سەرۆکێ پەژاکێ «سیامەند مۆعینی» ژ بۆ مەدیایێن سەر ب پەکەکێ دا خویاکرن کو ئەگەر رەوشا ئیرانێ خراب ببە ئەو ئامادەنە ل گەل رەژما ئیرانێ ھەڤکاریێ بکن. مۆعینی گۆت: “ئەگەر رەوشا ئیرانێ خراب ببە، پەکەکە ئامادەیە ب ھەماھەنگی لگەل حکوومەتا ئیرانێ باژارێن کوردستانێ بپارێزە و رێ نەدە ھێزێن تێکدەر بخن بن کۆنترۆلا خوە.”
بێ گومان ل سەر ڤێ داخوویانیا سەرۆکێ پەژاکێ گەلەک نرخاندنێن جودا تێنە کرن. مۆعینی راستیا سیاسەتا پەکەکێ گۆتیە و ئەڤە چەندین سالن ل رۆژھلاتێ کوردستانێ ژ بۆ پاراستنا رەژما ئیرانێ ل دژێ بزاڤا کورد تەڤدگەرن. لێ مخابن کەسەک و تایبەتی پارتیێن رۆژھلاتێ کوردستانێ گەلەک ڤێ پرسگرێکێ ژ بۆ “کوورنەبوونا” ئالۆزی و ناکۆکیان ناینن رۆژەڤێ.
دوھ و ئیرۆ پەکەکێ ل رۆژئاڤایێ کوردستانێ چ کربە دێ ھەمان تشتێ ل رۆژھلاتێ کوردستانێ ژی بکە. چەوا وان رەژێما ئەسەد پاراست دێ ب ھەمان سیاسەتێ رەژێما مەلایێن ئیرانێ ژی پارێزن. واتە رەوشا ئەنەکەسێ ل رۆژئاڤایێ کوردستانێ چبە، دێ رەوشا تەڤگەرا کوردی ل رۆژھلات ژی بیتە ھەمان تشت.
ل باشوورێ کوردستانێ مل ددن ملێ حەشدا شەعبی ل دەڤەرێن وەک شنگالێ ل دژێ پەدەکێ و تەڤگەرا نەتەوی تەڤدگەرن. بەرژەوەندیێن حکوومەتا بەغدایێ دپارێزن و رێدگرن کو شنگال تەڤلی ھەرێما کوردستانێ ببە.
ژ بۆ ڤێ یەکێ ل رۆژھلاتێ کوردستانێ ھەمان تشتێ دێ بکە و دکە ژی.
نھا د ھندەک دەڤەران دا ووسا ددن خویاکرن کو ب خوەپێشاندانا کوشتنا ژینا ئەمینی شەرمەزار دکن، لێ گەلەک ب حەساسی دەما ڤێ یەکێ ژی دکن، د بن دا رەژێمێ دپارێزن.
پەکەکە و بەرپرسێن پەکەکێ ئارمانجا سیاسەتا پەکەکێ ڤەکری ددن کەشفکرن، لێ مخابن ژ بۆ ناکۆکیێن د ناڤا ھێزێن سیاسی دا خەلکەک ناخوازە ڤێ یەکێ ببینە. ھەر ئالیەک ھەولددە ل دژێ ئالیەکێ دن پەکەکێ وەک کارتەکێ ب کاربینە. لێ ئەو ئالیێن ڤێ یەکێ دکن خوە دخاپینن و دکەڤن کەمینا سیاسەتا پەکەکێ یا د خزمەتا دژمن دا.
ئەگەر ژ ئیرۆ ڤە پارتی و ئالیێن سیاسی ل رۆژھلاتێ کوردستانێ ڤێ یەکێ نەبینن و ل گۆرا ڤێ ژی ھندەک تەدبیران نەستینن و نەبن خوەدی ھەلوەستەک زەلال، دێ پێشەرۆژێ دا ئێشا ڤێ یەکێ بکشینن.
پەکەکە ل دژێ ھەموو جورەیێن دەستکەڤتیێن نەتەوی تەڤدگەرە، لێ مخابن ڤێ یەکێ ب ناڤێ نەتەواتیێ، ب ناڤێ کوردایاتیێ دکە. ب ڤێ یەکێ ل هەر دەڤەرەکێ دبە گەفا ھەری مەزن ل سەر دەستخستنا مافێن نەتەوی یێن کوردا.
