ئۆجالان یان دەمیرتاش؟

دەزگەھێ لێکۆلینێ یێ ب ناڤێ مەترۆپۆل، ل ترکیا راپرسینەک بالکێش چێکر. راپرسینا ڤێ جارێ د دەربارێ باندۆرا عەبدوللا ئۆجالان و سەلاحەدین دەمیرتاش ل سەر ھەدەپێ بوو. لێ د راپرسینێ دا پرس ژ دەنگدەرێن پارتیێن ترکا ھاتە کرن. پرس ژ دەنگدەرێن، ئاک پارتیێ، جەهەپێ، IYI پارتیێ، مەھەپێ، پارتیا سەعادەتێ و دەڤا ھاتە کرن.

پرس ب ڤی ئاوایی بوو:

گەلۆ ل سەر دەنگدارێن ھەدەپێ باندۆرا ئۆجالان یان یا دەمیرتاش بێھترە؟

د راپرسینێ دا 21،2% گۆتن عەبدوللا ئۆجالان و 51،1% گۆتن سەلاحەدین دەمیرتاش. ژ سەدێ 27،7 کەسێن کو بەشداری راپرسیێ بوون، گۆتن ئەم نزانن.

ژ ئالیەک دن ھەمان پرس ژ دەنگدەرێن ھەدەپێ ب خوە ژی ھاتە پرسین.

دەنگدەرێن ھەدەپێ؛ 22،1% دبێژن ئۆجالان و 75،2% ژی دبێژن دەمیرتاش.

بێگومان ئەڤە راپرسینەکە کو ھەتا رادەیەکێ ئەنجامێن دەرێخستین ھۆلێ جھێ گۆتوبێژێنە. لێ راستیەک ھەیە کو ل باکورێ کوردستانێ پرانیا ئالگرێن ھەدەپێ ب ئاوایەک ئەشکەرە سەلاحەدین دەمیرتاش ژ عەبدوللا ئۆجالان پێتر تەرجیح دکن و پێتر گوھ ددن دەمیرتاش. بەلکی ھەلوەستا قەندیل ژی د ڤێ دەربارێ دا رۆلەک بەربچاڤ بگێریت. تایبەتی دەما ھلبژارتنێن شاراداریان دا ئەڤ یەک ئەشکەرە بوو، ڤێ یەکێ ڤە گرێدایی ئالیگرێن ھەدەپێ پێتر پشتگریا دەمیرتاش دکن.

لێ د ڤان دەمێن داوی دە تایبەتی پشتی ھندەک داخویانیێن دەمیرتاش د دەربارێ سیاسەتا کو رێڤە دبر دە گوھەرتنەک ل دژێ دەمیرتاش د ناڤا ھەدەپێ دە پەیدا بوو. گەلەک ژ ئالیگرێن ھەدەپێ یێن کورد، دەما دەمیرتاش گۆتی: “وەلاتێ مە یێ ھەڤبەش ترکیایە، دەولەتا مە کۆمارا ترکیایە، ئەم دێ دەمۆکراسیێ ل سەر رکنێ کۆماریێ ئاڤا کن…” دلمانیەکا وان ل ھمبەر دەمیرتاش چێبوو.

ئەڤە دەمەک درێژە جاردن قەندیل ژ بۆ ئۆجالان دەست ب چالاکیێن گرسەھی کریە. جاردن ب گەرمی “تەجرید”ا ئۆجالان ئانینە رۆژەڤێ. ھەروەھا ھەری داوی د بوویەرا مێرسینێ دە، ھەلوەستا دەمیرتاش ژ ئالیێ قەندیل ڤە ھاتە رەد کرن و قەندیل د دەربارێ ھەلوەستا دەمیرتاش دە کارڤەدانەک توند نیشاندا و ھاتە گۆتن کو؛ “بالکێشە داخویانیێن دەمرتاش د مەدیایا نێزیکی جەهەپێ دە تێنە بەلاڤ کرن، دەمیرتاش ھەول ددە خوە بۆ جەهەپێ شرین بکە. دەمیرتاش ت جارا نەبوویە شۆرەشگەر، لێ د ناڤا شۆرەشگەران دە مایە..” و گەلەک تشتێن دن یێن توند ھاتن گۆتن.

ئەڤ یەک ژی ددە خویاکرن قەندیل گوھێ دەمیرتاش کشاند و ژ وێ رۆژێ پێڤە دەمیرتاش دەمەکێ بێ دەنگ بوو.

نھا تێ زانین کو، شاندێن ئاک پارتیێ ب ئاوایەک بەردەوام ل گەل ئۆجالان ھەڤدیتنا ئەنجام ددەن و ب ھەڤرە ل سەر ھلبژارتنا دسەکنن و ھەول ددن کو پلانەکێ ئامادە بکن، دا کو دەنگێن ھەدەپێ بەر ب ئاک پارتیێ ڤە ببەن. ل ترکیا گەلەک گۆتوبێژ ھەنە کو دێ ھەدەپە بەر ب ئاک پارتیێ ڤە یان جەهەپێ ڤە چیت.؟

تشتا کو دیارە د پارلەمەنتۆیا ترکیا دە ھەڤدیتنا شاندا ئاک پارتیێ و یا ھەدەپێ، باندۆرەک ل دەردۆرا سیاسی کر. پرانی ژی جەهەپێ و ئالیێن چەپگرێن ترک ژ ڤێ ھەڤدیتنێ ئاجز بوون. لێ ئاوایەک دن خویاکر کو کەسەک ژ ناوەندێن پەکەکێ ل دژی ڤێ ھەڤدیتنێ دەرنەکەتن و بێ دەنگ مان. ئەڤ بێدەنگی وەک ئەرێنیەک ژ ئالیێن ئاک پارتیێ ڤە ھاتە شرۆڤە کرن.

رەوشا پەکەکێ نە وەک جارایە و د قۆناغەکی دە بەر ب ئالۆزیێ ڤە دچە. ھێدی د ناڤا ھەدەپێ و دەزگەھێن کو گرێدایی سیاسەتا پەکەکێ تەڤدگەرن دە ئەڤ یەک تێ گۆتوبێژ کرن.

لێ یا گرینگ د ناڤا پەکەکێ و دەزگەھ و رێخستنێن پێڤە گرێدایی دە ھندەک ب کوردایەتیا خوە بحەسن و راستیا ناسناما خوەیا نەتەوی ببینن و ببن خوەدی ھەلوەست…

ڕۆژەڤاکورد