سەرۆکۆمارێ ترکیێ رەجەپ تاییپ ئەردۆگان بەحسا ئۆپەراسیۆنەکە نوو یا ئارتێشا وەلاتێ خوە ل دژی رۆژئاڤایێ کوردستانێ و ل باکورێ سووریێ کر.
ئەردۆگان گۆت: «ئەمێ د دەمەکێ نێز دە، ب پاقژکرنا هەرێمێن هەری داوی کو رێخستنا تەرۆرێ ل سووریێ کرنە هێلینا خوە، خەلەکێن وێ کەمبەرا ئەولەهیێ ب هەڤ ڤە گرێ بدن».
رەجەپ تاییپ ئەردۆگان، ئیرۆ د 13مین کۆنفەرانسا بالیۆزان یا ل قەسرا چانکایایێ دە، ب بالیۆزێن هەژمارەک وەلاتان رە هەڤدیتن کر و ل سەر مژارێن رۆژەڤێ ئاخڤی.
ئەردۆگان گۆت: «ئەمێ تێکۆشینا خوە یا ل دژی تەرۆرێ بدۆمینن. بریارا مە یا ئاڤاکرنا خەتەکە ئەولە یا ب کووراهیا 30 کیلۆمەترەیان ل سەر سینۆرێ مەیێ باشوور مایە، هێڤیدارم کو ئەم خەلەکێن ڤێ کەمبەرا ئەولەهیێ ب پاقژکرنا هەرێمێن هەری داوی کو رێخستنا تەرۆرێ ل سووریێ کرنە هێلینا خوە، د دەمەکە نێز دە بکن یەک».
ترکیە د ڤان مەهێن داوی دە گەفێن دەستپێکرنا ئۆپەراسیۆنەکە لەشکەری ل دژی رۆژئاڤایێ کوردستانێ دخوە و رایەدارێن ترکیێ دبێژن، ئۆپەراسیۆنا نوو یا ل باکورێ سووریێ دبە کو د هەر کێلیەکی دە دەست پێ بکە.
