گەلەک جارا دەما بەحسا رەوش و ئارمانجێن پەکەکێ ل رۆژئاڤایێ کوردستانێ تێ کرن، گەلەک کەس ناخوازن ڤێ یەکێ تێ بگھن. پەکەکە رۆژئاڤایێ کوردستانێ ل سەر بنگەھێ گۆتار و ستراتەژیا سەرۆکێ خوە ئۆجالان ژ ھۆلێ رادکە و ھەولدانێن وان ھەموو ئەڤە. بەرێ خوە بدنێ، ئۆجالان دگۆت چ کوردستان ل سووریێ نینە و کوردێن ل سووریێ ھەموو ژ ترکیا ھاتنە و ئەڤ دەڤەر نە کوردستانە.
دەما رەژێما سووری ب پلانا ل گەل ئیرانێ چەکدارێن پەکەکێ ئانین ل رۆژئاڤایێ کوردستانێ جھ کرن، جارا یەکەم ناڤێ کوردستانێ گوھەرتن و کرن باکورێ سووریێ. دەستھلاتا کو ئاڤا کرن ناڤێ وێ کرن رێڤەبەریا خوەسەر. ھەروەھا تەنێ ئالایێن پارتیا خوە راکرن و ئالایێ کوردستانێ قەدەغە کرن. لێ دەما کەسەک ناخوازە ڤێ یەکێ ببینە تشتێن کو بێنە گۆتن ژی نامینە.
گەلەک جارا پەکەکە ب خوە ژی ڤێ یەکێ ب زمانەک فەرمی دبێژە، بەرە خوە بدن ڤێ نووچەیێ:
” ئەنداما کۆمیتەیا ناڤەندییا پەکەکێ ھێلین ئومید ئەشکەرە کر، وان رێ ل پلانەکا ئامەریکایێ گرتیە، کو دخوەست ھەرێمەکا وەکە ھەرێما کوردستانێ ل رۆژئاڤایێ کوردستانێ دامەزرینە.”
ھێلین ئومید بەشداری بەرنامەیا تایبەتا مەدیا خەبەرا سەر ب پەکەکێ بوو و راگھاند: “ئەگەر پەکەکە نەبوویا، ئامەریکا دا سوود ژ رەوشا رۆژئاڤایێ کوردستانێ وەرگریت و ھەرێمەکا وەکە ھەرێما کوردستانێ دا دامەزرینیت.”
ھەروھا ئەشکەرە کر ل گۆر پلانا ئامەریکایێ، ئەو ھەرێما ل رۆژئاڤایێ کوردستانێ دھاتە پێکانین ژی، دا ب ھەرێما کوردستانێ ڤە هێت گرێدان، لێ ل گۆر گۆتنێن وێ، وان وەک پەکەکێ رێ ل وێ پلانا ئامەریکایێ گرتیە.
د مەھا ئادارا 2011ێ دا لڤ و تەڤگەرا چەکداری یا خەلکێ سووریێ ل دژی حکوومەتا بەشار ئەسەد دەست پێ کر و ھەتا نھا بەردەوامە.
پەکەکە ل ژێر ناڤێ یەکینەیێن پاراستنا گەل (یەپەگە) و چەند گرۆپ و رێخستنێن دن ل رۆژئاڤایێ کوردستانێ دەستھلاتا وێ ھەیە و ھێزەکا سەد ھەزار کەسی ل ژێر ناڤێ ھێزێن سووریا دەمۆکراتیک (ھەسەدێ) پێک ئانیە.
ئامەریکا و ھەڤپەیمانیا ناڤدەولەتییا ل دژی داعشێ، وەک ئالیێ سەرەکی یێ ل سووریێ ژ بۆ رووبرووبوونا داعشێ ئالیکاریا وێ ھێزا کوردی دکن، ئەڤ د دەمەکێ دایە کو ئەو ھێز داخوازا دانووستاندنێ ژ شامێ دکە و دخوازە ڤەگەرە سەر شامێ و بانگا پاراستنا سینۆرێن سووریێ و بەرەڤانیکرنا یەکپارچەییا ئاخا سووریێ دکە.”
گەلۆ ھێدی جھێ گۆتنێ دمینە؟ پەکەکە ل رۆژئاڤایێ کوردستانێ خیانەتێ ل ملەتێ کورد دکە و خزمەتا پرۆژەیێن داگیرکەرا ل سەر کوردستانا رۆژئاڤا دکە. ھەتا کورد د ڤێ دەربارێ دا ب خوە بحەسن و راستیێ ببینن، ھەژمارا کوردا ل رۆژئاڤایێ کوردستانێ ژ یا عەرەبان کێمتر دبیت و ئێدی ناڤێ کوردستانێ ژی ل سەر ڤێ ئاخێ دێ بیتە خەیال و ئارمانجا پەکەکێ و ئۆجالان جێبەجێ دبیت.
رۆژەڤاکورد
