د ئێریشێن ئارتێشا ترکیێ یێن ل سەر رۆژئاڤایێ کوردستانێ و حه‌له‌بێ دا، د 24 دەمژمێرێن بۆری دا 4 شەرڤانێن هه‌سه‌دێ و 3 لەشکەرێن ئارتێشا سووریێ هاتن کوشتن.
رەوانگەها سووری یا مافێن مرۆڤان (سۆهر) راگهاند، ئارتێشا ترکیێ د 24 دەمژمێرێن بۆری دا بارەگەهێن ئارتێشا سووریێ و هێزێن سووریەیا دەمۆکراتیک (هه‌سه‌دێ) ژ باکورێ حه‌له‌بێ هەتا حەسەکێ بۆمبەباران کرن.
دیار کر ژی، د ئەنجاما ئێرشێن ل سەر فرۆکەخانەیا لەشکەری یا منخێ و چەند ناڤچەیێن دن ل باکورێ حه‌له‌بێ یێن کو یەکینەیێن پاراستنا گەل (یه‌په‌گه) و ئارتێشا سووریێ لێ ب جهـ دبن، 3 لەشکەرێن ئارتێشا سووریێ هاتن کوشتن و چەند لەشکەرێن دن بریندار بوون.
د هەمان دەمێ دا، د پێنج ئێریشێن ل سەر چەپەرێن هه‌سه‌دێ ل حەسەکێ دا، 4 شەرڤانێن هه‌سه‌دێ هاتن کوشتن و چەند شەرڤانێن دن ژی بریندار بوون، هەروه‌ها زیانێن مادی یێن گران گهیشتنە وان هەرێمان.
ل کۆبانی ژی، ب دەهان تۆپ ل گوندێن ئاشمێ و قەرمووخ، ل رۆژهلاتێ کۆبانی و گوندێ سالم ل رۆژئاڤایێ کۆبانێ و ناڤچەیێن سینۆری ترکیێ و هەتا گوندەوارێ رەققایێ کەتن.
هەروه‌ها هەژمارەک گوندێن گرێ سپی، عەین عیسا و گوندێن نێزی رێیا «M4» ژ ئالیێ هێزێن ترکیێ و گرۆپێن ئالیگرێن وێ ڤە راستی تۆپبارانا بێناڤبەر هاتن.
ل گۆری زانیاریێن رەوانگەهێ ژی، 30 گوند و بارەگەهێن ل گوندەوارێ حەسەکێ ژی ژ ئالیێ هێزێن ترکی ڤە هاتن تۆپبارانکرن، بێی کو ئاماژە ب زیانێن جانی یێن وان ئێریشان بکە.
دەستنیشان کر ژی، د ئەنجاما تۆپبارانێ دا زیانێن مادی گه‌هشتن مال و ملکێن خەلکێ و ژ ترسا تۆپبارانکرنێ، خەلکێ گوندێن سینۆری بەر ب دەڤەرێن دووری سینۆر ڤە کۆچبەر بوون.
