یازدەمین سالڤەگەرا کۆچا داوی یا کادرۆیێ پەکەکێ یێ رۆژھلاتێ کوردستانێ «ماجد کاڤیان» ب کۆد ناڤێ «سمکۆ سەرھلدان»ە. سمکۆ سەرھلدان د 13ێ ئیلۆنێ دا، ژ بەر ئێرشێن ب تۆپان یێن دەولەتا ئیرانێ ل چیایێ قەندیلێ ژیانا خوە ژ دەست دا. لێ بوویەرا سمکۆ سەرھلدان ژی مینا بوویەرا رێزان جاوید (یوسوف رێبانی) کو د 4ێ تەباخێ دا ل قامشلۆ ژیانا خوە ژ دەست دا بوو، بوویەرەک تاری و ئالۆزە.
ئەگەر ئالیێن راستی یێن بوویەرێ بێن لێکۆلینکرن، دێ دیار بیت کو پەکەکە و پەژاک نکارن بەحسا سمکۆ بکن، ژ بەر کو خیانەت ل سمکۆ کرنە. رێڤەبەریا پەکەکێ خەنجەرەک ژ پشتڤە ل سمکۆ و 21 گەریلایێن د وی شەری دا ژیانا خوە ژ دەست دانە دا.
ھەموو لووتکەیێن چییایێ قەندیل کو سمکۆ ب مەترسیا مرنێ پاراستبوون ژ ئالیێ پەکەکێ ڤە رادەستی ئیرانێ ھاتن کرن. پەڤچوونێن ئیران و پەکەکێ کو ژ 16ێ تیرمەھێ دەستپێ کربوو، ھەتا نیڤا مەھا ئیلۆنێ بەردەوام بوون و ل گۆری داخویانیا فەرمی د ڤی شەری دە 21 ئەندامێن پەکەکێ ژیانا خوە ژ دەست دا بوو.
گەلۆ چ قەومیبوو؟
ئیران د 16ێ تیرمەھێ دا دخوازە درێژاھیا چیایێ قەندیلێ کو سینۆرێ خوەزایی یێ د ناڤبەرا رۆژھلات و باشوورێ کوردستانێ دایە و دکەڤە سەر خەتا رانیا، قەلادزێ داگیر بکە. ب تایبەتی ژی گرێ ستراتەژیکێ ب ناڤێ لووتکەیا جاسووسان د ناڤا جھێن یەکەم یێن ئارمانجکرنا ئیرانێ دا بوو.
ل ور 50 رۆژان ئەڤ پێڤاژۆ بەردەوام کر. د داویا ڤێ یەکێ دا، پەکەکێ تەڤاھیا زنجیرە و ھەموو لووتکەیێن قەندیلێ، تەڤی گرێ جاسووسا، کو ناڤەندا شەر بوو، رادەستی ئیرانێ کرن.
ئارمانجا مە نە ئەوە کو ئەم بەحسا ڤی شەری بکن. لێ ئەڤ شەرە نە شەرەکی مجد بوو. ئیران ژ بۆ کو پلانێن خوەیێن ھەرێمی پێک بینە لووتکەیێن قەندیل کرنە ئارمانجا خوە. ئەڤ شەرە ب رێکەفتنەکێ ل گەل دۆستێ ئیرانێ یێ کەڤن، ئانکو جەمیل بایک ھاتبوو پلانکرن. ئانکو ھەر دو ئالییێن شەری ھاژ ھەڤدو ھەبوون. د ڤی شەرێ رێکەفتن ل سەر هاتیە کرن دا تەنێ جوانێن کورد دمرن.
رۆژەکێ بەریا شەر دەرکەڤە و سمکۆ سەرھلدان ژییانا خوە ژ دەست بدە، مستەفا قاراسوو ل کانیا توویێ (گووندێ رۆژھلات) لگەل زلامێن ئیستخباراتا ئیرانێ دا چای ڤەدخوار و یاریا تاولە کریە. قاراسوو پەیمانا کو ئەو دێ قەندیل رادەستی ئیرانێ بکن، ئیمزا کر.
پەکەکێ د وی شەری دا جەلال تالەبانی وەک خایین راگەهاند
سەرۆک کۆمارێ وێ دەمێ یێ ئیراقێ مام جەلال تالەبانی ژ پەکەکێ نامەیەک رێکر و گۆتبوو، “ھوون دزانن ب دو گولەیێن کو وە ژ قاچاخچیان ستاندنە ھوون نکارن شەرێ ئیرانێ بکن، نەھێلن زارۆکێن کوردان ڤالا-ڤالا بێن کوشتن.” تالەبانی گۆت کو ژ لووتکەیا جاسووسان و تەڤ زنجیرەیا قەندیل تەسلیمی پێشمەرگە بکن دا کو ئیران نکاربە بکەڤە ڤان جھێن ستراتەژیک. لێ پەکەکێ وێ دەمێ تالەبانی و یەنەکە وەک خایین ئیلان کر. ل شوونا کو لگەل کوردان رێکەفتنێ بکە، وەکە ھەر جارێ، لگەل داگیرکەران دا پەیمان چێکر و گرێ جاسووسان ژی دناڤ دا ھەموو لووتکەیێن قەندیل رادەستی ئیرانێ کرن.
ژ بەر کو پەکەکێ ئەڤ لووتکەیە دانە ئیرانێ، ئێدی ئیران ل سەر باژارێن وەکی قەلادزێ، سەنگەسەر، چارکورنا و رانیا سەروەر بوو.
ئەندامێن پەژاکێ یێن بێشەرم ھێژ ژی بەحسا سەرکەفتنێ دکن
ئەڤ پەیمانا د ناڤبەرا پەکەکێ و ئیرانێ دا، د بن ناڤێ شەری دا دهێت ڤەشارتن، د راستیێ دا پەیمانەکا خیانەتێ یە. گەلەک کادرۆیێن پەژاکێ یێن وێ دەمێ ژ بەر ڤێ پەیمانێ ژ پەژاکێ ڤەقەتییان. د راستی دا 2 جوانێن رۆژھلاتێ کوردستانێ کو بەشداری شەرێ ل قەندیلێ بووبوون، گۆتن کو ئەڤە خیانەتە ھوون ل شەھیدان دکن و ژ بۆ پرۆتەستۆکرنا ڤێ پەیمانێ خوە ئینتیحار کرن.
لێ نھا ئەڤ خیانەتە ژ ئالیێ پەکەکێ و پەژاکێ ڤە تێ خەملاندن و وەکە سەرکەفتن ھاتیە نیشاندان. یەک ژ فەرماندارێن «یەرکێ» یێ باسکێ لەشکەری یێ پەژاکێ «شیار شەڤگەر» دبێژە، “ئەم دێ ل بیرئانینا سمکۆ سەرھلدان خوەدی دەرکەڤن.” ھوونێ چاوا ل بیرئانینا وی خوەدی دەرکەڤن؟ ل کێلەکا وە فەرماندارێ وە رێزان جاوید ژ بەر کو پەکەکە رەخنە کربوو سرگوونێ رۆژئاڤا کرن. ھەکە تو فەرماندارێ «یەرکێ» یی، چاوا چێدبە کو ئەڤ 11 سالن تە گولەیەک ژی ل دژی ئیرانێ نەتەقاندییە. ھوون د ئاخفتنێ خوە دا ژی نکارن بێژنە دەولەتا ئیرانێ کۆلۆنیالیست. ھوون پێلیستۆکا پەکەکێ نە. و ھوون بانگ ل جوانێن رۆژھلاتێ کوردستانێ دکن کو تەڤلی پەکەکێ ببن. ما تشتەک وسا چێدبە؟
ژ شیار شەڤگەر خەرابتر ئاریەن ئارێ فەرماندارا باسکێ ژنان یا «ھەپەژێ» ھێزێن پاراستنا ژنێ ئاخڤییە. وەکە کو دیار دبە، ئاریەن نکارە راست و چەپێن خوە ژ ھەڤ جودا بکە. دەما بەحسا شەرێ کو تێ دا ھەموو لووتکەیێن چییایێ قەندیل ھاتن رادەستکرن، ئاریان وھا دبێژە “ئیران ژ بەر بەرخوەدانا مە ماتمایی ما. ژ بەر ڤێ سەدەمێ دەولەتا ئیرانێ ھێ ژی پۆشمانە کو ئێریشی قەندیلێ کر. ژ بەر کو ئیرانێ تەڤی ھەموو تەکنیک و تەکنۆلۆژیا خوە ل قەندیلێ شکەستن.”
پێلیستۆکێن پەکەکێ یێن ژ رۆژھلاتێ کوردستانێ
ل گۆری ئاریەن، پەکەکە د شەری دا سەرکەفتنەک مەزن ب دەست خست. لێ ئەگەر پیچەکێ سەرێ خوە راکە و ل چیایێ قەندیلێ بنێرە، دێ بینیت کا چاوا ژ ھەموو لووتکەیێن قەندیلێ رۆناھیا قەرەقۆلێن ئیران دێ بینیت.
لێ مخابن کەسێن وەک شیار و ئاریەن پێلستکن. پەکەکێ ئەو ل گەل خوە دھشتن کو دەما پێدڤی بکە وان بکار بینە. وان کەسان سەدەمێن دەرکەتنا خوە یا چییا ژی ژبیرکرنە. نەخوە ئەوێ دا ژ خوە پرسیار کن، چاوا چیایێن کو سمکۆ ژ بۆ پاراستنا وان خوە فەداکر، د شەڤەکێ دا رادەستی ئیرانێ کرن. ئەم دەست ژ وێ ژی بەردن گەلۆ ما ھوون قەد ناپرسن چما ل دژی ئیرانێ شەر ناکن؟ دێ ببێژن چما رێزان جاوید سرگوونی رۆژئاڤا کرن. لێ ھوون تەسلیمی ئیرانێ بوونە. پەکەکە جوانێن رۆژھلاتێ کوردستانێ ل دژی ئازادیا رۆژھلاتێ کوردستانێ ب کار تینە. رێڤەبرێن پەکەکێ جەمیل بایک، مستافا قاراسو و ھتد ب دەرفەتا کو ئیرانێ دایە وان، ل سلێمانیێ ب رەحەتی دژین. مستافا قاراسوو پار بھارێ و ھاڤینێ ل تەھرانێ ل نەخوەشخانەیێ دما. پەکەکە ئەڤ 11 سالن یەک گولە ژی نەئاڤێتیە ئیرانێ. ئاگاھییا وان ژ وەلاتپارێزێن کو ل سلێمانی و پێنجوینێ ژ ئالیێ ئیرانێ ڤە ھاتنە کوشتن، نینە. ئەڤ ھەردو بەلەنگاز دەردکەڤن و قالا سەرکەتنێ دکن. بەلکی شاش بیت کو مەرڤ وان وەکە بەلەنگاز ب ناڤ بکە. یا راست ئەوە کو مرۆڤ ژ بێژیتە وان ھوون شریکێن خیانەتا پەکەکێ یا ل گەلێ رۆژھلاتێ کوردستانێ نە.
پەکەکە دێ ل رۆژھلاتێ کوردستانێ هێژ چالاکتر بیت
نە شاشە کو مرۆڤ ووسا بفکرە کو پەکەکە دێ ھندەک کادرۆیێن رۆژھلاتی یێن وەک شەڤگەر و ئاریەن دەرخە پێش و خەباتێن خوەیێن ژ بۆ رۆژھلاتێ کوردستانێ بھێزتر بکە. گەلێ رۆژھلاتێ کوردستانێ ب دەنگەکێ بلند نەرازیبوونا خوە ل سەر بوویەرا رێزان تینە زمان. ژ بۆ بێدەنگکرنا گەل پێویستە پەکەکە مرنێ ب کار بینە. ژ بۆ ڤێ ژی دێ دەفتەرێن بەرێ ڤەکەت و ل سەر ھەڤ بانگا قەھرەمانیێ و شەھادەتێ کەت.
لێ یا گرینگتر یەکبوونا ھەردو پارتیێن رۆژھلاتێ کوردستانێ یە کو ژ کەڤنەشۆپیا پەدەکێ تێن. پەکەکە ژ ڤێ یەکبوونا ھەر دو پەدەکا پر نەرەحەتە. پەکەکە ب ڤێ یەکبوونێ ژ ئیرانێ ژی پێتر نەرەحەت بوویە. ژ بەر کو ڤێ یەکگرتنێ باندۆرەکا مەزن ل رۆژھلاتێ کوردستانێ کر. ئیران ژ بۆ پێشیگرتنا پەدەکێ دخوازە پەکەکێ ئەرکدار بکە. ژ بۆ کو پارتیا پەدەکێ سەرنەکەڤە، پەکەکە دێ زێدەتر دژی وان پرۆپاگاندایا کەت و کەڤیتە ناڤا خەبات و خیانەتێ.
ل ڤر کێشەیا ئەساسی دەست پێ دکە. پێویستە کراسێ کو پەکەکێ ل رۆژھلاتێ کوردستانێ ل خوە کریە بهێتە قەتاندن. راستییا پەکەکێ ب رویسی “تازی” بهێتە دیتن. گەر جوانێن رۆژھلاتێ کوردستانێ ب راستی شۆرەشێ دخوازن پیدڤیە رێگریێ ل سەختەکاریێن پەکەکێ بکەن. ب راستی ژی پیدڤیە پێوەندییێن پەکەکێ و ئیرانێ کا چاوا خیانەت ل گەل و جوانێن رۆژھلاتێ کوردستانێ کر، بنڤیسن. سمکۆ سەرھلدان ژی مینا رێزان جاوید بوویە قوربانێ ڤێ خیانەتا پەکەکێ.
