بەری دو رۆژان بهیانهك ژ ئالیێ پارتیا پهكهكێ یا ل رۆژهلاتێ کوردستانێ پژاکێ ڤە هات بهلاڤ كرن، ئالیێ هەره گرنگێ ڤێ بهیانێ ئەو بوو کو دبێژیت: «ئەم دێ ئالا کۆمارا مەهابادێ ب کار ئینین». لێ پرسگرێکا ئالای و هەموو گۆتنێن د بهیانێ دا نیشانا خیانهتا ل گەلێ شۆرەشگەر و تێکۆشەرێ رۆژهلاتێ کوردستانێ یە و عهمالهتا سیاسەتا پهكهكێ یا «دژه- کوردە».
پژاک د هەموو کۆنگرە و کۆمبوونێن خوە دا وێنەیێن سەرۆکێ پهكهكێ ئۆجەلان بلند دكهت، ژ نیشكهكێ ڤە قازی محەمەد کێ ئینا بیرا پهكهكێ.
پژاک یا كو ل سالا 2003 هاتییه دامەزراندن، پژاک یا کو د هەموو کۆنگرەیێن خوە دا ل سالۆنا کۆنگرەی وێنەیێن عهڤدللا ئۆجەلانی د ههلاویسیت، د وان کۆنگرەیان دا یەک وێنەیێ پێشەوا قازی محەمەد نه ههلاویستی یه، ژ نیشکهكێ ڤە گۆت کو ئەم دێ ئالایێ کۆمارا کوردستانێ ب کار ئینین.
هەمان پژاکێ د داخویانیا خوە دا گۆت: «ئەم ل دژی هەر جورە تێگههشتنهكێ نه دهربارهی ئالا و سەمبۆلان»، لێ هەمان پژاکێ و دووڤەلانکێن پهكهكێ ب سەدان سەمبۆل و وێنەیێن ئۆجەلان یێن رهنگین ل ئەورۆپا، رۆژئاڤا، هەتا د کۆنگرەیێن خوە یێن چیایی دا ژی ههلاویستن و بلند كرن، 5 ئەندامێن «پژاکێ – کۆدارێ» دچنه مەشا ل ئەورۆپایێ، د دەستێ هەر ئێكی دا 3 پانكارت و ئالا ههنه و درووشمێن خوە دقێرینن، هەر چەنده ژ سەدی 90 یا مەشێن ل ئەورۆپایێ بنگەهێ پێکهاتەیێن وێ ژ پهدهكا ئیرانێ – کۆمەلێ و پاکێ بن ژی، چ پارتی ئالایێ پارتیا خوە راناکەن، لێ تەنێ ئەندامێن پژاکێ ئالا پارتی و پێکهاتەیێن خوە بلند دکەن.
پژاک دبێژیت: «ئەو کۆمارا کوردستانێ یا کو ل مەهابادێ هاتیە راگههاندن بۆ خوه دكهته نموونه»، ههگهر وهسا بیت، بلا د مژارا هێزێن لەشکەری دا ژی مەهابادێ بكهته نموونه و ناڤێ هێزێن لەشکەری یێن مەهابادێ كو «هێزێن پێشمەرگە» بوو، ل پێکهاتەیا خوه یا لەشکەری بكهت و ناڤێ یهرهكێ بكهته هێزا پێشمهرگه.
هەلبەت بهیانا پژاکێ ب رەخنەیەکا وهها سڤک ناهێت بهرسڤدان، ژ بەر کو ئەو داخویانی ب راستی بەلگەیا خیانەتێ یە، دڤێت راستیێن د ناڤا هەر پاراگرافهكا وێ دا ب باشی بهێنه ئەشکەرە کرن.
بهیانا پژاکێ 3 ئارمانجێن سەرەکی هەنە:
یەک: واتەیا وێ ئەو بوو کو ئەم ئالا فەرمی یا کوردستانێ یا کو نوکە هەرێما کوردستانێ ب فەرمی بکار دئینیت کو ژ ئالیێ هەموو کوردان و جیهانێ ڤە ب فەرمی هاتییە ناسکرن و د هەموو خوەپێشاندانێن خەلکێ رۆژههلاتێ کوردستانێ دا دهێته بکارئینان، پهكهكە دبێژیت ئەم ب کار نائینین.
دو: د بهیانا پژاکێ دا دەمۆکراتبوونا ئیرانێ دهێته خواستن، ئهڤه ژی وهكی داخوازا پهكهكێ یه بۆ تركیێ و سووریێ، واته تشتهك ب ناڤێ کوردایەتی و کوردستانێ نینه، ب گۆتنهكا دی ژ بۆ كو ئیرانێ رازی بکەت، پێویستیا مه ب کوردستانێ و مافێن ناسنامەیا کوردان نینە.
سێ: دوبارە تەکەز کرن کو چ نیەتا پژاکێ یا رووخاندنا دەولەتا ئیرانێ نینە، داخوازا گوهارتنا رژێمێ نینە و پێشنیارا وان یا شێوازەکێ نوو یێ برێڤهبرنێ نینە و تەکەز دکهن کو ئەو دێ ههر تاعهتێ بۆ دهولهتا ئیرانێ بكهن.
رێڤەبهرێن کارتۆنی
ب راستی ژی شاشە کو مرۆڤ ڤێ بهیانێ وەکی کو ژ هێلا پژاکێ ڤە هاتییه چێکرن ب نرخینیت، پژاک تێ واتەیا پهكهكه، پشتی خوەپێشاندانێن ژینا ئەمینی، هندەک کادرۆیێن پهكهكێ یێن رۆژههلاتێ کوردستانێ دەرکەتن سەر مەدیایێ و ل سەر ناڤێ رێخستنێن وەک کۆدار، پژاک و ههرهكێ داخویانی دان، هەڤسەرۆکا کۆدارێ، گولان فەهیم و هندهكێن دی هەر چەند كو هندەک سیفاتێن وەک هەڤسەرۆک، سەرۆک و رێڤەبەر ب وان هاتبنه دان ژی، لێ د راستیێ دا ئەو رێڤەبەرێن کارتۆنینە و چ كارتێكرنا خوه نینه، هێزا کو ب راستی پژاکێ برێڤە دبەت پهكهكە یە.
ئەو بهیان، بهیانا ئایدۆلۆژییا پهكهكهیی یێن وەکی جەمیل باییک، مستهفا قاراسو و بەسێ هۆزاتێ یە.
پهكهكە ئالا هەر دەولەتەکێ بلند دکەت، لێ تەنێ ئالا کوردستانێ قەبوول ناکەت
د جیهانێ دا دو هێز هەنە کو ئالا کوردستانێ رەد دکهن و ب هەموو هێزا خوە هەول ددهن کو ئالایا کوردستانێ ب کار نەئینن، ئێك پهكهكەیە، یا دن ژی دەولەتا ترکە.
پهكهكە ل ترکیێ ئالایێ ترکیێ بلند دکەت، د میتینگێن ههدهپێ دا ئالایێ دەولەتا ترک و وێنەیێن مستهفا کەمال بلند دكهت، پهكهكە ل سووریێ ئالایێ سووریێ بلن دکەت، ئالایێ سووریێ ل ناڤ قامشلۆیێ ههلاویستی یه، پهكهكە ل شنگالێ ئالایێ ئیراقێ بکار دئینیت، ل وێرێ، پێکهاتەیا لەشکەری یا پهكهكێ شەرڤانێن یهبهشێ ، ئالایێ ئیراقێ ب سەر ملێن خوە ڤهكرینه.
بۆ نموونه، هەر چ چهند کامپا مەخموورێ ژ ئالیێ پهكهكێ ڤە دهێته برێڤەبرن ژی، ب سالان ژ ئالیێ هەرێما کوردستانێ ڤە دهێته دەستەکرن، لێ دیسا ژی ئالا رەنگین ل وێرێ ناهێته بكارئینان.
پهكهكە باش دزانیت ئالایێ کو ئەو رەد دکەت ژ ئالیێ رێخستن و سەرۆکێن باکورێ کوردستانێ ڤە هاتییە چێکرن.
پهكهكەنە تەنێ ل رۆژههلاتێ کوردستانێ، ل هەموو دەڤەرێن جیهانێ د ناڤا جهماوهری دا ههول دایه ئالایێ رەنگین وەک ئالایێ پهدهكێ دەستنیشان بكهت، دخوازیت د ناڤا کوردان دا ل سەر ئالایێ رەنگین تێگەهەکێ چەوت ئاڤا بکەت، پهكهكە ژی باش دزانیت کو ئەڤ ئالا نە گرێدایی پهدهكێ یه، 26 سالان بەرییا کو پهدهكه بهێته دامەزراندن ئالایێ رەنگین هاتییە چێکرن.
ئالایێ رەنگین یێ ژ ئالیێ پهكهكێ ڤە هاتییە رەدکرن، ژ ناڤا دلێ باکورێ کوردستانێ دەرکەتی یە، ئالایێ رەنگین جارا ئێكێ د سالا 1920ێ دا ژ هێلا «كۆمهلهیا تەشکلاتا ئیجتیماعی» ڤە هاتییە چێکرن و پهسهند كرن.
د سەرهلدانا کۆچگری یا (1920-1921) دا ئەڤ ئالایێ رەنگین ژ ئالیێ عهلیشێر و نووری دێرسمی ڤە ل ئومرانیێ دهێته بلند كرن.
د دەما سەرهلدانا شێخ سەعید دا ژ هێلا لەهەنگێ سەرهلدانێ نەبی یێ وارتۆیی ڤە ل وارتۆیێ ئالایێ رەنگین ب ئاڤاهیا حکوومەتێ ڤە دهێته چکلاندن، كۆمهلهیا نەتەوهیی یا کورد خۆیبوونێ ئالایێ رەنگین وەک ئالایێ نەتەوەیی قەبوول كربوو.
خۆیبوون ڤێ ئالای ژ لبنانێ دهنێریته چیایێ ئاراراتێ، د گولانا 1928 دا ب ئامادەبوونا هەموو پێشەنگێن سەرهلدانێ و ب بەشدارییا گەلێ دەردۆر و ب ئامادەبوونا سەدان پێشمەرگەیێن چیایێ ئاگری ب ئونیفۆرمایێن لەشکەری ڤه بەشداری رێورەسمێن چکلاندنا ئالایێ کوردستانێ بوون، ئالا ژ ئالیێ لەهەنگێ شۆرەشا شێخ سهعید و یێ ئاگریێ سەیدخانێ یووسفێ سەیدۆ ڤە هاتییە بلندکرن، ئالایێ رەنگین ل ئاڤاهیێ شارەداریا مههابادێ ل 17ێ کانوونا 1945 هاتە ههلاویستن.
ئەڤ ئالایێ کەڤنار و پیرۆز د سەدسالا 20 دا ژی د تێکۆشینا هەبوونا نەتەوەیا کورد دا ب با كهتییه و نها ل هەرێما کوردستانا فەدەرال ژی ب فەرمی و شانازی دهێته بلندكرن.
زێدهباری ڤان راستیێن دیرۆکی ژی، دژمناتیا پهكهكێ یا ل هەمبەری ئالایێ کوردستانێ د مژارێن گرێدایی هەبوون و دامەزراندنا پهكهكێ دا یە، لێ ئهگهرێن ڤێ یێن دەروونی و ستراتیژی ژی هەنە، ژ بەر ڤێ ئهگهرێ شاشە کو مرۆڤ بێژیته پهكهكێ بێژە کانێ کەنگێ ئالایێ کوردستانێ چێبوویە، د وارێ دیرۆکی، سیاسی و دیپلۆماتیک دا ئالایێ کوردستانێ دهێته چ واتایهكێ، ژ بەر کو پهكهكە هەبوونا ئالایێ رەنگین وەکە نهمانا خوە دبینیت و ب زانەبوون دژمناتیا ئالایێ کوردستان دکەت.
ئهگهرا کو پژاک دبێژیت ئەم ئالایێ رەنگین ب کار نائینین، ژ بەر سەندرۆما پهكهكێ یا ئالا کوردستانێ یە.
پێشکەتن و گەشەدانێن ل رۆژهلاتێ کوردستانێ هەڤسەنگیا پهكهكێ هەژاند
شێوازێ سهرهلدانا ل پهی بوویەرا كچا کورد ژینا ئەمینی ل رۆژهلاتێ کوردستانێ و ئیرانێ دەستپێکری، نە تەنێ ل ئیرانێ، ل سەر تەڤاهیا هەرێمێ كارتێكرن کر، ژ ئالیەکێ ڤە هەر چەند ترکیە دلخوەش بیت ژی کو ئیران ب ڤی رەنگی ئاسێ مایە، لێ ژ بەر دیتنا کوردان وەک ناسنامە و گەشکرنا روحا ئێكگرتنێ د ناڤ کوردان دا، سههمهكێ د سهرێ ههموو داگیركهران دا چێدکەت.
لێ بەلێ ژ بەر خوەپێشاندانێن ژینا ئەمینی یا هەره زێدە ئیستیقرارا پهكهكێ تێک چوویه، ژ بەر کو پهكهكێ د پرۆسهیا رۆژههلاتا ناڤین دا کو ب بوهارا عەرەبی ڤە دەست پێ کربوو، بۆ ستراتیژییا ئیرانێ دلسۆزیا خوە دیار كر و د بن سەروەرییا ئیرانێ دا تەڤدگەریت.
د زڤستانا بۆری دا مستهفا قاراسوو ل تەهرانێ بوو، رزا ئالتۆن ژی نەخوەش بوو دیسا ل تەهرانێ هات دەرمان کرن، جەمیل باییک سالێ دو جارا دچیته تەهرانێ دختۆران دبینیت، جەمیل و بەسێ هۆزات ل دهڤهرێن چارتای، مێرگەپانێ و سەرگەل د بن چاڤدێرییا ئیرانێ دا دژین، رێبەر و سەرۆکێن رۆژهلاتێ کوردستانێ ل پایتەختێن ئەورۆپا ژ ئالیێ ئیرانێ ڤە دهێنه تیرۆرکرن، لێ ئیران سەرۆکێن پهكهكێ دەرمان دکەت، مانە ئەڤ راستیه بهسه کو مرۆڤ ببێژیت پهكهكە بەشەکە ژ هێزا پهسیج یا ئیرانێ.
پهكهكه دخوازیت بالا کوردان یا ل سەر ئیرانێ هەیی بهلاڤ بكهت
ژ بۆ ڤێ ژی پهكهكە هەول ددهت پرۆسهیا شۆرەشگەری یا ل ئیرانێ و رۆژههلاتێ کوردستانێ ژههری بكهت، دخوازیت بالێ ل سەر ئیرانێ راكهت، پهكهكێ ژ بۆ ڤێ دو گاڤێن مەزن هاڤێتن، چالاکیا 4ێ جۆتمەهێ ل مێرسینێ و 18ێ جۆتمەهێ ژی چالاکیا «بكارئینانا چەکێ کیمیەوی»، ڤان هەر دو پێنگاڤێن پهكهكێ ئارمانجا وێ ئەو کو بالا کوردان ل ئیرانێ ڤەگوهێزن جههكێ دی، پێڤاژۆیا ئیرانێ ژ رۆژەڤێ دووربێخن.
راگههاندنا پهكهكێ هێرشێن دەولەتا ئیرانێ ل سەر خهلكی سڤیل ژی ناکەته نووچه، د هێرشا دەولەتا ئیرانێ یا ل هەرێما کوردستانێ دا 26 کەسان ژیانا خوە ژ دەست دان، پهكهكێ ژی سەرساخیەک نەدا پارتیێن کوردان.
پهكهكە ڤێ یەکێ ل گۆری پەیمانا ستراتیجی یا سالا 2011 یا ل گهل ئیرانێ ئیمزا كری، دكهت
کوردێن وەلاتپارێزێن رەسەن و یێن کو دخوازن خزمەتا شۆرەشا نەتەوهیی یا رۆژههلاتێ کوردستانێ بکهن، دڤێت ئیفشا بکهن کو پهكهكە چاوا دخوازیت د بن ناڤێ پژاکێ دا شۆرەشا رۆژههلاتێ کوردستانێ ژەهری بكهت و دەولەتا ئیرانێ یا تیرۆریست بپارێزیت.
