عەڤدللا ب پێنگاڤا 15 شوباتێ فاتیحە ل سەر پێنگاڤا 15 ته‌باخێ خواندیە !

عەڤدللا ب پێنگاڤا 15ێ شوباتێ فاتیحە ل سەر پێنگاڤا 15ێ تاباخێ خواندیە!
  • مەمەت مێردینی

39 سال ب سەر شەرێ چەکداری یێ پەکەکێ کو د 15ێ تەباخا 1984ێ دا دایە دەست پێکرن دەرباس بوون. ب ڤێ چالاکیێ، پەکەکێ یەکەم رێخستنا خوەیا چەکداری ئانکو دامەزراندنا HRK (ھێزێن رزگارییا کوردستانێ) ژی راگەهاند. پەکەکە دا ب ئەنجامدانا سێ چالاکیێن کو بریار بوو ل ئەرووح، شەمزینان و چاتاکێ بهێنە ئەنجامدان، دامەزراندنا HRK راگەهینیت. چالاکیا مەعسووم کۆرکماز یا ل ئەرووحێ ئەنجام دای، دەنگ دا لێ ھەر دو چالاکییێن دی بێ باندۆر بوون.

هەر وەک پەکەکە تەڤ دیرۆکێ بەرەڤاژی دکە و ڤەدبێژە، د ڤێ یەکێ دە ژی راستیان نابێژە، ژ بەر کو د ئەساسێ خوە دە ل سالا 1977ێ دا پەکەکێ دەست ب شەرێ چەکداری کریە.

پەکەکە هەر سال ڤێ رۆژێ ب رۆژەکا هەری پیرۆز و گرینگ ب ناڤ دکە و ب دەهان داخۆیانی و نڤیسانان ل سەر پارڤە دکە و ب ڤێ یەکێ گەلێ کورد ب گشتی و ئالیگرێن خوە دخاپینە.

ئا هەری بالکێش داخویانیا ئیسال یا کەجەکێ بوو کو د سالڤەگەرا 39ێ یا پێنگاڤا 15ێ تەباخێ دا پارڤە کری و تێدا ب دەهان دەرەوێن وەک خوە کرێت رێزکری.

کارەکێ پر زەحمەتە مرۆڤ بکارە تەڤ داخویانیێن پەکەکێ ببەرسڤینە، ژ بەر کو کار و عەمەلێ وان بوویە دەرکرنا داخویانیا و سەختەکرنا بوویەرا و نڤێسینا دەرەوان، بەرسڤدایینا وان پێتڤی دەمەک درێژ و سەبرا ئەیۆب پێغەمبەر هەیە، لێ ئەمێ هەول بدن د ڤێ نڤیسێ دە ب تەنێ ئاخافتنێن کەجەکێ یێن د داخویانیا خوە دا ژ بۆ خاپاندنا کوردان بکارئانی پێشچاڤ بکین.

کەجەکێ راگهاند، “ئەم سۆزا خوە دوبارە دکن کو، ئەمێ تێکۆشینا ئازادیێ یا کو د خەتا پێنگاڤا 15ێ تەباخێ دا دەست پێ کری، بەر ب سەرکەفتنێ ڤە ببن.” ئەڤ 39 سالن پەکەکە ڤێ ئاخافتنێ دوبارە دکە، هەر سال ب رێزکرنا پەیڤان هەول ددە راستیان ڤەشێرە و خوە وەکە ئالیێ سەرکەفتی نیشان بدە، لێ بەلێ هەر کو دچە پێتر رووبروویێ شکەستنێ تێ و پێتر ئاخا کوردستانێ تەسلیمی ترکیێ دکە و پێتر جوانێن کورد ددە کوشتن، ب راستی ژی دەم هاتیە گەلێ کورد ژ پەکەکێ بپرسە، گەلۆ سەرکەفتنا ئەڤ هندە سالە هوون قالا وێ دکن وێ کەنگێ ب چاڤێن خوە ببینین، گەلۆ ما کوردان ئەڤقاس خەبات، ئەڤقاس خوین و ئەڤقاس ئاخ د ڤێ رێیێ دا وەندا کر نەبەسە؟ وێ کەنگێ هوون دەست ژ خوینا جوانێن کورد بەردن، بەسە و ئێدی ئەم ژ دەرەوێن وە باوەر ناکن.

پشتی هاتنا پەکەکێ، نە ب تەنێ پرسگرێکێن باکورێ کوردستانێ ب داوی نەبوون و کوردستانا باکور ئازاد نەبوو، بەلکو پرسگرێکێن هەیی زێدەتر و کوورتر بوون

پەکەکە ب بەردەوامی ڤێ یەکێ دوبارە دکە کو ب پێنگاڤا 15ێ تەباخێ دیرۆکەک نوو ژ بۆی کوردان ئافراند و کەسایەت و ژیانەکە نوو ژی ژ کوردان رە ئافراند، ب ئاوایەکی ڤێ یەکێ ڤەدبێژە کو کەسەک نەخویندوەوار بە و هایداری دیرۆکا کورد و کوردستانێ نەبە وێ وەسا بفکرە کو بەرا دەرکەتنا پەکەکێ دەستێن تەڤ کوردان ب زنجیران هاتبوون گرێدان، کورد وەکە رەشپێستێن د ناڤا زەڤیێن چاندنیێ یێن ئامەریکایێ دا بوون و چ جاران نە بەرخوەدانەک کریە، نە شۆرەشەک کریە و نەژی د ئەساس دا هەبوونە، ژ بەر کو پەکەکە تەڤ دیرۆکا کوردستانێ ب تایبەتی دیرۆکا باکورێ کوردستانێ ب دیرۆکا ئاڤاکرنا پەکەکێ ڤە ددە ناسکرن، ب ڤێ یەکێ دخوازە هەر تشتی ل بیرا کوردان ببە، شۆرەشا ئێحسان نووری پاشا، شۆرەشا سەیید رەزا، شۆرەشا شێخ سەعیدێ پیران، یا عەلی شێر و ……. هەموو سەرکردەیێن کورد ژ بیرا کوردان ببە و وەکە تشتەکی نەقەومی د مەژیکێ کوردان دە بدە ژبیرکرن.

پشتی هاتنا پەکەکێ، نە ب تەنێ پرسگرێکێن باکورێ کوردستانێ ب داوی نەبوون و کوردستانا باکور ئازاد نەبوو، بەلکو پرسگرێکێن هەیی زێدەتر و کوورتر بوون، پەکەکێ و سیاسەتا وێ یا ب دەولەتێ رە وەکر کو کوردێن باکور ناڤێن ترکی ل زارۆکێن خوە بکن، زمانێ خوە یێ دایکێ ژ بیر بکن، چاند و هونەرا خوە هەیا رادەیەکی هەری زۆر ژ بیر بکن و ب زمان و چاندا ترکان فێر ببن، لێ پەکەکە دخوازە وسا نیشان بدە کو هەر تشت بەر ب باشبوونێ چوویە، زمان، چاند، کەساتی، ژیان و هتد… هەر کەس راستیێ ب چاڤێ خوە دبینە و دزانە نە ب تەنێ ب پەکەکێ رە باکورێ کوردستانێ ئازاد نەبوو، بەلکوو پەکەکە بوو سەدەم کو بەشەک ژ باشوور و رۆژئاڤا کوردستانێ ژی بکەڤە بن دەستێ دەولەتا داگیرکەرا ترکیێ دا.

د بەشەکە دن ژ داخویانیا کەجەکێ دە هاتیە، “پێنگاڤا 15ێ تەباخێ فاشیزم تێک بر، نەھشت کو ببە پەرگالەک ماییندە و ھشت کو پێڤاژۆیا دەمۆکراتیک ژ نوو ڤە دەست پێ بکە.” ب راستی ژی مرۆڤ حەیری دمینە ژ ئالیەکێ کەجەکە-پەکەکە د تەڤ داخویانیێن خوە دە ئێریشی سەر ئاکەپێ-مەهەپێ دکە و وان ب فاشیزم بناڤ دکە، ژ ئالیەک دن ژی دبێژە ب پێنگاڤا 15ێ تەباخێ مە فاشیزم تێک بر، گەلۆ ئەڤ ب خوە نە دەرەوەکە دیار و ئەشکەرەیە کو پەکەکە دکە؟ گەر وە پێش 39 سالا فاشیزم ل ترکیێ تێک بربە، چما ئیرۆ رۆژانە باس ل فاشیزمێ دکن؟!   

ووسا دخویە پەکەکە ژی مینا زوحاک ب خوینا سەرێ کوردان تێهنییە

کەجەکێ گۆت، “گەریلا ب روحا سەرکەفتنێ یا 15ێ تەباخێ شەری دکە”، هەر کەس دزانە، پرسگرێکا کوردا نە شەرکرنە، کورد ب درێژاهیا دیرۆکێ شەرکەر و قەهرەمان بوونە، دیرۆک نڤیسێن ب ناڤ و دەنگ یێن وەکە هیرۆدیت کوردان وەکە مرۆڤێن ب جەرگ و شەرکەر ددن ناسکرن، سەرکردەیێن مینا زەینەفۆن، جەنگیزخان کو ب دو کەسێن بهێز و دلرەق تێن ناسکرن پەسنا کوردان و شەرکرنا وان دایە، ئەڤ تشتەکی روون و ئەشکەرەیە و هەر کەس دزانە، لێ بەلێ پەکەکە دخوازە ڤێ یەکێ ژی بکە بەهرا خوە و ببێژە مە مرۆڤێ کورد ووسا پەروەردە کریە، ب ڤێ یەکێ ژی دخوازە دیرۆکێ سەختە بکە.

ووسا دخویە پەکەکە ژی مینا زوحاک ب خوینا سەرێ کوردان تێهنییە و ت جاران تێر نابە، گەر نا بانگ ل جوانێن کورد ناکە و ژ وان رە نابێژە، ” دڤێ تەڤلی رەفێن تێکۆشینێ ببن”، ئاخر هوون باس ل کیژان تەکۆشینێ دکن؟ تەکۆشینا ب کوشتن دانا جوانێن کورد؟ تەکۆشینا چێکرنا براتیا گەلان ئا ل سەر خوینا کوردان تێ ئاڤاکرن؟ تەکۆشینا دەمۆکراتیک کرنا ترکیێ؟ تەکۆشینا دژاتیکرنا خەتا بارزانی و خەتا سەرخوەبوون و ئازادیا کوردستانێ؟ تەکۆشینا ب ترک ناساندنا دایکا خوە و وەرگرتنا دەلیڤەیەک دن ژ بۆی خزمەتکرنا دەولەتا ترک؟ تەکۆشینا لێبۆرین خوەستن ژ داییکێن ترک د دادگەها ترکیێ دا و ژبیرکرنا دایکێن کورد یان ژی تەکۆشینا رادەستکرنا زێدەتر یا خاکا کوردستانێ؟ یا راست دڤێ د ناڤا جوانێن کورد دا جوانەک یان ژی رێخستنەکا جوانان پەیدا ببە و وەکە چەوا کاوەیێ ئاسنگەر ل دژی زوحاک سەکنی و مەژیکێ وی هەرشاندی، ئەوژی مەژیکێ پەکەکێ ب چەکووچێ خوە بهەرشینە… تەک چارەسەری و ئازادیا کوردستانێ ژ پەکەکەیا ب دەستێ میتا ترکیێ هاتی چێکرن وێ ئەڤ بە.

پێنگاڤا 15ێ تەباخێ یا ل ئەرووحێ دەست پێکری، ب پێنگاڤا 15 شوباتێ، پێنگاڤا ڤەگەرینا عەڤدللا ژ بۆی ترکیێ ب داوی هاتیە و فاتیحە ل سەر هاتیە خوەندن

چالاکیا کو پەکەکە ب “پێنگاڤا دیرۆکی یا 15ێ تەباخێ” بناڤ دکە نە ب تەنێ وەکە ئەو دبێژە “ب درێژاھیا 38 سالان پێشکەتنێن مەزن ئافراند” نەئافراند بەلکو نەکاری 38 مەتران ژ کوردستانا باکور رزگار بکە، نە ب تەنێ ئەڤ، بەلکو ب ڤێ یەکێ پەکەکێ ب کووراهیا 38 کیلۆمەترا ژ کوردستانا ئازاد یا باشوور ژی تەسلیمی دەولەتا ترکیێ کر.

ب کورتی و ب کورمانجی، پێنگاڤا 15ێ تەباخێ یا ل ئەرووحێ دەست پێکری، ب پێنگاڤا 15 شوباتێ، پێنگاڤا ڤەگەرینا عەڤدللا ژ بۆی ترکیێ ب داوی هاتیە و فاتیحە ل سەر هاتیە خوەندن، پەکەکە ب ڤەگەراندنا ڤێ یەکێ ب تەنێ دخوازە خوینا زێدەتر یا جوانێن کورد بکە قوربانیێ بەرژەوەند و خوەستەکێن خوە یێن دژە کورد و کوردستان.

پوستێن ھەمان بەش