مەمەد مێردینی
دیرۆکا نەتەوێن بندەست ئیسپات کریە کو گەر گرتیەکی سیاسی د زندانێ دە ل بەر خوە نەدە، ژ بۆ رازیکرنا دژمن و پاراستنا جانێ خوە دێ گەلەک تشتێن نە راست بێژە و ئەنجام بدە. ئۆجالان کو د سالا 1973یێ دە 7 مەھان د گرتیگەھێن ترکیێ دە ما، دیار کر کو پشتی ئازادبوونا خوە ئەوێ هەول بدە ب ت ئاوا جارەکە دن نەکەڤە زندانێ، ئەڤ ژی نە ئاخافتنەکە کو کەسەکی نڤیسیبە یان گۆتبە، بەلکو ئۆجالان ب خوە د پرتووکێن خوە دە نڤیساندیە و ب شانازیکرن ڤەدبێژە.
ل ڤڕ ئەڤ پرس تێ بیرا مرۆڤ، گەلۆ گەر کەسەک بزانبە رەوشا د زندانان دە چ قاس نەخوەش و دژوارە، و ڤێ یەکێ لایقی خوە نەبینە، چما بەرێ ب هەزاران ولاتپارێزێن کورد دا زندانێن ترکیێ و پشترە ل سەر کەد و خەباتا وان زندانیان خوە کر لەهەنگ، ب ئاوایەکی کو نها پارتیا ئۆجالان بەرخوەدانا هەر زیندانیەکێ د زندانێن ترکیێ دە، هەتتا زندانیێن ئەولی ژی ب ئۆجالان ڤە گرێ ددە و ووسا نیشان ددە کو ب روحا بەرخوەدانا ئۆجالان ل بەر خوە ددن! د دەمەکی دە کو ئۆجالان نە ل کینیایێ ل دەما هاتیە گرتن، نە د بالەفرێ دە دەما ڤەگەرین بۆ ترکیێ و نەژی ل ئیمرالیێ چ بەرخوەدانەک نەکریە، بەلکو بەرەڤاژی ب تەڤاهی تەسلیمی دەولەتێ بوویە و بوویە کەسەک ئیتیرافچی و خزمەتا دەولەتا ترکیێ دکە.
ئۆجالان دکاریبوو شوونا ل هن دەولەتان بگەرە و پشت رە ب زەلیلی ڤەگەرە ترکیەیێ، بچە چیایێن ئاسێ یێن کوردستانێ و وەکە تەڤ گەریلا و هەڤالێن خوە یێن دن د چیایێن ئاسێ و بلند یێن کوردستانێ خوە بپارێزە، لێ ژ بۆ کەسەکی کو ب دەڤێ خوە ئیتیرافێ دکە دەما 12 سالان ب ئیمکانیاتێن میتا ترکیەیێ و ب دەرفەتێن دەولەتا ترک خوە پێگهاندیە، پڕ زەحمەتە بکارە ل چیایێن ئاسێ دە ژیان بکە. ئۆجالان ت جاری فێری ژیانا چیا نەبوویە، ئەو فێری ژیانا لۆکسا د ناڤا ڤیلا و هەبوونا هن ژنێن بەدەو ل دەردۆرا خوە بوو، لۆما رازی نەبوو بچە چیایێن کوردستانێ و ل ور خەباتێ بکە.
ل سەر ڤێ یەکێ کو چما ئۆجالان دەما ژ سووریەیێ دەردکەڤە ناچە چیایێن کوردستانێ، د پرتووکا خوە یا ب ناڤێ “مانیفەستۆیا شارستانیەتا دەمۆکراتیک” بەشا یەکێ، رووپەلا 49 دا دبێژە، “گەر بهاتا و ئەز بچووبام چیێا، مسۆگەر وێ دەمێ دەولەتا ترکیێ دا ب تەڤ چەکێن د دەستێ خوە دا ئێریشی وێ دەرێ بکە، ئەڤ ژی ژ ئالیەکی دا ببە سەدەم ئێریش ل سەر کوردستانێ بهاتبا کرن و ژ ئالیەکی دن ژی دا هەڤالێن مە تووشی زیانەکا هەری مەزن بن”.
پرسا ل ڤڕ ژی سەر هل ددە ئەڤە، گەلۆ گەر ئۆجالان دزانە ل هەر دەرا ئەو و چەکدارێن وی هەبن، ئەو جی وێ وەرە وێرانکرن، چما پشتی هاتیە گرتن، فەرمان ب چەکدارێن خوە دا کو بچن چیایێن باشوورێ کوردستانێ؟ هەلبەت بەرسڤا ڤێ پرسێ پڕ هێسانە، ژ بەر کو ئۆجالان دخوەست باشوورێ کوردستانێ د دەمەکی دا کو نە قادا خەباتا وی و پارتیا وی بوو، ببە قادا شەرەکی سەختە، ب ئاوایەکی کو پشتی ئازادکرنا باشوور ژ ئالیێ پارتی و گەلێ باشوور ڤە ژی هەر تم ئەڤ پەرچەیا ئازادا کوردستانێ د شەر و ئالۆزیان دە بمینە.
هەر وەها ئۆجالان د ڤێ پرتووکێ دا دیسا دبێژە، “گەر بهاتا و ئەز بچووبام چیا، وێ دەمێ دەولەتا ترکیێ دا مە ل چیا دۆرپێچ بکە و پەیوەندیێن مە یێن لگەل جیهانا دەرڤە دا هێن سینۆردارکرن.” هەر کەس دزانە ئەڤ ئاخافتنا ئۆجالان ژ بلی بەهانەیەک بێ واتە چ تشتەک دن نینە، ب درێژاهیا دیرۆکێ پرانیا شۆرەشگەرێن کوردان ل چیا ژیان کرنە، شۆرەشێن هەری مەزن برێڤە برنە و هەرتم تێکلی ب جیهانا دەرڤە ژی هەبوویە. ژ بۆی دەرەواندنا ڤێ ئاخافتنا ئۆجالان، مرۆڤ دکارە ڤێ پرسێ بکە، گەلۆ ما تو ب ئاوایەکی ئازادانە ل چیایێن کوردستانێ بای، تەڤ ئاموورێن سەردەم یێن پێوەندیێ د بن دەستێ تە دا بان، ب ئاوایەکی ئازادانە تەڤگەریابای و بریار دابانە دا پێتر و هێسانتر کاری پەیوەندیان ب جیهانا دەرڤە چێکی، یانژی د هۆتەلا ب ناڤێ “زندانا ئیمرالیێ دا”؟
ژ بۆی کەسەکی کو بخوازە راستیێ فێم بکە، ژ بۆی کەسەکی کو مەژیکی وی ژ ئالیێ پەکەکێ نەهاتبە شووشتن، ئەڤ چەند رێزێن نڤیسێ بەسن کو فێم بکە، ئۆجالان و پارتیا وی ب تەنێ ژ بۆی یەک ئارمانج هاتنە چێکرن، ئەو ئارمانج ژی ژبیر برنا دەولەتا کوردی، دژاتیکرنا کەڤنەشۆپیا بارزانیێ نەمر، تێکدانا کوردستانا ئازاد و ب کوشتندانا زێدەتر یا ولاتپارێزێن کوردە.
