ھەڤسەرۆکێ كه‌جه‌كێ جەمیل باییك، جارەکە دن ل ستێرک تی ڤی یێ ئاخڤی و هن نرخاندنێن دن یێن تەوشۆمەوشۆ کرن، جومعا یێ كو د تەڤ ژیانا خوە دە یێك گوللـە ژی ل دژی داگیرکەرێن کوردستانێ نەتەقاندی، د ئاخافتنێن خوه دە ب قاسی کو ئێریشی پەدەکێ و بارزانی کری، ئەوقاس ئێریشی ئەردۆگان، ئەتاتورک و دەولەتا ترک نەکر، هه‌لبه‌ت تشتەکی شاشە مرۆڤ ل بەندێ بە باییك باش بئاخڤە؛ ژ به‌ر كو باییك هه‌مان کەسە یێ ل سەر خوینا زارۆك و جوانێن كوردان ژیان دکە، وی هه‌یا رێھەڤالێن خوە بێ دودلی قه‌تلكرنه، لۆما ژی وێ ت باشی ژ باییك وه‌ره ھێڤی كرن.
باییك وەکە هەر تم خوەست ب بیرئانینا «شەهیدێن» پەکەکێ بازارەکی ب خوینا وان بکە و روویێ خوە یێ رەش ل پشت خوینا وان یا پاك بڤەشێرە.
باییك و ده‌ره‌وا ڤەگەرا ئۆجالان بۆ ترکیێ
هەر كورده‌ك راستیا ڤەگەرا ئۆجالان بۆ ترکیێ دزانە، هه‌ر كورده‌ك دزانه چ پیلان ل سەر ئۆجالان نەهاتنە مەشاندن، تشتا هاتی ژیان کرن ئه‌ڤه: «یێك ژ ژ چێکریێن دەستێ میتێ ڤه‌گه‌ری مالا خوه، ژ بۆ كو پیلانێن ده‌وله‌تێ جی ب جی بكه».
گه‌لێ كورد ب ته‌ڤاهی ئۆجالان ناس كر وه‌ختا ل كینیا ته‌سلیم بووی، وه‌ختا رازینه‌بوویی ل به‌ر خوه بده، وه‌ختا د بالافرێ ده ژ ئه‌فسه‌رێن تركان ره گۆتی ئه‌ز ژ بۆی خزمه‌تێ ئاماده‌مه، ته‌سلیمبوونا وی نیشان دا كو ئه‌ڤ زلام چێكریێ میتێ یه و ئه‌ركه‌كی وی هه‌یه، گەر وەکە پەکەکە دبێژە گرتنا ئۆجالان پیلان بوو، هەر چ نەبە ل وێ دەمێ ئۆجالان دا هنەکێ ل بەر خوە بدە، دا چه‌كی ژ پاسەوانا خوە یا ژن یا کو دخوەست ل بەر خوە بدە بستینە و ئێریشێ وێ تیمێ بکە یا کو ژ بۆی گرتنا وی هاتنە کینیایێ، لێ ئۆجالان نە تەنێ بەرخوەدان نەکر بەلکو گۆت: «ژ من دخوەستن بەرخوەدانەکه کلاسیک بکم» ئانکو ئۆجالان هلگرتنا چەکی ب بەرخوەدانەک کلاسیک دزانە و لاییقی خوە نابینە، ئۆجالان ڤێ یەکێ تەنێ لاییقی جوانێن کوردان دبینە، ژ خوە ئەرکا وی یا سەرەکە ژی هەر ئه‌ڤه بوو ئانكو شاندنا جوانێن کوردان ژ بۆی مرنێ.
گۆتنێن ئۆجالان یێن د بالافرێ ده ل ده‌ما ڤه‌گه‌رێ، هێژان د هشێ هه‌ر كورده‌كی ده نه، ژ خوه ئۆجالان د بالافرێ ده ژ ئەندامێن میتێ گۆت: «دەرفەتێ ب من بدن، ئەز ژ بۆی خزمەتکرنا دەولەتا ترک ئامادەمە»، هه‌ر وها گۆتنێن وی یێن ل دادگه‌هێ وه‌ختا داخوازا عه‌فۆیێ ژ دایكێن عه‌سكه‌رێن تركان كری ل بیرا هه‌ر كورده‌كی مانه، گه‌لو ئەڤجا باییك قالا کیژان پیلانێ و کیژان بەرخوەدانێ دکە؟! باییک دفکرە کوردان مەژیکێ کەرێ خواریە و ت تشتەکی فێم ناکن؟ یان دفكره كورد د گوهێ گای ده رازاینه و هایا وان ژ تشته‌كی تونه؟ نا ئاپێ جومعه، کورد شیارن هەر تشتی فێم دکن و پیویستیا وان نرخاندنێن پیرەپڤەکێ خەرفتی یێ مینا وه تونە.
وەکە هوون قال دکن، ت کۆمپلۆ ل دژی ئۆجالان پێک نەهاتنە، د ئەساس دە ئۆجالان ب کێفا دلێ خوە لێ ب پلانەکە هوور ئه‌رێكرنه‌كه پێشوه‌خت ڤەگەری یه مالا خوه ترکیێ، کۆمپلۆیا هەری مەزن ئا ل سەر گەلێ کورد پەکەکە ب خوە یە، تشتا کو دەولەتێن داگیرکەر نەدکارین ب کوردان بکن، ب ئاڤاکرنا پەکەکێ ب کوردان کرن.
ئەڤ نە بارزانی یە وەکە جەمیل باییك دبێژه دکە ترک هەر تشتی داتینە پێشبەری وی ژ بۆ كو پێک بینه، هەلوەست، دیرۆک و بەرخوەدانا ب ده‌هان سالان یا بارزانییان، خوەنەتەواندنا وان ژ بۆی داگیرکەرێن کوردستانێ، شۆرەشێن یێك ل پەی یێك و رێبەرتیا وان د رزگارکرنا باشوورێ کوردستانێ دە شاهدێن وه‌لاتپارێزیا بارزانی و خه‌باتا بارزانییانه.
یا راست، ئەڤ ئۆجالان و پەکەکە نە کو دەولەتا ترک هەر تشتی داتینە پێشبەری وان و ئه‌و ته‌نێ جی ب جی دكن، دەولەتا ترك هەر تشت دانی به‌ر سینگا ئۆجالان و ژێ ره گۆتن پێویسته هوون پێک بینن؛ ئۆجالان ژی ب رییا پەکەکێ، فه‌رمان و پیلانێن ده‌وله‌تێ و میتێ پێك تینه.
بارزانی هەڤکارێ میتێ یە یان ئۆجالان؟
جەمیل باییك د ئاخافتنا خوە دە پەدەکە و بارزانی ب هەڤکاریکرنا میتێ سووچبار کر و گۆت: «ھەر کەس ڤێ یەکێ دزانە» لێبه‌لێ ھەر کەس دزانە عەڤدلا ئۆجالان شێورمەندیێ ژ بۆی دەولەتا ترک دکە و پەکەکە ژی مینا پرا دەرباسبوونا ترکیێ یه بۆ باشوورێ کوردستانێ، ئه‌ڤ كوردستانا کو ترکیە دخوازە داگیر بكه.
عەڤدلا ئۆجالان ب خوە د زیندانا ئیمرالیێ دە ژ نوونەرێ میتێ رە گۆتیە: «بارزانی خه‌ته‌ره، ئەو وێ ل گەل ویلایەتێن یەکبوویی یێن ئەمەریکایێ دەولەتا کوردی دامەزرینە، لەوما ژی پێویسته ترکیە و پەکەکە ب ھەڤ رە ھەولێرێ دۆرپێچ بکن»، ھەموو ڤیدیۆیێن ڤان ئاخفتنێن ئاپۆ ل بەر دەستن و هەر کەسێ دیتنە، قەید و ئیفادەیێن ئاپۆ یێن ل دادگەھێ ژی ھەنە، ئەڤجا باییك دخوازە چ بێژە بلا ببێژە، باییك ب دره‌وێن خوە نکارە راستیەکە ئەوقاس زەلال شوولی بکە، نکارە وه‌له‌دێ خوه یێ حه‌رام بخە کۆشا ت کەسەک دن دە، ئەڤ راستی دەمەکە هاتییە ئیسبات کرن کو ئۆجالان و پەکەکە گارانتۆرێن پەیمانا «میساقا مللی» یا ترکیێ نە.
ھەڤکارێ ھەری مەزنێ میتێ ئەو کەس و ئالی نە کو ژ بۆ ترکیایەکا دەمۆکراتیک، ژ بۆی خووشک و براتیا سەختە یا گەلان ب ھەزاران جوانێن کورد ب کوشتن ددن، بەلێ ب راستی ژی پەکەکە و رێبەرێ وێ هەڤکارێن دەولەتا ترکن، هەڤکارێن وێ دەولەتێ نە کو دەستێن وێ وەکە ئالێ وێ یێ هەرمی ب خوینا کوردان سۆر بوویە.
گەلۆ ئاپۆ ب راستی ژی د زیندانێ دە یە؟
باییک د داخویانیێن خوە دە پر جاران دبێژە: «گەر کو مە کاری رێبەر ئاپۆ ب ئاوایێ فیزیکی ئازاد بکن، پرسگرێکا کورد چارەسەر دبە». یا راست چ جاران رێبەرێ باییک ب قاسی نها ئازاد نەبوویە، نە ژ ئالیێ فیزیکی و نە ژی ژ ئالیێ فکری ڤه، دەولەتا ترک ژ بۆ کو ئۆجالان بکارە ب ئاوایەکی سەرکەتی شێورێ ب وان رە بکە، ل ئیمرالیێ هەر تشت ژێ ره بەرهەڤ کری یە، ل دووڤ داخوازا ئۆجالان هن ژ رێهەڤالێن وی برنە ئیمرالیێ، تەلەفزیۆن، پرتووک و هەر تشت ژ وی رە ئامادە کریە، بەرەڤاژی گۆتنێن باییك و پەکەکێ دەولەتا ترک چ ئیشکەنجەیەکی ل وی ناکە، ژ بەر کو پێویستی ب ئیشکەنجەیێ تونە، تشتا کو دەولەت ژ ئۆجالان دخوازە راسته‌راست پێک تینە.
دڤێ باییک و رێخستنا وی باش فێم بکن كو ب پەسندایینا به‌رده‌وام ئا بێ واتە ژ بۆی رێبەرێ وان راستی نایێن ڤەشارتن، داخویانی، گۆتن، سەکنا ساخته و هەلوەستێن ب شه‌رمه‌زاری یێن ئۆجالان كو ڤیدیۆ هه‌نه و ئێعتیرافێن وی راستیا وی نیشا هه‌موو جیهانێ و هه‌ر كورده‌كی دای یه، تشتا ئۆجالان كری ب ده‌ره‌وان نایێ جوان كرن.
ئۆجالان ل ئیمرالیێ نە ب تەنێ ل بەر خوە نەدا بەلکو نەکاری ب قاسی «شەمدین ساکک» کو د ناڤا پەکەکێ دە ب خایین و ئێعتیرافچی تێ ناسکرن ژی ل بەر خوە بدە، ئۆجالان ل ئیمرالیێ دژاتیا خوە یا ژ بۆی بارزانی و دەولەتا کوردی ب ئەشکەرە ئانیە زمان، هەر وها جی و ناڤێن یەکینەیێن پەکەکێ و کەسێن ئالیکارییا گەریلا دکرن تەڤ ب دەولەتا ترکیێ دان، ئۆجالان ب دەهان رێ ژ بۆی دژاتیکرنا بارزانی و دەولەتا کوردستانێ دان به‌ر سینگێ دەولەتێ، ئەڤجا دەولەت چما وێ ئیشکەنجەیێ ل ئۆجالان بکە؟
ئەو کەس تێ ئیشکەنجەکرن کو ل بەر خوە بدە، تەسلیم نەبە و ئێعتیرافێ نەکە، کەسەک کو مینا ئۆجالان تەڤ بگەرە ت پێویستی ب ئیشکەنجەیا وی تونه، یێن کو تێن ئیشکەنجە کرن زەعیف و ژار دبن، لێبه‌لێ باش ل ئۆجالان بنێرن، گەلۆ قه‌ی زکێ وی یێ مەزن ره‌نگێ ئیشكه‌نجه‌یێ دده؟ یان ره‌نگێ كێف و خوه‌شیێ؟!.
تێکدانا براتییا کوردان ژ بۆ ئاڤاکرنا براتییا گەلان!
باییك د بەرنامەیا ستێرک تی ڤی یا پەکەکێ دە ئەو قاس بێ شەرم و بێ ئەدەب دئاخڤە کو ئێریشی سەر بارزانی دکە و بەرەڤاژی ژی پەسنا دژمنێن کوردان ددە، باییك پەسنا مستەفا کەمال ئەتاتورک ددە و دبێژە: «دەما کو کۆمارا ترکیێ نوو ئاڤا دبە ژی ئاخافتنا مستەفا کەمال ھەنە، نڤیس ھەنە؛ د مەجلیسا ترکیێ دە کورد ھەنە، ئاخافتنا وان ھەنە، مستەفا کەمال ھەتا خوەسه‌ریێ قەبوول دکە»، ب ڤێ یەکێ ژی باییك دخوازە دژمنێ سەرەکە یێ کوردان، کەسێ کو کورد قەتلعام کرنە وەکە کەسەک مەعقوول نیشان بدە و ب کوردان بدە قەبوول کرن، باییک پر ب روو قاییمی تێ و دبێژە مستەفا کەمال خوەسەریا کوردان قەبوول دکر»، هۆۆۆۆ باییكێ نەزان، هنەکێ ل دیرۆکێ بنێرە، وێ دەمێ تو وێ فام بکی مستەفا کەمال چ تاوان و سووچێن مەزن ل دژی کوردان پێکئانینە.
نە تشتەکی عەجێبە کو باییك پەسنا ئه‌تاتورك بدە، باییك ئەڤ یەک ژ رێبەرێ خوە فێر بوویە، ئۆجالان ژی ب دەهان جاران پەسنا ئه‌تاتورك دایە، ب پەسندایینا دژمنەکی وەکە مستەفا کەمال و بێ روومەتیکرنا ولاتپارێزەکی وەکە بارزانی، باییك و رێبەرێ خوە ئیخانەتێ ل خوینا شەهیدێن کوردان دکن، شه‌هیدێن كو ب وێ رێبازا بارزانی ئاڤاكری، كوردستان ژ ده‌ستێ هۆڤترین ده‌وله‌تا داگیركه‌ر رزگارین.
باییك ب ڤێ یەکێ ناسەکنە، د مژارا کوشتنا کادرۆیا پەکەکێ یا ب ناڤێ «ناگیهان ئاکارسەل» کو ل 4/10/2022ان ل تاخا بەختیاری یا سلێمانیێ هاتبوو قەتلکرن دە ب گۆتنێن خوە خوەست ئاشتیا جڤاکی یا کوردان تێک بدە، خوەست گەلێ مە یێ سلێمانیێ ژ باژارێن دن ڤەقەتینە و باژارێ سلێمانیێ ب «هەرێما سۆران» ب ناڤ کر، ل شوونا دەولەتا ترکیێ رەخنە بکە دیسا پەدەکه رەخنە کر.
ژ خوە هەر دەما کادرۆ یان گەریلایەک پەکەکێ ل باشوورێ کوردستانێ تێ کوشتن، پەکەکە و بەرپرسێن وێ بێی کو ت لێکۆلینێ بکن، بێی کو ت بەلگەیەک د دەستێ وان دە هەبە، راستەراست پەدەکێ و بارزانی هەدەف دگرن و ئێریشێ سەر وان دکن، د چاپەمەنیا خوە دە قالا وێ یەکێ دکن کو پەدەکە و ئیستیخباراتا وێ ئاگاهیان ددن دەولەتا ترکیێ، پەکەکە تەڤی کو دزانە پەدەکە ل سلێمانیێ نە دەستهلاتدارە، تەڤی کو ت بەلگەیەک د دەستێ وێ دە تونە کو پەدەکێ پێ تاوانبار بکە، لێ دیسا ژی پەدەکێ و بارزانی ب هەڤکاریکرنا ترکیێ و کوشتنا ئەندامێن خوە سووچبار دکە، پەکەکە ب هێزا پەیڤان هەر تشتەکی نە باش ددە پال پەدەکێ، ئەڤ ژی ئەوە یا کو دەولەتێن داگیرکەر ژێ دخوازن.
ناڤکرنا سلێمانیێ ب هەرێما سۆران و ناساندنا وێ وەکە «ھەرێما رەوشەنبیر، رۆناکبیر، نڤیسکار و ئاکادەمیسیەنان» ب وێ واتەیێ تێ کو سلێمانیێ ژ هەولێر و دهۆکێ ڤەقەتینە و گەلێ ڤان دو باژارێن باشوورێ کوردستانێ ب کەسێن پاشڤەروو و نەزان ناڤ بکە، ئەڤ نە جارا یەکەمە کو باییک ڤێ یەکێ دکە، پێش نها ژی باییک گەلێ بەهدینانێ کو ب هەزاران شەهیدێن وان هەنە ب سیخۆر و کرێگرتیێن دەولەتا ترکیێ ناڤ کربوون.
دڤێ باییک، رێبەرێ وی و رێخستنا وی باش بزانبن سلێمانیێ نە هەرێما سۆرانە، سلێمانیێ وەکە هەولێرێ، وەکە دهۆکێ و وەکە کەرکووکێ باژارەکی باشوورێ کوردستانێ یە، ل کوردستانێ ب تەنێ ل سلێمانیێ گەل ب سۆرانی نائاخڤە، ل هەولێرێ، کەرکووک، گەرمیانێ، هەر وها ل مەهاباد و سنە و سەقز یێن رۆژهلاتێ کوردستانێ ژی گەلێ مە ب سۆرانی دپەیڤە، بناڤکرنا سلێمانیێ ب هەرێما سۆرانێ ناکەڤە خزمەتا کوردان، بەرەڤاژی دبە سەدەمەک ژ بۆی ژ هه‌ڤ دوورکرنا کوردان و تێکدانا ئاشتییا جڤاکی ل کوردستانێ ب گشتی و ل باشوور ب تایبەتی.
جەردەڤانێن کوردان کینە؟
بنکەتن یان سەرکەتنا د شەر دە ب ئاخافتنان نایێ دیارکرن، ئەڤ یەک ب هەبوونا پراتیک د قادێن شەر دە تێ خوەیاکرن، پەکەکە ل کۆ بوو و نها کۆ یە؟ بەرسڤا ڤێ پرسێ بەسە کو مرۆڤ فێم بکە پەکەکە د شەرێ خوە یێ ساختە دە سەرکەتیە یان ژی بنکەتیە، پەکەکە ل باکور هات دامه‌زراندن، پێتر ژ 40 سالانە قالا سەرکەتنێ دکە، لێ هەر کو دچە پێتر ئاخا کوردستانێ تەسلیمی ترکیێ دکە، پەکەکێ تەڤ باکورێ کوردستانێ تەسلیمی ترکیێ کری یە.
پەکەکە نکارە ل باکورێ کوردستانێ یەک چالاکیێ پێک بینە، مە چالاکی دەرباس کر، ما نکارە بنگەھەکی خوە ژی چێبکە، د راستیێ دا پەکەکێ ژ سالێن 2000ێ و ڤر ڤە تەنێ ژ بۆ کو چەرخێن خوە بزڤرینە، ب بەردەوامی شەرێ گەریلا یێ کەڤنار دوبارە دکە، جوانێن کورد دکە قوربانی. کەسێن وەکی جەمیل باییك د قادەکا بچووکا سیاسی و جوگرافی یا ب خوینا جوانێن کورد هاتیە ئازادکرن ژیانا خوە ب رەنگەکێ ئەولە دبۆرینن. نھا ژی ژ بۆ کو ڤێ راستیێ ڤەشێرن، ھەول ددن کو پەدەکێ ژ بۆ وان بنکەتنێن خوە یێن کو ل باشوور دیتنە تاوانبار بکن.
باییک دبێژە: «دەولەتا ترک ھەر رۆژ دەربان ل سەر ھەڤ دخوە و ژ بەر کو خوە ناگھینە ھەدەفێن خوە، زێدەتر ئێریشان دکە، دەما کو تەڤی ھەموو دەرفەتێن خوە نکارە ب سەر بکەڤە، ڤێ جارێ بارزانییان دخە دەورێ، ژ خوە ل پشت وان ناتۆ ھەیە، ب ھەموو دەرفەتێن ناتۆیێ ڤی شەری دمەشینن، لێ ئەڤ ژی تێرێ ناکە، دڤێ ھنەک کەسێن کو ژ خوە رە دبێژن کورد تێخن دەورێ، چاوا کو ل باکور جەردەڤان خستنە دەورێ، ل باشوور ژی بارزانییان دخن دەورێ، بارزانی جەردەڤانێن باشوورن».
گەلۆ باییک چاوا دفکرە؟ هوون دبێژن مەژیکێ وی هەبە؟ ئاخر پەکەکێ ل کیژان قادێ سەرکەتن ئانیە؟ گەلۆ سەرکەتن ب واتەیا دەستڤەبەردانا ئاخێ تێ یان ب دەست خستنا ئاخێ؟ پەکەکێ تەڤ باکورێ کوردستانێ، بەشەکی رۆژئاڤا و بەشەکی باشوورێ کوردستانێ تەسلیمی ترکیێ کریە لێ دیسا خوە وەکە سەرکەتی دبینە!
ما قەی ل ئامەدێ، ل گارزانێ، ل شەمزینانێ، ل سەرحەدێ و ل عەفرینێ ژی پەدەکە و بارزانی هەبوون کو وە ئەو دەر تەسلیمی ترکیێ کرن؟ کێ رێ ل وە گرت کو هوون ل وان هەرێمان بەرخوەدانێ بکن و دەولەتا ترک بشکینن و رێ نەدن ئاخا کوردان داگیر بکە، پەدەکێ؟ نا هەر کەس دزانە پەکەکە چێکریا دەستێ ترکیێ یە، ئه‌ركا په‌كه‌كێ رییا ده‌وله‌تا ترك ڤه‌دكه، جەردەڤانێن کوردان پەکەکه‌یی نە، ئۆجالان ژی جەردەڤانێ مه‌زن و رێبه‌رێ جه‌رده‌ڤانان نه.
باییک ئەوقاس بێ ئەدەب و بێ ئەخلاق دپەیڤە کو تشتەکی ترکیێ ب خوە ژی ئێعتیراف ل سەر کری و د تەڤ مەدیایا خوە دە پارڤە کری ژی دخە ستوویێ پەدەکێ، دەربارێ 5 گەریلایێن پەکەکێ یێن ل بالیسانێ ژ ئالیێ بالافرێن ترکیێ هاتین هەدەفگرتن دبێژە: «ل گۆری ئاگاھیێن ژ مە رە ھاتنە، بالافرێن دەولەتا ترک ئێریشی ھەڤالێن مە نەکرنە، پەدەکێ ژ بۆ ھەڤالێن مە کەمین دانیبوون، ئێریشێ ھەڤالێن مە کرنە، دو ھەڤالێن مە شەھید خستن، سێ ھەڤالێن کو بریندار کرن ژی ل گەل خوە برنە، د دەستێ مە دە ئەڤ ئاگاھی ھەنە»، لێ بنێرن ژ بۆی دژاتیکرنا پەدەکێ و بارزانی رێڤەبەرێن پەکەکێ ژ بۆ ئێریشێن ترکیێ هێنجەتان دگرن و دخوازن کوشتنا گەریلایان بخن ستوویێ کوردان، ئەو قەت ناخوازن راستیێ ببێژن، ژ بەر کو راستی نە د بەرژەوەندیا وان دە یە.
باییک ژ بۆی ئیسبات کرنا ڤێ ئاخافتنا خوە ژی دبێژە: «بالافرێن کەشفێ یێن دەولەتا ترک نکارن ل بالیسانێ ھەڤالێن مە تەسپیت بکن، لێ بارزانی دکارن تەسپیت بکن و ئاگاھیێ بدن، نەخوە بالافرێن کەشفێ یێن دەولەتا ترک وێ چاوان بزانبن کو ل دۆلا بالیسانێ 5 کەس دمەشن؟ تشتەک وھا نە پێکانە، ئەڤ ب دەستێ پەدەکێ و بارزانییان روو ددە»، ل ڤڕ ئەم ژ باییک و رێخستنا وی دپرسن گەلۆ گەر ووسا بە، ژ کەرەما خوە ژ مە رە بێژە، بالافرێن کەشفێ یێن دەولەتا ترک چەوا هەڤالێن وە یێن ل رۆژئاڤا تەسبیت دکن و هەدەف دگرن، بالافرێن کەشفێ چاوا ب سەدان رێڤەبەرێن وە یێن ل قەندیلێ، شه‌نگالێ و حەفتەنینێ تەسبیت کرنە و هەدەف گرتنە؟ قەی ل ور ژی بارزانی هەنە؟
ب کورتاسی، بلا جومعا و رێهه‌ڤالێن وی یێن رێڤه‌برییا رێخستنێ باش بزانن، گه‌لێ كورد ئێدی نه‌ما ب ڤان ئاخافتنێن بێ واته، وه‌ره خاپاندن، گه‌لێ كورد ژ مێژ ڤه یه وه‌لاتپارێز ناس كری نه و جه‌رده‌ڤانان ژی ناس كرینه.
