ئەنداما کۆنسەیا سەرۆکاتیا گشتی یا کەجەکێ سۆزدار ئاڤێستا، د داخوویانیەکا خوەیا د مالپەرا پەکەکێ یا ب ناڤێ ANFێ دا ھاتی بەلاڤ کرن، وەک ھەردەمی د ناڤا خەیالێن ڤالا دا بەحسا سەرکەتنا پەکەکێ و دژمناتیا پەدەکێ دکە.
پەکەکە د رەوشەکا خراب دایە، رۆژ ب رۆژ سەنگەرێن خوە وندا دکە و سیاسەتا ئەڤە چەندین سالن ل سەر دەرەوان ئاڤاکری ھێدی ھێدی ئاشکەرا دبە. ئەڤجا خەلکەک د ناڤا رەفێن پەکەکێ دا رەوشا ھەیی دبینە و ب ئاوایەکێ دەنگێ خوە بلند دکە. ئەو کەسێن دەنگێن خوە بلند دکن، یان ژ ئالیێ پەکەکێ ڤە تێنە کوشتن یان ژی ب رێیا دەزگەھێن دەولەتا ترک پەکەکە وان ددە کوشتن و ل سەر خوینا کو ب دەستێ خوە درێژینن سیاسەتێ دکن.
پەکەکێ دڤێت سەدەمەکێ ژ بۆ تێکچوونا خوە ببینە. سەدەم کەشفە سیاسەتا نەتەوی کوردستانیە، پەدەکە و بارزانینە.
سۆزدار ئاڤێستا د داخویانیا خوە دا دبێژە: “بێگومان ئەگەر نە ژ رۆلا پەدەکێ بوویا، داگیرکەریا ترک نەکاریبوو د ڤێ ئاستێ دا سەفەرێن داگیرکەریێ ل کوردستانێ بکە. لنگێ خوەجھی یێ ڤان ئێریشان پەدەکەیە. پەدەکێ ئیسال ب رەنگەکێ ئاشکەرا راخست پێش چاڤان کو خیانەتێ دکە. مالباتا بارزانی نیشان دا کو ئەو ھەڤکارەکێ ترکانە. ئەرکا پەدەکێ ئەڤە و ئەڤ یەک ژی تەرجیحەکە ب زانەبوونە. چ دەردێ پەدەکێ نینە کو کوردەکێ ئازاد بێ ئافراندن، کوردستان بێ پاراستن، دەستکەتیێن کوردان بێنە پاراستن، یەکیتیا نەتەوەیی بێ پێکانین. ل ھەمبەری ڤان ھەموویان، ل کێلەکا مێتنگەریا ترک جھ گرتیە. ب ڤێ پۆزیسیۆنا خوە دژمناتی ل کوردان کریە.”
نھا رۆژانە مەدیا پەکەکێ ژ دەڤێ بەرپرسێن پەکەکێ ڤان داخویانیێن بێ رامان و پووچ بەلاڤ دکە.
پەکەکێ سیاسەتا خوە ل سەر ڤان دەرەوان ئاڤاکریە و ھەتا بکاربە بەردەوام دکە. پەکەکە لنگێ دەولەتا ترکا باشوورێ کوردستانێ یە. باش تێ زانین کو، پەکەکێ د چارچۆڤەیا پلانەکا دەولەتا ترک دا پرانیا چەکدارێن خوە ژ باکورێ کوردستانێ دەرێخستن و ئەو رێکرن باشوورێ کوردستانێ. نھا ھندەک دەڤەرێن باشوورێ کوردستانێ د بن دەستھلاتداریا چەکدارێن پەکەکێ دایە. پەکەکە ڤان دەڤەران وەک دەڤەرێن ئازاد کری وەک “قادا مەدیا” ددە ناساندن . ل ڤێ دەرێ پرسەک دەردکەڤە ھۆلێ.
مادەم ھون ل دژێ دەولەتا ترک شەر دکن ئەڤە 40 سالە وە گوندەک، گاڤەک، ئەردەک ل باکورێ کوردستانێ ئازاد کریە؟ ل باشوورێ کوردستانێ ھون میلیشیایێن شیعەیانە و ل شنگالێ چەکدارێن پەکەکێ مووچەخۆرێن حەشدا شەعبینە. ئەرکا وە ل باشوور رێگرتنا رێیا دەولەتبوونا کوردایە. دێ ئەو رۆژ هێت کو ھێدی پێوستیا دژمنێن داگیرکەر ژی ب وە نامینە و ھوونێ د گونەھێن گەلێن کوردستانێ دا بفەتسن.
ئەڤ دنیا ھەموو بەحسا یەکیتیا نەتەوی بکە گەرەک پەکەکە نەکە. وە ل دژێ پارلەمەنتۆیا کوردستانێ، ل ئەورۆپا پارلەمەنتۆیەک دەستچێکری ئاڤاکر، وە ل دژێ یەکتیا نەتەوی ل ئەورۆپا کەنەکە ئاڤاکر. ھەر تشتا کو فەیدەیێ بدە کوردا وە رێ لێ گرت و بەراڤێتی کر. ھێدی گۆتنێن وە پەرە ناکە.
ھون ژ بۆ کورد و کوردستانێ ب ڤێ ئایدۆلۆژیا کەڤنەپەرەست نکارن تشتەکی باش بکن ژ بەر کو ئەرکا وە تێکبرنا ھەر تشتێ باش و د فایدەیا کوردان دا یە.
خالەکا ھەری گرینگ ئەوە کو، کوردێن نشتمانپەروەر پەکەکێ باش ناسدکن، لێ مخابن گەلەک کێم کەس ڤەکری بەحسا خرابی سیاسەتا قرێژا پەکەکێ دکە. گەلەک کەس بێ دەنگ دمینن. ئەڤ بێدەنگی ب خوە ژی بێهتر دبە سەدەم کو پەکەکە دژاتیا دەستکەفتیێن کوردستانی دکە. ھەمان تشت ژ بۆ پارتیێن سیاسی ژی دەرباس دبە.
رۆژەڤاکورد
