رۆژا 3یێ مژدارێ ئاکەپێ ژ بۆ گوھەرتنا دەستوورێ ل گەل پارتیێن سیاسی ھەڤدیتن کرن. دەستپێکێ دا ل گەل مەھەپێ، پشترە ل گەل جەهەپێ و ل گەل ھەدەپێ جڤیا.
وەزیرێ دادێ بەکیر بۆزداگ، ئالیکارێ سەرۆکێ گشتی یێ پارتیا داد و گەشەپێدانێ موستەفا ئەلیتاش و ئالیکارێ سەرۆکێ گشتی عەلی ئێحسان یاڤوز سەردانا فراکسیۆنا پەرلەمانی یا پارتیا دەمۆکراتیک یا گەلان (ھەدەپێ) کرن.
وەکیلێن سەرۆکێ کۆما ھەدەپێ مەرال دانش بەشتاش و ساروھان ئۆلوچ و بەردەڤکا پارتیێ ئیبرو گونای بەشداری جڤینێ بوون.
بێ گومان ئەڤ یەک بوو رۆژەڤەک سەرەکی د سیاسەتا ترکیە دە. گەلەک ئالیان ئەڤ یەک نرخاند و شرۆڤەیێن گەلەک جودا ل سەر ڤێ یەکێ ھاتن کرن. ھەتا گەلەک کەسان د ناڤا ئاک پارتیێ دە دیتنێن د دەربارێ ھەدەپێ دە ب جارەکی دا گوھەرتن بەحسا گرینگیا ڤێ ھەڤدیتنێ کرن. ھەروەھا ھندەک د ناڤا ئاک پارتیێ دا ژ ڤێ ھەڤدیتنێ نە دلخوەشبوون لێ پرانی بێ دەنگ مان یان ژی ھەلوەستەک گەلەک لاواز ل دژێ ڤێ ھەڤدیتنێ دان خویاکرن.
د ناڤا ئاک پارتیێ دا ھنسەک ڤێ یەکێ ژ بۆ ھەدەپێ وەک فرسەندەکی دبینن و دبێژن کو، پرۆژەیا ئاکەپێ یا “ڤزیۆنا سەدسالی” دا گەرەک جھێ دیالۆگێ ھەبە و بلا ھەدەپە ڤێ فرسەندێ ژ دەست نەدە.
تێ زانن کو ئاک پارتی د سەری دا ئەردۆگان ھەدەپێ وەک پارتیەک د بن باندۆرا پەکەکێ دا ددە ناساندن و د ھەر ئاخافتنا خوە دا ڤەکری دبێژە کو، ھەدەپە پارتیەکا “رێخستنا تەرۆرست”ە. ژ بەری دو رۆژان وەزیرێ ناڤخوە ل شرنەخێ ئاخاڤتنەک کر و گۆت: بەرێ خوە بدنێ ئەڤە ب سالانە ئەم دبێژن وان (بەحسا ھەدەپێ دکە) ھون پارتیا پەکەکێ نە. ئەو عاجز نابن، شەرمێ ناکن و نابێژن ئەم نە وەلێ نە.
ژ ئالیەک دن د پارلەمەنتۆیێ دە د جڤینا کۆمسیۆنێ دا، ئەڤە جارا یەکەمە د ناڤبەرا پارلەمەنتەرێن ئاک پارتی و یێن ھەدەپێ دا ئاخڤتنەک نۆرمال پێکتێ. پارلەمەنتەرێن ئاک پارتیێ ل گەل پارلەمەنتەرێ ھەدەپێ عەلی کەنانۆغلو دیالۆگی ب گەر دبە. گەلەک پارلەمەنتەرێن ئۆپۆزسیۆنێ ڤێ یەکێ وەک دەستپێکا پرۆسەسەکا نوو د ناڤبەرا ئاک پارتیێ و ھەدەپێ دا نرخاندن.
هەدەپە و پەکەکە دەما بەحسا دەستھلاتا ئاک پارتیێ و ئەردۆگان دکن ھەری کێم گۆتنا “دەستھلاتا ئاکەپێ و مەھەپێ یا فاشیست” ب کار تینە. رەوشا نرخاندنێن ھەردو ئالیان ئەڤە.
لێ دیارە ئالیێ جەهەپێ و تایبەتی چەپێن ترک ژ ڤێ ھەڤدیتنێ نە دلخوەش بوون. ترسا کو دێ باندۆرا خوە ل سەر ھەدەپێ وندا بکن کەتە دلێ وان.
تێ زانن کو ئەڤە دەمەکە، ل ئیمرالیێ ھەڤدیتن د ناڤبەرا شاندێن ئاک پارتیێ و ئۆجالان دا تێنە کرن. د ڤان ھەڤدیتنان دا پێڤاژۆیا ھلبژارتنا و ھەروەھا دێ چاوە دەنگێن ھەدەپێ بەر ب ئاک پارتیێ ڤە ببن تێ گۆتوبێژ کرن. ئەگەر دەنگێن ھەدەپێ د ڤان ھلبژارتنان دا، بەر ب ئاک پارتیێ ڤە ھەرن، ئۆپۆزسیۆن ھەتا 5 سالێن دن ژی وەک ئۆپۆزسیۆن دمینە.
جەهەپە حەسابا خوە ھەموویێ ل سەر دەنگێن ھەدەپێ دکە. سەرۆکێ جەهەپێ کلچدارۆغلو دبێژە کو، د پرسا کورد دا موخاتابێ مە ھەدەپە یە و ئەڤە دەمەکە پەیامێن گەرم ناڤبەرا جەهەپێ و دەمیرتاش دا تێنە دایین.
دەما بوویەرا مێرسینێ دا (چالاکیا کو پەکەکێ ل ھمبەر مالا پۆلسان ئەنجامدای و چەکدارێن پەکەکێ خوە تەقاندین) دەمیرتاش ئەڤ بوویەرە شەرمەزار کربوو، پەکەکێ ب توندی بەرسڤا دەمیرتاش دا و دابوو خویاکرن کو دەمیرتاش ھەولددە خوە ژ بۆ جەهەپێ شرین بکە.
نھا ژی رەوشەک دن دەرکەت ھۆلێ و ھەر ئالیەک ل گۆرا بەرژەوەندیا خوە ڤێ یەکێ دنرخینە.
ل ترکیێ پرەنسیبێن سیاسەتێ ب ڤی ئاوایێ نە، دوھی ئاوایەکی بوو و ئیرۆ بەرەڤاژی یا دوھی ب ئاوایەک دنە. ئەڤ یەک بوویە وەک ھەلوەستەک ئاسایی.
زەلالە کو: ئاک پارتی ل سەر ئۆجالان و جەهەپێ و چەپ ژی ل سەر دەمیرتاش حەسابا دکن. دەما نێزکی ھلبژارتنا دێ رەش و سپی ئەشکەرە بن. ھنگی چ بھایێ داخویانی و نرخاندنا ژی نامینە.
رۆژەڤا کورد
