ئیرۆ چارشەمبێ 26/10/2022، هەڤدەم ب چله‌یا «ژینا ئەمینی» تەڤی زەختێن رەژیما ئیرانێ و گرتنا رێیێن سەرەکە، گرسەیا گەلا زێدە ل سەر گۆرا «ژینا» ل گۆرستانا ئەیچی یا باژارێ سەقزێ کۆم بوون، ل رۆژهلاتێ کوردستانێ ل پرانیا زانینگەهێن مەزن خوەپێشاندان و درووشمێن ل دژی خامنەیی و رەژیما تەهرانێ هاتن لدارخستن.
د بەردەوامیا سەرهلدانا گەلێ رۆژهلاتێ کوردستانێ و ئیرانێ ل دژی رەژیما تەهرانێ، گەلەک خەلکێن ناڤچەیێن جودا یێن رۆژهلات ل باژارێ سەقزێ، باژارێ ژینا ئەمینی، کۆم بوون و بەشداری سەر گۆرا وێ کەچا کوردا ل تەهرانێ شەهید بووبوو كرن و نەرازیبوونا خوە ژ رەژیما تەهرانێ نیشان دان و داخوازا رووخاندنا کۆمارا ئیسلامی و ئازادکرنا کوردستانێ ژ داگیرکەریا فاشیست کرن.
بەشەک ژ درووشمێن گەلێ رۆژهلات ل سەر گۆرا ژینایێ ب تەڤاهی نەتەوی و ئازادیخوازی بوون و درووشمێن وان وها بوون:
«کوردستان، کوردستان گۆرستانا فاشیستان»
«هەتا کورد هەبە، کوردستان وێ بمینە»
«ژیان، ئازادی»
«ئەم رەژیما ئیسلامی ناخوازن»
«ئیسال سالا خوینێ یە، سەیید عەلی [خامنەیی] دێ بنكه‌ڤه».
گرسەیا گەل یا زێدە ل سەر گۆرا ژینا کۆم بوون د دەمەکی دا یه کو رەژیما تەهرانێ ب هەموو هێزا خوە رێ ل بەر بەشداربوونا خەلکێ ل سەر گۆرا وێ د چلەمین سالڤەگەرا تەرۆرکرنا وێ دا دگرت، لێ بەلێ کۆمپلۆیێن رەژیمێ ژ ئیرادەیا گەلێ کوردێ بندەست گەلەک لاوازتر بوون و بەشەک ژ گرسەیا گەل ب پەیاتی، ب رێیا چیایان و دەرباسکرنا چەم گهیشتن گۆرا ژینا ئەمینی.
ژ خەینی خەلکێ باژارێن رۆژهلات، دوهـ هەژمارەک کەس و کەسایەتیێن ئیرانێ ب مەبەستا بەشداریا د مەراسما شینا زینا ئەمینی دە و نەرازیبوونا خوە ژ رەژیما ئازادیخواز نیشان دابوون، دوهـ گهێشتن سەقزێ. ژ ئالیێ خەلکێ سەقزێ ڤە هاتن برن. عەلی دایی یەک ژ وان کەسێن ناسکری بوو کو ب مەبەستا بەشداریا د رێورەسما 40 سالیا کۆچا داوی دە چووبوو سەقزێ و ل هۆتێلا کوردان یا وی باژاری دا مابوو و هاتبوو گرتن و بۆ جهەکی نەدیار برن.
ژ بۆ شەرمەزارکرنا رەژیما ئیرانێ ئیرۆ ل باژارێن سنه، مەهاباد، مەریوان، کامیران، سەقز، بۆکان، بانه، جوانرۆ و گەلەک باژارێن دن یێن رۆژهلاتێ کوردستانێ گرەڤا گشتی یا گەل هات لدارخستن.
گرەڤ و مەراسیما ئیرۆ ژ ئالیێ کۆمێن ژن و جوانێن رۆژهلاتێ کوردستانێ و ئیرانێ و ناڤەندا هەڤکاریا پارتیێن رۆژهلاتێ کوردستانێ و رێخستنێن سیاسی و سڤیلێن دژبەرێ رەژیما ئیسلامی یا ئیرانێ ڤە هات لدارخستن.
پێشتر رێخستنا مافێن مرۆڤان (هانگاو) راگهاندبوو کو ژ ئالیێ پاسدارێن ئیرانێ ڤە زەخت ل مالباتا ژینا ئەمینی هاتیە کرن کو مەراسیما جەنازەیێ کەچا خوە نەکن و برایێ ژینێ ژی ئاشکان هاتیە گرتن.
هێژایی گۆتنێ یە کو پارێزگارێ سنه شەڤا بووری راگهاند کو ژ بەر بەلاڤبوونا نەخوەشیا په‌رسیڤێ رۆژا چارشەمێ هەموو زانینگەهـ و خوەندنگەهێن پارێزگەهێ گرتینە.
هەڤدەم، ئیرۆ خەلکێ هنەک باژارێن ئیرانێ ب گرتنا دکان و بازاران دەست ب گرەڤێ کرن و ل پرانیا زانینگەهێن مەزن یێن ئیرانێ، ب چالاکیێن نەرازیبوونێ و بلندکرنا سلۆگانان ل دژی رەژیما ئیرانێ، سالڤەگەرا «ژینێ» پیرۆز کرن و داخوازا رووخاندنا رەژیما ئیسلامی کرن.
