نێزیکاتیێن پەکەکێ یێن کو یەپەگێ د قادا سیاسی یا ناڤنەتەوی دا پاشڤە ڤەدکشینە، تێن نیقاشکرن. داخویانیێن حکوومەتان کو تێکلیێن خوەیێن لگەل یەپەگێ دا قوت کرن، ب تایبەتی پشتی زەختێن ترکیایێ یێن ل سەر وان وەلاتێن کو دخوازن ببن ئەندامێن ناتۆیێ، جارەکا دن تێکلیێن یەپەگێ لگەل پەکەکێ ئانین رۆژەڤا جیھانێ.

پەکەکە رۆژئاڤا وەک کارتەکا سیاسی بکارئانی

پەکەکێ ھەر چەند د پێڤاژۆیا ب جھبوونا خوەیا ل رۆژئاڤا دا ناڤێ پەیەدێ، یەپەگێ و رێخستنێن ھەرێمی بکارئانی بە ژی، لێ رۆژئاڤا ل گۆری سیاسەتا خوە و نەھشتنا ئیرادەیا ئیدارەیا ھەرێمی برێڤە دبە کو ئەڤەژی باندۆرەکا نەرینی ل پاشەرۆژا رۆژئاڤا دکە. ھەم پێکھاتەیێن کو پەکەکێ د بن ناڤێ رێڤەبەریا خوەسەرا رۆژئاڤا دا چێکرین و هەم یەکینەیێن لەشکەری ژ بۆ رۆژئاڤا نە خوەدی پرۆژەیەک سییاسی و ماییندە نە. د ھەڤدیتنێن رێڤەبەرێن پەکەکێ یێن ب ناڤێ رۆژئاڤا ل گەل ئیستیخباراتێن وەلاتێن بییانی دا بێی ئیرادەیا گەلێ رۆژئاڤا بریار تێن گرتن. یانی رۆژئاڤا کارتەکا سیاسییە د دەستێ پەکەکێ دا و ژ بۆی خوە بکار تینە. ئەڤ رەوش بوو سەدەم کو رۆژئاڤا د ناڤا 10 سالێن داوی دا بکەڤە رەوشەکا بێپێشەرۆژ.

پەکەکێ؛ ھەول دا کو جەوێ پشتی رزگارکرنا کۆبانێ ئاڤا بوویی، بکار بینە دا کو خوە ژ لیستەیا تەرۆرێ دەربخە

پەکەکێ ژ بۆ کو ھەموو سازییێن رۆژئاڤا گۆری بەرژەوەندییێن خوە بکار بینە د ھەموو سازیان دا کادرۆیێن خوە ب جیهـ کرن. ب تایبەتی ژی ژ دەستپێکێ ڤە رێ ل بەر دانووستاندنێن یەکیتیا د ناڤبەرا پارتیێن کوردی دا گرت.

ھەر وھا پەکەکێ ب شەرێ کۆبانی و ب تایبەتی شەرێ دژی داعشێ ل رۆژئاڤا ھەول دا خوە وەکە رێخستن رەوا بکە و خوە ژ لیستا تەرۆرێا ناڤدەولەتی دەربخە. ب زانەبوون ئالا و سەمبۆلێن خوە ل رۆژئاڤا زێدەتر ئەشکەرە و بلند کرن. ل ھەر دەرێ وێنەیێن ئۆجالان ھاتن دالقاندن. ئالایێن پەکەکێ ھاتن بکارئانین. ب ڤی ئاوایی پەکەکێ وە دفکری کو دێ ژ لیستەیێن تەرۆرێ یێن ناڤنەتەوەیی رزگار بیت. لێبەلێ، رەوش تام بەرەڤاژی چێبوو. ژ بەر کو رێخستنێن رۆژئاڤا وەکە پەکەکێ تێن دیتن و دەستگرتن، د قادا ناڤنەتەوەیی دا فرسەندێن کو بۆ ئازادییا رۆژئاڤا خولقی ھێدی ھێدی ژ دەست چوون.

نھا یەپەگە لگەل پەکەکێ دا وەکھەڤ دهێت دیتن

رایەدارێن ئامەریکی ھەولدانێن مەزن دان کو قەسەدێ وەک ھەڤالبەندەک فەرمی بناسن و وەکە پەکەکە نەھێتە دیتن ل قادا ناڤنەتەوەیی دا ھەولێن مەزن دان. ھەبوونا پەکەکێ یا ل رۆژئاڤا رەد کر. لێ پەکەکێ زەخت ل کادرۆیێن خوە یێن ل رۆژئاڤا کر و نەھشت کو رۆژئاڤا ب ناسنامەیا خوەیا ھەرێمی تەڤبگەرە. پەکەکێ خوەست پشتگریا ئەمەریکا و ھێزێن ناڤنەتەوەیی ژ بۆ خوە بکار بینە. د ئەنجامێ دا شوونا کو پەکەکە ژ لیستەیا تەرۆرێ دەرکەڤە، پەکەکێ لگەل خوە دا یەپەگە ژی کێشاند ناڤا لیستەیا رەش.

نەچالاک بوونا کادرۆیێن رۆژئاڤا:

ھەر چەند کادرۆیێن رۆژئاڤا یێن د ناڤا رەفێن پەکەکێ دا د دەستپێکا پێڤاژۆیا ل رۆژئاڤا دا ھەول دان کو دەستوەردانا پەکەکێ ئاستەنگ بکەن ژی، لێ ب مخابنی ڤە سەر نەکەتن. پەکەکێ ب شاندنا کەسێن وەکی سەبری ئۆک، د بن ناڤێ کۆردیناسیۆنا “سەرپەرەشتیا” پەکەکێ یا رۆژئاڤا دا رێڤەبەریەک ئاڤا کر. ژ بەر ڤێ یەکێ، خوە ل ھەرێمێ ب جھ کر. ھەر وھا ئەندامێن سەرکردایەتییا پەکەکێ یێن وەکە دووران کالکان و بەسێ ھۆزات بێ ناڤبەر د ھاتن رۆژئاڤا و لگەل کارمەند و رێڤەبەریان دا ھەڤدیتن پێک ئانین، نەھشتن رۆژئاڤا ب ئیرادەیا خوە ببە دەستھلات. ھەر وھا ھندەک کادرۆیێن ھەرێمی یێن کو ھەبوونا پەکەکێ ل رۆژئاڤا رەخنە دکرن، د بن ناڤێ پەروەردەیێ دا کشاندن قەندیلێ. یێک ژ وان کادرۆیان ژی دۆزدار حەمۆ بوو، ب ئاوایەکی گومانبار ل گارە ژییانا خوە ژ دەست دا.

کادرۆیێن رۆژئاڤا یێن ژ ناڤا پەکەکێ ھاتن ھەرێمێ، ژ بۆ پاراستنا پلە و پۆستێن خوە دیتن کو ئەو نکارن دژی پەکەکێ رابن کەتن بن ئەمر و فەرمانێن پەکەکێ. ل گۆری بەرژەوەندییێ پەکەکێ خەبات مەشاندن.

ھەموو خالێن بالکێش و شکبەرێن وەکە رادەستکرنا ب گومانا عەفرینێ، پەیمانێن سینۆری، ئاڤاکرنا دژمناتییێ ل دژی ھەرێما کوردستانێ و ب گوھەرتنا ناڤێ رۆژئاڤا… ھەموو ل گۆری تەعلیماتێن پەکەکێ ھاتنە کرن.

ل گۆری نووچەیا کو ئیرۆ ئاژانسێن ناڤنەتەوەیی پارڤە کرن، حکوومەتا سوێدێ راگھاند کو وان ھەموو پشتگریا خوە، ھەم ژ بۆ یەپەگێ و ھەم ژی بۆ پەیەدی ل رۆژئاڤایێ کوردستانێ راوەستاندیە. ئەڤ یەک ئەنجاما باندۆرا ناسنامەیا پەکەکێ یا ل رۆژئاڤایە. پێڤاژۆیا رۆژئاڤا بەر ب ختماندنێ ڤە بر.