عەبدوللا ئۆجەلان گەفا كوشتنێ ل لەیلا زانا کر
پشتی یەک ژ ھەڤدیتنێن ل گەل عەبدوللا ئۆجەلان دا ل ئیمرالیێ، ئۆجەلان د ناڤ داخویانیێن خوە یێن سەقەت و چەوت دا، گەفا ته‌رۆرکرنێ دا لەیلا زانا ب رێیا شاندەیا کو سەردانا وی کر بوون (سری سۆرەیا ئۆندەر، پەروین بۆلدان و ئیدریس بالووکن) كرن.
راستی ب ئێشە، وەک مە گۆت، و بێ گومان چاڤکانییا ڤێ ئاخافتنا من ژ پرتووکا ئۆجەلان یا ب ناڤێ «رزگارییا دەمۆکراتیک – ئاڤاکرنا ژیانا ئازاد» «نۆتێن ئیمرالیێ» کو نۆتێن ھەڤدیتنێن ئۆجەلان ل گەل ئەندامێن دەستەیا رێڤەبەر یا پارتیا گەلێن دەمۆکراتیک دا جھ دگرە یە. ئەڤ پرتووکە ژ ئالیێ رێخستنا پەکەکێ ڤە ل ئەلمانیا ھاتییە چاپکرن و ژ ئالیێ وەشانخانەیا مەزۆپۆتامیایێ ڤە د سالا 2015ێ دا ھاتییە وەشاندن.
گەفێن عەبدوللا ئۆجەلان یێن ل سەر کوشتنا لەیلا زانا ژ بەر دو تشتێن سەرەکی نە، یێن ھەری دیار ئەڤن:
یا یەکەم ئەوە کو لەیلا زانا دخوازە ب ئامادەبوونا شێورمەندێن خوە ل گەل عەبدوللا ئۆجەلان دا ھەڤدیتنا پێک بینە، ئەڤ ژی ژ تێگھشتنا وێ «لەیلا» ل سەر مەترسیا بەردەوامییا شەری و ژ بۆ دیتنا چارەیان ب ئامادەبوونا شێورمەندان، و کەسێن ژیر و زانا، نە ب رێیا دلخواز و ھۆگرێن فەلسەفا ئۆجەلان یێن تەنێ ژ سه‌رێ دفنا خوه زێدەتر تشته‌كی نابینن. ئەڤ ژی ژ بۆ ب داوی ئانینا پەڤچوونان و ب داویبوونا توندوتویژیێ و دروستکرنا ئارامیێ د دەمەکێ نێزیک دا.هەروەها ژ بۆ کو پێڤاژۆیا ئاشتی ببە سەری و چارەیەکا سیاسی یا دووری شەری پەیدا بکە.
دوویەم، پێوەندییا لەیلا زانا ل گەل سەرۆک مەسعوود بارزانی دا، یێ کو ب خەباتا سیاسیکرنا تێکۆشینێ، ئانکو بەشدارییا ئاشتییانە، ب ئەرێنی د ناڤ گەرا سیاسی یا گشتی دا تێ ناسکرن، لێ نێرینا کۆنسەیا ئۆجەلان ل سەر بنگەھا پێویستییا توندوتویژیێ و شەری یە. ئەڤ یەک ژی سەدەما دلگرانی یان ژی دلنەخوازییا پەکەکێ ژ سیاسەتمەدارێن کوردانە و ب تایبەت سەرۆک بارزانی. لەوما پەکەکە زکرەشیێ و چاڤشۆریێ ب سالانە ل سەر مەدیایا خوە ب کار تینە، د ھەمان دەمێ دا کو ھەر کەسەک د ناڤ رەفێن پارتییا ئۆجەلان دا ناڤێ سەرۆک بارزانی بینە یان ب زمانی دهێت ته‌رۆر کرن و یان ژی ب خیانەتێ دهێت تاوانبار کرن. لەیلا زانا د ھەمان دەمێ دا بوویە کەسایەتەک ناڤنەتەوەیی، کو ژ ئالیێ دەردۆرێن ناڤنەتەوەیی ڤە تێ ناسکرن و د ناڤ کوردان دا ژی ب حەزەک مەزن تێ ناسکرن.
یێن دخوازن ڤێ گۆتارێ ب ئانالیزەکێ و ب گەلەک نەرینێن چەوت، بەره‌ڤاژی راستیێ بکن ھەنە، لەورا – ئەز دێ ڤێ دیالۆگا کو د پرتووکا ئۆجەلان دا ھاتییە، ل ژێری گۆتارێ ژ بۆ خوینەران وەرگێرم سەر زمانێ کوردی.
دیالۆگا کو تیدا عەبدوللا ئۆجەلان گەفا کوشتنێ ل لەیلا زانا دکە، د ھەڤدیتنا شاندا ھەدەپێ یا (11/1/2014) کو ل گەل ھەر یەک (پەروین بولدان، سەری سورەیا و ئیدریس بالووکن) ل ئیمرالیێ پێک ھات. د جڤینێ دا ئەفسەرەکی میتا ترک ژی ئامادە بوو.
دیالۆگ:
ئۆجەلان: مەسەلا لەیلا زانا ژی ھەیە. ئەز باوەرم کو ھاکان ژ بۆی وە باس کر. ئەز دخوازم نەرینێن وە یێن کەسانە بزانم. ھوون دزانن کو شێورمەندێن لەیلا زانا کی نە؟
سری، ئیدریس، پەروین: ئەم نزانن.
ئۆجەلان: ئەو دێ ئه‌مەریکا و ئیسرائیلییان دەرباس بکە (واتەیا وی کو وان دەرباسی زیندانا وی بکن)؟ ھوون چ دبێژن؟
ئۆندەر: ئێدی باوەرییا مە نەمایە. د ھەر کێلیێ دا تشت ژ کۆنترۆلێ دەرکەڤن و پێڤاژۆ دژوار دبە.
پەروین: ل گۆری من دڤێت ئەم دەرفەتەک دن بدن لەیلایێ. گەر ھەڤال تێکەڤن تێکلییان و ل گەل باخڤن، دبە کو ئەو ل خوە ڤەگەرە.
ئۆجەلان: بێژن لەیلایێ کو ھەڤدیتنا ل گەل ئۆجالان دا جدییە. پەیوەندیێن ل گەل بارزانی نەگرنگن. بێی ئاخافتنێن مە، ئەو د رەوشا خوە یا نھا دا نابیت. رێخستن دێ ل سەر کارێ خوە مینیت. بێژنە وێ ئەم تەڤگەرەکا سیاسی نە. ھەگەر ھەول بدە سیاسەتێ بکە دێ بەردێلا ژیانا خوە بدە. ئەڤە نە یارییەکە. نایێ قەبوولکرن کو لگەل شێورمەندان دا بهێت.
ئۆندەر: من ژی پێشنیار کر کو ئەحمەد تورک ل گەل وێ دا بهێت.
ئۆجەلان: بلا لگەل تەدا بهێت. ئەز باوەرم کو ھوونێ حەفتەیا بهێت هێن.
ژ دیالۆگێ خوه‌یا دبە کو سەدەما راستییا گەفا کوشتنێ خوەستەکا لەیلایێ بوو کو ل گەل شێورمەندێن خوە دا بهێتە ھەڤدیتنێ. لێبەلێ ئۆجەلان گومان دکە کو پەیوەندیێن شێورمەندێن لەیلا زانا ل گەل ئیستخباراتا ئیسرائیلێ و ئه‌مه‌ریكایێ دا ھەنە. دبە کو ب ئارمانجا کوشتنا وی بخوازن بچنە وێرێ، عەبدوللا ئۆجەلان گۆتنا لەیلا زانا یا کو گۆتبوو دێ ل گەل شێورمەندێن خوە دا چیتە ھەڤدیتنێ ھەر تم وەکە ھەولدانەک موحتەمەل نرخاند.
