوندێ زێوە یێ سەر ب عەشیرا نێروە ھاتیە ھەدەف گرتن و دو زارۆک شەھید کەتین، چما ئیراقێ ھەلوەستێن دژوار نیشان نەدا، قەی ل ڤر دەما کوردەکێ بەلەنگاز بوویەرا “پەرەخێ و یا بامەرنێ” ددە بەرا ھەڤ چ ببێژە؟، قەی ما مەجبوور نامینە بپرسە چما وسا ب بێ رومەتی ل خوینا زارۆکێن کوردان تێ مێزە کرن؟
ئیستیسمارکرنا بوویەرا پەرەخێ
ژ دەما کۆمکوژیا “پەرەخێ” و ھەیا ئیرۆ، ئیراقی شل و مل، ھەر وھا ئۆپۆزسیۆنا کوردستانێ دووڤکێن ئیرانێ یێن ل سلێمانیێ و ئالیگرێن پەکەکێ یێن خوە د بن عەبایێ خەباتکارێن رۆژنامەڤانیێ و چالاکڤانێن سەربخوە دا ڤەشارتی، حکوومەتا کوردستانێ رەخنە دکن و ھەلوەستێن وێ ب شەرمینۆک بناڤ دکن، بەشەک دخوازە بوویەرا پەرەخێ وەکە فەرسەندەکێ ل دژی حکومەتێ ئیستیسمار بکە، بەشەک دن ژی دخوازە ئیراقێ ب خوەدی ھەلوەست و کوردستانێ بێ ھەلوەست نیشان بدە، لێ بەشا سێیەمین ب زانەبوون بوونە دەواما گۆتارا ئیرانێ، حەشدا شەعبی و پەکەکێ.
شۆڤەنیستا بەغدایێ ژبۆی کوردان ھێژ ژی دیار نەبوویە
ب کورتاسی دڤێ کورد خوە نەخاپینە، دڤێ کورد بزانە ھەیا کو “عەرەب نەھاتن کوشتن بەغدا ھەلوەست ل دژی ترکیێ نەگرت”، دڤێ ئەڤ یێک ئاستا ھزرا شۆڤەنیستا بەغدایێ ژ بۆی کوردان دیار بکە، مە نەدی وەختا کورد ب عەینی بوویەرا “پەرەخێ” دھاتن قەتلکرن کۆمیتە ل ئاستا ژوور وسا ب لەزگینی بگھیژن دوھۆکێ، مە نەدی کونسلخانە و ئالا ترکیێ بێن شەوتاندن، گەلۆ ما ئەڤ یێک جوداتییا نێڤبەرا خوینا کوردان ویا عەرەبان دیار ناکە؟!.
ل داویێ ژی ئەم دبێژن دڤێ مەدیا باشوورێ کوردستانێ نەبە دەواما گۆتارا شۆڤەنیزما عەرەب، حەشدا شەعبی و ھەروەھا پەکەکێ، دڤێ ب ھەلوەست و گۆتنێن سیاسەتمەدارێن بەغدایێ ڤە نەیێن خاپاندن و ئەوقاس پێڤە مژوول نەبە، ژ بەرکویێ کو پێویستە وەرە شەرمەزار کرن نە ب تەنێ دەولەتا ترک یا داگیرکەرە بەلکو دووڤکێن وێیێن قەندیلێ ژی نە. یا کو ئیراقێ، ئیرانێ، سوریێ و ترکیێ ژ هەڤ جودا دکە ب تەنێ ناڤە، هەر چا عەینی تشتن و داگیرکەرێن کوردستانێ نە و هەرتم تێهنیێن خوینا پاکا کوردانە.
