بووبێ ئەسەر
“د وەلاتەکی دا رێخستنەکا تەرۆرێ د 40 سالان دە نەیێ قەداندنێ، یێن وە ب رێڤە دبن ژ وێ رێخستنێ یە” جۆلیۆس قەیسەر.
پەکەکە و ھەدەپە ب ھەمی ھێز و قاوەتێن خوە، د ھەمی تەلەڤزۆن و مەدیایێن خوە دا دژمناتیا بارزانیان دکە. ژ بۆنا بارزانی ب سەر نەکەڤن چ ژ وان ھاتیە تەخسیر نەکرنە و چ جاران ژی تەخسیر ناکن.
چما پەکەکە ل دژی بارزانیانە؟؟؟
رۆژا کو بارزانیان دەست ب تەکۆشینا ئازادیا گەلێ خوە کرنە و ھەتا رۆژا ئاڤاکرنا باشوورێ کوردستانێ داگیرکەرێن مە ب ھەمی ھێزێن خوە، ب ھەمی مەدیا و پرۆپاگاندێن خوە ل دژی بارزانیان راوەستیانە، ژ بۆنا ئەو ب سەرنەکەڤن.
داگیرکەرێن مە ئەڤ یەک باش فێم کربوون و کرنە کو چ دەما بارزانی ب سەرکەتن دێ کوردستانەکا ئازاد و سەربخوە ژی پێک بێ. لۆما ل دژ بارزانیان راوەستیانە و رادوەستن دا کو بارزانی چ دەستکەڤتیان ب دەست نەخن.
ژ بەر کو ھەر دەستکەتنەکا بارزانیان ھلوەشاندنا دیوارێ داگیرکەرییێ یە. داگیرکەرێن مە باش دزانن کو ئازادبوونا پارچەیەک ژ کوردستانێ، ئازادی و ئاڤاکرنا پارچەیێن دنە.
داگیرکەرێن مە ھەتا سالا 1992یێ د ھەر واری دا و د ھەر رێ و ئۆلاخاندا، ژ بۆنا کورد بسەرنەکەڤن تم ل گەل ھەڤ و ب یەک ھەلوەستێ ل دژی بارزانیان ھەلوەست دگرتن و دگرن. لێ پشتی ئازادیا باشوورێ کوردستانێ، ئێدی داگیرکەرێن مە ژی خواست رەنگ و ھەلوەستێن خوە بگوھەرن. ژ بۆنا کوردستانەکا ئازاد و سەربخوە نەیێ راگھاندنێ ھن تەڤگەرێن ژ کوردان لێ ب وان ڤە گرێدایی ئانکو یێن وان بج خوە دامەزراندبوون دا کو ئەو بکەڤن پێخیلا بارزانیان ژ بۆنا دەولەتەکا کوردی نەیێ دامەزراندنێ.
پشتی ئازادیا باشوورێ کوردستانێ و گاڤ ب گاڤ بەرب سەرخوەبوونێ ڤە چووینا وان، پەکەکێ گۆت ئێدی دەما دامەزراندنا دەولەتێن نوو دەرباس بوویە. ب ڤێ ھەلوەستا خوە ژی و ب ھەمی ھێز و قاوەتێن خوە ل دژی باشوورێ کوردستانێ راوەستیان و رادوەستن دا کو ور نەبە دەولەتەکا کوردی یا سەربخوە.
لۆما ل سەر ھەر کوردەکی/ێ فەرزە کو ئەو ژی ژ بۆنا ببن دەولەت و ئالا کوردی د ناڤا ئالا جیھانێ دا بێ ھلدان دڤێ پشتگریا بارزانیان بکن دا کو سەرۆک مەسعوود بارزانی ژی مزگنیا دامەزراندنا دەولەتا کوردی بدە ھەمی کوردێن ل جیھانێ.
پەکەکە ب ھەمی ھێزا خوە وەکە ل دژ پارتیا ئاکەپێ و ئەردۆگان کار و خەباتێ دکن. چما؟ ژ بەر کو ئەردۆگان و پارتیا وی ژ دەستپێکێ دا خوەست کێشەیا کوردی ل گۆر خوە چارەسەر بکە. یانی خوەستن دبستانێن کوردی ڤەکن. د ھن زانینگەهان دا زمانێ کوردی بدن خوەندنێ. تەلەڤزیۆنەک 24 دەمژمێری ب کوردی ڤەکرن و ھن تشتێن دن.
یانی دخوەستن ل گۆر بەرژەوەندیێن خوە لێ دا فایدێ کوردان گەلەکی تێدا ھەبا، ھن گاڤێن ئەرێنی باڤێژن. ب وێ گاڤ هاڤێتنێ دا کورد پیچەک ئارامیێ بینن.
لۆما د دەستپێکێ دا وەکە موخاتاب ژی ھەدەپە دیتن. خوەستن ڤێ کێشەیێ ل گەل وان چارەسەر بکە لێ ھەدەپێ نەکر و نەخوەست بکە. ژ بەر کو مفایێ کوردان دا تێدا گەلەک بیت.
پەکەکە ل دژی ئالا کورد و کوردستانێ یە. ئەڤ ئالا ژ دەما سەریھلدانا ئاگرییێ بگرن ھەتا رۆژا ئیرۆ وەکە ئالا کوردان و کوردستانێ تێ ناسین. ژ بەر کو ھەر ملەتەک ب ئالا خوە ھەنە لۆما پەکەکە-ھەدەپە ل دژ ڤی ئالای نە کو کورد وەکە نەتەو نەیێن ناسین.
لۆما ل دژ ڤێ ئالایێ پیرۆز، چەند پارچەیێن ب رەنگ پێشکێشی گەلێ کوردستانێ کرنە دا کو گەل ئالا خوە نەناسن و ژ بەر ڤێ خوە وەکە نەتەو نەبینە. ژ بەر کو باش تێ زانین کو ھەر ملەتەک ب ئالا خوە تێ ناسین.
ئەڤ ئالا کو نھا ل سەر چیایێن باشوورێ کوردستانێ تێ ھلدان ئالا کوردانە. دنیا، دۆست و دژمنێ کوردان ژی ڤێ باش دزانن. لێ پەکەکە ژ بۆنا ئەڤ نەیێ قەبوولکرنێ چ ژ وان تێ وێ دکن.
ب راستی مرۆڤ دکارە گەلەک تشتان بێژە و ڤەبێژە. لێ ب ڤان میناکان باوەرم دێ پیچەکێ رەوش زەلال بوو بە. یان ژی دێ ھوین ل سەر ڤێ ژ نوودە بفکرن…
چ دەما کورد فکرین و ب ئاقلێ خوە تەڤگەریان ئاھا وێ دەمێ دێ بکاربن خوە ژی ژ داگیرکەریێ ئازاد بکن. ھەتا کورد ل گۆر دیتنا چاڤان تەڤبگەرن وێ نکاربن خوە ئازاد بکن. ژ خوە ئەڤ ژی ل گۆر دلێ وانە کو کورد ل گۆر دیتنا چاڤان تەڤبگەرن…
