بێەخلاقیا ESPێ و سۆندخوارنا چەپێن ترک و کوردێن کەمالیست ب دوژمناتیا ل ھەمبەر بارزانی

بێەخلاقیا ESPێ و سۆندخوارنا چەپێن ترک و کوردێن کەمالیست ب دوژمناتیا ل ھەمبەر بارزانی

رەسەنییا بارزانی و پەدەکێ ھێژ ژی خەوا شەڤێ ل چەپێن ترکان درەڤینە. یالچن کوچک کەسایەتیێ ھەری ل پێش بوو کو ب ئەشکەرە دیار کر کو رەسەنییا بارزانی مەترسیدارە و بانگ ل کوردێن دەولەتا ترک کر کو ب ھەڤ را ل دژی بارزانی شەر بکن. کەرب و کینا ل ھەمبەر بارزانی ل یالچن کوچوک بوویە نەخوەشیەک. یالچن کوچوک د بەرنامەیا تیڤیێ یا ب ناڤێ رۆژا 32 کو د سالا 2009ێ دا بەشدار ببوو، دا گۆت، “ل دژی من کامپانیایەک ھەیە، بارزانی ڤێ کامپانیایێ دمەشینە” لێ ب ئیحتیمالەکا مەزن وێ دەمێ ھایا ت یەک ژ شۆپینەرێن رێبازا سیاسی یا بارزانی ب ناڤێ یالچن کوچک نەبوو و ناڤێ وی نە بھیست بوو.

خویایە کو ئەڤ نەخوەشیا ئانتی-بارزانیستی یا یالچن کوچک ئێدی دەرباسی ESP ئانکو «پارتیا سۆسیالیست یا بندەستان» بوویە. ESP ژی ب ھەمان نەساخیێ دنالە و دبێژە “بارزانی ئێریشی مە دکە”

 ئاژانسا نووچەیان یا ETHA ESP دوھ نووچەیەک بالاڤکر و گۆتبوو کو پەدەکێ ئێریشی ئاڤاھیا وان کریە. ل گۆری ڤێ نووچەیێ کەسەک چوویە ئۆفیسا ESP یا ئامەدێ و ل سەر دەرییێ ئۆفیسێ “بژی براتیا کوردا” نڤیساندییە. «پارتیا سۆسیالیست یا بندەستان» درووشما “بژی براتیا کوردان” ژ بۆ خوە وەکە ئێرش نرخواند. ئەو راست دبێژە. براتی و یەکتیا کوردان داویا ھەموو دەردۆر و دووڤەلانکێن کەمالیستانە.

ب راستی ھەکە ئەم راستیێ ڤەبێژن، قەد بەرناکەڤە کو ئەم ل سەر رێخستنۆکەکا وەکە ESP یا گەلەک بچووک باخڤین. ئەو نە ھێژایی شیرۆڤێ نە. لێ وەک دبێژن “پێشی ژی پچووکە، لێ مرۆڤی تێک ددە”. سەدەما کو ئەم بەرسڤا ڤان چیرۆک و نووچەیێن بێەخلاقانە یێن «پارتیا سۆسیالیست یا بندەستان» ددن، تەنێ ئەشکەرەکرنا زیھنیەتا ل پشت ڤێ رێخستنۆکێ یە.

دیرۆکا نەناسا ESP «پارتیا سۆسیالیست یا بندەستان» و دامەزرنێر و سەرۆکێ وێ فیگەن یوکسەکداغ

«پارتیا سۆسیالیست یا بندەستان» پارتیەکە کو د سالا 2010ێ دا ھاتیە دامەزراندن. د دەربارێ وێ دا هیچ بەلگەیەکێ راست بەردەست نینە. تشتێ کو ئەم دزانین ئەوە کو ئەو ناسنامەیا خوە وەکە مارکسیست-لینینیست پێناسە دکە. پارتیەکە کو ژ نشکا ڤە خولقی. گەر ھوون کۆم بکن، یەک دەنگێ وان ژی نینە. لێ ھاتیە و ل سەر سەرێ کوردان جھ بوویە.

ھەلبەت ئەم دکارین ببێژین کو «پارتیا سۆسیالیست یا بندەستان» چاوا پارتییەکە نەپەنییە سەرۆکێ وێ فیگەن یوکسەکداغ ژی ووسا کەسەکی نەپەنی و تارییە. ت جاری د سییاسەتێ دا جی نەگرتییە. نە ناڤێ وێ نە ژی دەنگێ وێ کەسێ نە بھیستییە و ژ نشکا ڤە ژ ئیمرالیێ (عەڤدلا ئۆجەلان) ژ بۆ ھەڤسەرۆکاتیا ھەدەپێ ھاتە ئەرکدار کرن. و دانین سەر سەرێ کوردان. ژ باژارێ وانێ بوو پارلەمانتار د رێزا یەکەم دا. ترکەکە کو چ جاران نەکەتیە ناڤ تێکۆشینا کوردان، هیچ وەسفێ وێ تونەیە، پەیڤەک کوردی نزانە، لێ ھات و بوو پارلامەنتەر ل باژارێ ھەری مەزنێ کوردستانێ. ب پەراشۆتا ئیمرالیێ ھاتە سەر کورسیکێ سییاسەتێ. ب ھاتنا خوە دەست ب بێرێزیکرنا ل نرخێن کوردان کر.

سەرۆک بارزانی رۆژا 10/12/2015 ل ئەنقەرێ ل گەل شاندا ھەدەپێ جڤیا و د وێ ھەڤدیتنێ دا راگھاند کو شەرێ خەندەکا زرارێ ددە کوردان. فیگەن یوکسەکداغ گۆتە سەرۆک بارزانی، “تەنێ ئەڤ کارێن مە یێن ناڤخوەیی نە. پرسگرێکا گەل ب دەولەتێ رە نینە، پرسگرێک ئاکەپە و کۆچکە، ھەتا ئاکەپە دەست ژ کار بکێشیت ئەم دێ ل کۆلانان بەرخوەدانا خوە بەردەوام کن. ئەڤ پرسگرێک مەسەلەیەکا ناڤخوەیی یا گەلێ ترکیایێ یە، ئەم دەستوەردانا وەیا ژ دەرڤە قەبوول ناکن.”

تشتا ئەساسی یا کو د بن ڤێ بەرسڤا بێەخلاقانە یا فیگەن یوکسەکداغ دا ئەڤەیە، “خوە مەزن دیتنا نەتەوەیا سەردەست”. ئیرۆ گۆتنا ESP یا “ئۆلیگارشیا بارزانی” بەرھەمێ ھەمان دەرۆنی یا سەروەرییا داگیرکەرییێ یە. ھەر دو ژی ب راستی تەمسیلا روحا دەولەتا سەردەستا کەمالیستا ترک دکن. ل دژی یەک ئۆلیگارشیا کەمالیست درووشما ناقیرن. دەما کو پەکەکێ گۆت کو 17 گەریلایان ب کیمیابارانێ ژیانا خوە ژ دەست دانە، لایەنگرێن ESP ل ئیزمیرێ ب درووشما “بمرە پەدەکە” دزرین. ل سەر دیواران سلۆگانێن ل دژی بارزانی د نڤیساندن. لێ یێن کو جوانێن کورد قەتل کرن دەولەتا ترک یا وان ب خوە بوو. کەمالیزمێ ب دەھان ھەزار کورد قەتل کرن، لێ رۆژەکێ ژی چەپێن ترکان ESPیێ ل چ دەران نەنڤیساند، “بمرە کەمالزم، بمرە ترکیێ.”

پارتییێن وەکی ESP ێ ژ نشکاڤە دەردکەڤن سەر دیکا سییاسەتێ بێ رەنگ و بێدەنگ ھەموو ژی ناسنامەیێن تاری نە. ئیرۆ رێخستنۆکێن وەکە ESP ژی دخوازن عەیارێ بدن کوردان. ESP ب راستی بەشەک ژ MLKP-ێ یە. ئەشکەرەیە کو MLKP پشتی سالێن 1980یێ چاوا ژ ئالیێ دەولەتێ ڤە ھات بکارئانین. یێن کو ھەڤالێن خوە د گرتیگەھێ دا ب ساخی دشەوتاندن ژی ئەڤ رێخستنە بوو. دەولەتێ ب زانابوون چەند جوانێن پاک د جڤاکا ترکیایێ دا کاشی ناڤا ڤێ رێخستنێ کرن و ئەو ژ ناڤ برن. ب تایبەتی ژی کوردێن ل دێرسم و مەلەتیێ ب زانابوون تەڤلی ڤێ تەڤگەرێ کرن و پشترا ھاتن تەسفیەکرن.

ئەرکا داوی یا تەڤگەرا ب ناڤێ ESP ژی زەلالە. دەولەتا ترک کەمالیستێن ئیسلامی ئاڤا کرن، کەمالیستێن لیبرال کەمالیستێن چەپ ئاڤا کرن، دەولەتا ترک ژی دەمەکە درێژە کو دخوازە کوردێن کەمالیست بافرینە. دەولەت سەرێ عەڤدللا ئۆجەلان ژ بۆ ئافراندنا کوردێن کەمالیست پرۆژەیەک مەزن ھاتە چێکرن. ئەڤ پرۆژە گاڤ ب گاڤ دهێت جێبەجێکرن. دەما کو ل قەھوەخانەیێ لیستکان دلیزن، ھندەک تەماشەڤان ھەنە. دبێژنە ڤان کەسێن تەماشەڤان بەلەشچی. لایەنگر یاریێ دشێلن، ژ یاریکەران پێتر دقیرن، لێ وان تایبەتمەندیەک ھەیە، ئەو بەلاشچی نە. ESP و پاشکۆیێن وێ د پرۆژەیا ئافراندنا کوردێن کەمالیست دا خوەدی رۆلەک وھا نە. ئەڤ نە یاریکەرێن سەرەکی نە. پەکەکە و دەولەتا ترک یاریێ دکەن، لێ تەنێ کورد دمرن. ESP «پارتیا سۆسیالیست یا بندەستان» ژی د لیستکا دەولەت و پەکەکێ دا ب کولاڤێ چەپ ھاتییە ئەرکدارکرن تەنێ درووشمێن دژی بارزانی دقیرە.

ھەر چەند عەڤدلا ئۆجەلان، فیگەن یوکسەکداغ کربیتە سەرۆکێ وێ رێخستنێ ژی، لێ بەلێ فیگەن ب راستی پێشنیارا ھەڤبەشا دەولەتێ و ئۆجەلانە. ESP بەردەڤکێ ئۆجەلان و دەولەتا ترکە د بابەتێ دژبەریا رێبازا بارزانی و ھەرێما کوردستانێ دا. ئەڤە وەکە کورمێ خوینمژ دخوازن رحا کوردەواری د ناڤا کوردان دا قوت بکن. لێ پشتراست بن کو پەرەشۆتا ئیمرالیێ ل ئاسیمانێ باشوورێ کوردستانێ ڤەنابیت.

پوستێن ھەمان بەش