بووبێ ئەسەر
ژ رۆژا پەکەکە دامەزراندنە و ھەتا نھا ئارمانج و ھەدەفا وێ تەنھا ژ بۆنا تێکبرنا بەرژەوەندیا کورد و کوردستانێ بوویە. ل کو دەرێ ھێژاییەک کوردستانی ھەبە ژ بۆنا تێکبرنا وێ چ ژێ ھاتیە تەخسیر نەکرییە و دێ نەکە. ژ بەر ڤێ بوو کو دەما داگیرکەران ئەو دامەزراندن و خوەستن ئەو ئانگۆ پەکەکە ل باکورێ کوردستانێ ببە دەستھلات داکو کارێ وان ئاسان بهێت مەشاندن. ژ بۆنا ڤێ ژی ژ رۆژا پەکەکە دەرخستن ھۆلا کوردستانێ، وێ ب کوشتنا کوردان ناڤێ خوە بەلاڤ کر و خوەست ب ڤێ یەکێ ھەمی کوردان بترسینە و بخە بن کۆنترۆلا خوە لێ ئەڤ یەکا کو داگیرکەران ژ وان دخوەست پێک نەھات. ھەر چقاسی ئەو داخوازا داگیرکەران پێک نەھات ژی، ب دەستێ پەکەکێ ترس و خۆفەک خستە ناڤا پارتی و تەڤگەرێن ھەیی. ب ڤێ ترس و خۆفێ ژی پەکەکە ل سەر ھندەک رێخستنان باندۆرا خوە پێک ئانی بوو. لێ ڤێ تێرا داگیرکەران نە دکر.
ژ بۆنا پەکەکێ بکن دەستھلاتا باکورێ کوردستانێ و تونەکرنا پارتی و تەڤگەرێن دن، کاربدەستێن ترک داربەیکە (حوکمێ لەشکەری) چێ کرن ب وێ ھەمی پارتی و رێخستنێن کوردان ژ ھەڤ بەلاڤ کرن. پشترا ل سەر ناڤێ پەکەکێ شەرێ تونەکرنا کوردان دانە دەستپێکرن و ناڤ لێ کرن شەرێ خلاسکرنا کوردان. ب وێ تەقین و شەری، وەکە شەرێ ئازادیا کوردستانێ ھاتە ب ناڤکرن و ھەر کو چوو شەر گەش کرن. وێ دەمێ یا دڤێ ھەرکەس ل گەل وی شەری بان یان ژی خاین دھاتن ب ناڤکرن. ھەردو لنگێن کوردان خستن پێلاڤەکێ دا کو ئەو ژی یا دەولەتا کەمالیست بوو.
چیرۆکا وی شەری دوور و درێژە. لێ ب قاسی درێژیا خوە بھوستەکا ئاخا باکورێ کوردستانێ ئازاد نەکرن. بێتر خەراب کرن و ژ بۆنا کوردان وێرانی و تالانی، کۆچبەری و وەلاتێ خوە تەرکرن ئانی. یێن ماین ژی پرانیا وان ژ ترسا ژ بەر بەرژەوەندیێن شەخسی کەتن بن بۆندۆرا پەکەکێ و وێ ژی چ خوەست ئانی سەرێ وان.
تۆپکرنا پەران، کوشتن و ڤالاکرنا گوندان ئێدی ژ بۆنا پەکەکێ بوو بوو وەکە لیستکەکێ. ژ بەر کو داگیرکەران قەت و قەت موداخەلەیی کارێ وێ نە دکر. لۆما ئەو کار ل گۆر دلێ وان ژی بوو. ب کورت کورتاسی تەڤگەرا باکورێ کوردستانێ یا وەلاتھێز ئێخسیر گرتن و کرن یێن خوە.
کەسێن ئەو رەخنە دکرن یان ل دژ وان دەردکەتن دکوشتن یێن نکاریبوون یان نەدخوەستن بکوژن تەسلیمێ دەولەتێ دکرن. دەولەتێ ژی ئەو کەس دخستن زیندانێن خوە و د ڤردا ئەو پەروەردە دکرن دا کو ژ بۆ وان کار بکن. ئەو کەسێن وەھا دەما ژ زیندانێ دەردکەتن یان دھاتن بەردان، وەکە زلامێن دەولەتێ د ناڤا پەکەکێ دا ب جھ دکرن دا کو خەلک خوەفرۆشیا وان نەبینن.
لێ داگیرکەرێن مە دزانی دێ چاوا خەلکێ بکن پەکەکەیی. لۆما ژ بۆنا ڤێ ب دەستێن خوە مەدیایەک خورت کو ھەمی بەرپرسێن یەکەم ژی زلامێن دەولەتێ بوون، ئاڤا کرن. د وێ مەدیایێ دا ھەر رۆژ ژەھرا کەمالیزمێ ددان کوردان، ژ بەر کو ھەدەف و ئارمانجا وان، کوردان بکن ترکێن کەمالیست، بوو.
د ناڤا کارێ مەدیایێ دا یەکەم جار تەلەڤزیۆنەک دانە ڤەکرن و خستن دەستێ پەکەکێ دا کو ئەو ژی وێ ژ بۆنا فکرا کەمالیزمێ ب کوردان بدن قەبوولکرن. ھەلبەت کارێ وان نە تەنێ ئەڤ بوو. ب رێیا وێ تەلەڤزیۆنێ پرانیا سیاسەتمەدار، دەنگبێژ و ھونەرمەندێن کوردان دەردخستن وێ تەلەڤزیۆنێ و ئەو جانک و جامێرە ب رێیا وێ تەلەڤزیۆنێ دکرنە د خزمەتا کەمالیزمێ دا. ھەر کو دچوو شەرێ چەکداری کێم لێ یێ مەدیایێ زێدە دکرن. ب دەھان کۆڤار و رۆژنامە دەردخستن. د دەستپێکێ دا گەلەکان ژ وان را نڤیسین و بوونە رۆژنەمەڤانێ وان.
کەسێن ژ وێ خەتێ دەرکەتانە ژی دھاتن کوشتن یان دخستن زیندانێ دا کو وان ژی د وردا وەکە سیاسەتمەدارێن کو شەرتێن دەولەتێ قەبوولدکرن دا کو ژ بۆی وان کار بکن، پەروەردە دکرن. نھا ب سایا وان کۆڤار، رۆژنامە و تەلەڤزیۆنان پرانیا کوردان کرنە یێن خوە. کەسێن ل وان تەلەڤزیۆنان تەماشە ژی دکن ئێدی دبن ئەو. یانی ئێدی دۆزا تشتەکی ناکن و ل دژی پەرچکرنا(!) ترکیایێ دردکەڤن. یا راستێ ئێدی دۆزا مافێ خوەیێن رەوا ژی ناکن. نھا پەکەکە تو تشتەکی نەکن ژی ب سایا وێ مەدیایا خورت کو ب دەستێ دەولەتا کوور ژ بۆی پەکەکێ ھاتیە ئامادکرن، کوردان ژ فکرا نەتەوەیی دوور دخن. رۆژ ب رۆژ ھزرا نەتەوەیی د ناڤا جوانێن کوردان دا دمرە و حەزکرنا کەمالیزمێ زێدە دبە.
چارەسەری:
یەکتیا هێزا نەتەوەیی ل باکور کوردستانێ و مەدیایەک ژ یا پەکەکێ خورتر پێویستە. ھەگەر ھەمی پارتی و تەڤگەرێن ھەیی یێن باکورێ کوردستانێ ب ھەڤرا ئەنیەکا نەتەوەیی دامەزرینن، دکارن رەوشێ پیچەکێ ڤەگەرینن.
یان ژی دەزگەھەکە نەتەوەیی تەنھا ژ بۆنا زمان و چاندا کوردان بێ دامەزراندن ئەڤ ژ کارێ سیاسی دوور بە. کار و خەباتێن وێ تەنھا ژ بۆنا زمان و چاندا کوردی بە. دبە کو ب سایا دەزگەهەکە وەھا، خەلک و جوان ل زمانێ خوە ڤەگەرن. ھەبوونا زمان و ب کارئانینا وی دێ ھزرا نەتەوەیی د ناڤا جوانان دا گەش بکە. گەشبوون و بلندبوونا ھزرا نەتەوەیی ژی دێ ببە سەدەما داخوازا مافێ خوە یێ رەوا. لۆما نھا کار تەنھا دڤێت ببە ھزرا نەتەوەیی د ناڤا جوانان دا گەشکرن. ئەو ژی ل زمانێ خوە، ل عادەت و تۆرەیێن خوە ڤەگەرینێ دبە…
