رۆژھلاتێ کوردستانێ و شانۆگەرییێن پەکەکێ

رۆژھلاتێ کوردستانێ و شانۆگەرییێن پەکەکێ

-گەلۆ داویا رەژیما فاشیستا ئیرانێ نێزیکە؟

د ناڤا دو ھەفتەیێن دەرباسبوویی دا ل رۆژھلاتێ کوردستانێ و ھەموو باژارێن دنێن ئیرانێ راپەرینا گەل دەست پێ کر، ئەگەر ئیرۆ ژی نەبوویا، دا د دەما پێش دا ئەڤ سەرھلدانە روو دەت. ژ بەر کو رەژیما فاشیستا مەلایان رەژیما ھەری ھۆڤا ل جیھانێیە، کو د دنیایێ دا پشتەڤانێ ھەری مەزنێ تەرۆر و کوشتنێیە. ھەر سال ل رۆژھلاتێ کوردستانێ گەل د بن زلمەک مەزن دا دژین. کورد تێن دارڤەکرن و کۆمکوژ کرن. دەولەتا ئیرانێ ھەموو رەگەزێن مرۆڤاھیێ بنپێ کرینە و ل دژی نەتەوەیێن دنێن وەکی کورد، بەلووچ و عەرەبێن ئەھاوزێ جینۆسایدێ ئەنجام ددەت.

شەھیدبوونا ژینا ئەمینی بوو دەستپێکا تەقینەک مەزن ل ئیرانێ. ئیران نھا ل بەر ھلوەشینێیە، سەرھلدانا گەل ژی وێ بەرفرەھ تر ببە. دەما کو ل رۆژھلاتێ کوردستانێ و ئیرانێ سەرھلدانا گرسەیی پێک ھات، ئیران یەکسەر کەت تەنگاسییێ دا و کۆمکوژی ل دژی خوەپێشاندەران پێک ئانی. وسا نەسەکنی، لێ ھەرێمێن سینۆری یێن د ناڤبەرا رۆژھلات و باشوورێ کوردستانێ دا ژی بۆمبەباران کرن. ئیران ھەر کو دکەڤە تەنگاسییێ دا، یەکسەر ھەرێمێن سینۆری یێن باشوور و رۆژھلاتێ کوردستانێ بۆمبەباران دکە.

د ڤان چەند رۆژێن دەرباسبوویی دا رەژیما ھۆڤانەیا ئیرانێ ب رۆکێت و درۆنان ئێریشی سەر ناڤەندێن حزبا دەمۆکراتا کوردستانێ، پارتیا ئازادییا کوردستانێ، پارتیا کۆمەلە کر و د ئەنجامێ دا کۆمەک پێشمەرگەیێن قەهرەمان، کادرۆ و ئەندامێن وان پارتیان شەھید بوون. لێ یا ھەری تراژەدی ژی شەھیدبوونا رەیحانە کەنعانی یا دوگیان بوو! زارۆکێ وێ وانیار رەحمانی ھاتە رزگارکرن لێ پشتی چەند دەمژمێراب ڤەگەریا ھەمبێزا دایکا خوە و وانیار ژی شەھید کەت. ڤێ تراژەدییێ نیشان دا کو کورد د سالا 2022یێ دا ھێژ ژی د ناڤا تراژەدییایێ دا دژین . مافێن مرۆڤان، نەتەوەیێن یەکبوویی و وەلاتێن جیھانێ ل ھەمبەری ڤان ئێریشێن تەرۆریستی بێدەنگن! لێ بەلێ یا گرینگ ئەوە کو سەرھلدان ھێژ بێھتر دەوام دکە و بەرفرەھ دبە. رەوش ژی ڤێ یەکێ نیشان ددە کو رەژیم دهێت ھلوەشاندن و دڤێت ھێزێن کورد خوە ژ بۆ ھەر ئیحتیمالەکا پێشەرۆژێ ئامادە بکن.

-ئیسماعیل قاعانی ل قەندیلێ، جەمیل بایک ل ئوورمیێ

د دەستپێکا بوویەرێن رۆژھلاتێ کوردستانێ و ئیرانێ دا تەڤاھیا ھێزێن کوردستانی داخویانی بەلاڤ کرن و تێدا پشتگیریا خوە بۆ خوەپێشاندەران دیار کرن. ناڤەندا ھەڤکاریا پارتیێن رۆژھلاتێ کوردستانێ ژی چاڤدێریا رەوشێ دکن و داخوازا گرەڤا گشتی دکن. لێ نە پەکەکێ و نە ژی پەژاکێ دەنگ ژ وان دەرنەکەت، ئەڤ ژی نۆرمالە و نە عەجێبە. ژ بەر کو ھەتا ئیرۆ ژی پەکەکە بەشەکە ژ ئەنیا بەرەڤانییێ (میحوەرا مقاومەتێ) و ھێزێن وێ یێن چەکدار ژی بەشەکن ژ ئارتێشا قودسێ پاسداران. پەژاک زێدەیی 10 سالن فیشەکەک ل ھەمبەری رەژیما ئیرانێ نەتەقاندییە. د ناڤبەرا وان دا ئاگربەستەکا فەرمی ھەیە. گەریلایێن پەژاکێ ل (شاھۆ، ھەورامان، کۆسالان) و گەریلایێن پەکەکێ ژی ل (سەلماس، خۆی، ماکۆ) ب ئازادی تێن و دچن، ل بەر چاڤێ ئارتێشا پاسداران گومرکێ داتینن و باجێ ژ کۆلبەران دیستنن. ل قەندیلێ قەرەقۆلا ئارتێشا پاسداران و قەرەقۆلێن پەکەکێ 10 مەتران دووری ھەڤن. داخویانیێن رێڤەبەرێن پکەکێ ھەرتم ژ بۆ بەرژەوەندیا ئیرانێ و ل دژی گەلێ کورد بوونە. موراد کارایلان د تەلەڤزیزیۆنا پەکەکێ دا گۆت: (تێکۆشینا چەکداری یا ل دژی ئیرانێ، خزمەتا ئەردۆگان و عەرەبستانا سعوودی دکە). لەوما و ژ بەر ڤێ یەکێیە کو ئیران پشتگرییێ ددەتە پەکەکێ کو ل دژی ھەموو ھێزێن کو دخوازن ئیرانێ تونە بکن، شەری بکە. دڤێت ھێزێن کورد ل رۆژھلاتێ کوردستانێ ڤێ راستیێ باش فێم بکن، کو پەکەکە و شاخێن وێ دڤێت د پێشەرۆژا رۆژھلاتێ کوردستانێ دا تونە بن. رۆژئاڤایێ کوردستانێ ژی میناکا ھەری زندییە. ل کو دەرێ پەکەکە ھەبە، خوین، کوشتن، تەڕۆر و تەسفیە ل ور سەردەستە.

-داخویانیا دەرەوین و خوەلی کرنە چاڤێ خەلکێ

د ڤان سالێن داوی دا چ کەس ب قاسی قاشۆ رەوشەنبیر و ئاکادەمیسیەنێن سەربخوە زرار نەدانە دۆزا کوردستانێ. ئیرۆ ل رۆژھلاتێ کوردستانێ کورد ل دژی رەژیما ھەری ھۆڤا جیھانێ تێدکۆشن. رەژیما فاشیستا ئیرانێ سالانە ب سەدان کوردان دارڤە دکە، ژن، مێر، جوان، کال و پیران قەتل دکە. پەژاک کو باسکێ رۆژھلاتێ کوردستانێ یێ پەکەکێ یە، سینۆران ژ بۆ رەژیما فاشیستا ئیرانێ دپارێزە. ئەڤ بانگا ب ئیدیعایا یەکیتیا نەتەوەیی یا ل رۆژھلاتێ کوردستانێ ژ ئالیێ کۆمەک ژ مامۆستەیێن زانینگەھ و ئاکادەمیسیەنان ڤە ھاتیە نڤیساندن و بەلاڤ کرن، د خالەکا ڤێ بانگێ دا دهێت خوەستن کو ئالیێن رۆژھلاتێ کوردستانێ و پەکەکە ھێزێن خوە بکن یەک. ئەڤە خوەلی کرنە چاڤێ خەلکێیە و یاریەکا مەترسیدارە!

ھەڤسەرۆکێ پەژاکێ «سیامەند موعینی» ل بەر چاڤێ ھەمی دنیایێ دا وھا گۆت: (ھەکە رەوشا ئیرانێ خراب ببیت، پەکەکە ئامادەیە ب ھەڤکارییا حکوومەتا ئیرانێ باژێرێن کوردان بپارێزیت و رێ نەدەت ھێزێن وێرانکار و خەرابکار تێکەڤن ناڤا وان باژێران دا). یێ کو پیچەک ھشێن وی/وێ کار بکەن و ئەلفبێیا کوردی فێم بکە، باش دزانە کو سیامەند موعینیی ێ کو دبێژە ھێزێن وێرانکار و خەرابکار قەسدا وی حزبا دەمۆکرات، پاک، کۆمەلە و ھێزێن دنێن رۆژھلاتێ کوردستانێنە. ئیجار ل ڤر مافێ مەیە کو بپرسین، وە ل سەر کیژان پرەنسیپان ئەو بانگ نڤیساندیە و دخوازن د ناڤا ئاڤا شوولی دا ماسییان بگرن؟ پەژاک ئیرۆ شاخەکی سوپایێ قودسا پاسدارانە و سینۆری ژ بۆ رەژیما ئیرانێ دپارێزە. قومارا کو ھوون دخوازن ل سەر خوینا کوردێن رۆژھلاتێ کوردستانێ بلزین، کارتەکا شەوتی یا ئاپۆجییێن شەرمۆکە. ژ کەرەما خوە حەقێ خوینا شەھید (قادر کەریمی)یێ کو د سالا 2015ێ دا ژ ئالیێ چەکدارێن پەکەکێ ڤە ھاتیە شەھیدکرن بستینن و پشترا ژی بانگەکا وسا بەلاڤ بکن. پەکەکە ھێزەکا ترکیایە و چ پەیوەندی ب پرسگرێکا کوردان ڤە نینە. ھەر ھێز یان ژی پارتیەکا کورد کو لگەل پەکەکێ دا ل سەر میزەی بجڤیت و بانگا یەکیتیا نەتەوەیی بکە، خیانەتێ ل نەتەوەیا کورد دکە.

-مەدیایا پەکەکێ، بەردەڤکێ داگیرکەرێن کوردستانێ

ھەر بوویەرەک کو ل کوردستانێ دقەومە، ئەرکێ چاپەمەنیێ یە کو ب پرەنسیپ و ھشمەندیا کوردی بوویەران شرۆڤە بکە. ژ بەر کو مەدیا دکارە رۆلەک مەزن د ھشیارکرنا خەلکی دا بگێریت. لێ بەلێ مەدیا پەکەکێ ھەرتم ل دژی کوردان بوویە و ل کێلەکا دژمنان دا جھ گرتیە. دەما مرۆڤ ل مەدیایا پەکەکێ دنێرە، فێم دکە چاوا میتا ترکان و ئیستیخباراتا ئیرانێ، پەکەکێ ل دژی کوردان ب کار تینن. زێدەگاڤی نینە کو مرۆڤ ببێژیت چاپەمەنیا ھەری بێ ئەخلاق و دژر-کورد یا دنیایێ، چاپەمەنیا پەکەکێیە. چ جاران رەوشا کوردان ل بەر چاڤان نەگرتنە، لێ ھەرتم دەست و لنگێن داگیرکەرێن کوردستانێ بوونە. دەما کو ئیرانێ ب رۆکەت و درۆنان ئێریشی ناڤەندێن حزبا دەمۆکرات، پاک، کۆمەلە کری، چاپەمەنیا پەکەکێ خوەست ڤێ مژارێ تەڤلیھەڤ بکە. (ئاژانسا مەزۆپۆتامیا) و (مەدیا خەبەر) نووچەیەکا دەرەوین یا تژی نەفرەت وەشاندن کو ئیرانێ ب ئاگاھدارییا حکوومەتا ھەرێمێ ئەڤ ئێریشە ئەنجامدایە و ھەرێمێن پەدەکێ بۆمبەباران کریە. لێ پشتی چەند دەمژمێران چاپەمەنیا فەرمی یا رەژیما ئیرانێ ژی ھەمان نووچە پارڤە کر!

ژ بەر ڤێ یەکێ دڤێت ئەم ل ڤر بپرسین:

-پەکەکێ ئەڤ نووچە ژ سازییا ئیستخباراتا ئیرانێ (ئیتلاعات)ێ وەرگرتیە یان ژی سازییا ئیستخباراتا ئیرانێ (ئیتلاعات)ێ ئەڤ نووچە ژ پەکەکێ وەرگرتیە؟

-کی ئەڤ نووچە چێکریە؟

-کی خوە ل پشت ڤان پلانان ڤەدشێرە کو دخوازە کوردێن باشوور و رۆژھلات بکە دژمنێ ھەڤ؟

د ڤر دا ئەم دگھێژن ڤێ راستیێ کو پەکەکە ب خورتی د ناڤا ئیستیخباراتا ئیرانێ دا جھ دگرە و گەلەک ب دلسۆزی خزمەتا رەژیما ئیرانێ دکە. پێشەنگێن پەکەکێ یێن وەکە جەمیل بایک، ھەرتم وەکە فەرماندارەکی ئارتێشا قودسا پاسداران ل دژی گەلێ کورد دەردکەڤن و دئاخڤن.

دڤێت گەلێ کوردستانێ ب تایبەتی یێن ل رۆژھلات و باشوورێ کوردستانێ گەلەک ب ھشمەندی تەڤبگەرن. رەژیما ئیرانێ ب رێیا پەکەکێ دخوازە خەلکی بخاپینیت و بالا جیھانێ و کوردستانێ یا ل سەر سەرھلدانا رۆژھلاتێ کوردستانێ بگوهەریت. چ ئیرۆ بە چ ژی سبە دێ رەژیما ئیرانێ ھلوەشە. ئەڤجا د پێشەرۆژێ دا پەکەکە دێ بیتە جەحشێ کێ؟ ئەم ل بەندێ بن و ببینن. دنیا یا بەرفرەھە.

دلۆڤان عەلی

پوستێن ھەمان بەش