پاریس، جانگۆرى و خوه‌پێشاندان
هه‌ر جیهێ كورد لێ بن ل وى جیهى كورد ئارمانجن ژ بۆی ده‌وله‌تێن داگیركه‌ر، لێبه‌لێ نه هه‌ر كاره‌كی دژى كوردان بێ ئه‌نجام دایین، راسته‌راست ئه‌م ده‌وله‌تێن داگیر كه‌ر پێ سووچبار بكن، ژ به‌ر كو ل وێ ده‌مێ ئه‌مێ خزمه‌تا ده‌وله‌تێن داگیركه‌ر بكن و ژ به‌ر دو سه‌ده‌مان، یا یه‌كێ ئه‌مێ ده‌وله‌تێن داگیر گه‌ر بهێز بدن ناسكرن و دبه كو ئه‌و نه ل وێ ئاستا هێزێ بن، سه‌ده‌ما دویه‌مین ئه‌مێ خوینگه‌رمیا ولاتپارێزێن كوردستانی سار بكن و ب ئاوایه‌كی نه‌راسته‌راست مۆرالا وان لاواز بكن.
ل پاریسا پایته‌ختا فرانسایێ كاره‌كی ته‌رۆریستی ل دژى ناڤه‌نده‌كه چاند و هونه‌را كوردى پێك هات و د ئه‌نجامێ ده هه‌ژماره‌كه كوردان ژیانا خو وه‌ندا كر و بوون جانگۆرى و هنه‌كێن دن بریندار كه‌تن.
پڕ گرینگه كو چڤاكا كوردى و هێزێن سیاسی یێن كورد بێ ده‌نگ نه‌مینن ب ته‌یبه‌ت ل پاریس و ئه‌ورۆپایێ.
لێ پرس ئه‌ڤه چاوا بێ ده‌نگ نه‌مینن؟ ئه‌ورۆپا ب گشتى و فرا‌نسا ب ته‌یبه‌تى ده‌وله‌تێن ده‌مۆكراتن و باوه‌رى ب چالاكیێن ده‌مۆكراسی و شارستانى هه‌نه، پرانییا كوردێن ل ئه‌ورۆپایێ ل گۆری ڤان پرنسیپان مافێ په‌نابه‌ریێ وه‌رگرتنه، ژ به‌ر كو كوردان ووسا خوه دانه ناسكرن كو ئه‌و ژبه‌ر په‌رگالێن دیكتاتۆرى ره‌ڤیانه و دخوازن ب ئازادی بژین و وان باوه‌ر ب ده‌مۆكراسیێ و مافێن مروڤان و چالاكیێن شارستانى هه‌یه، ژبه‌ر ڤێ پڕ گرینگه كورد د ره‌فتارێن خوه ده ڤان پره‌نسیپان بكن كریار.
ل ڤر پێویسته ببیژین كو ژ ئه‌نجاما ڤی كارێ ته‌رۆریستی كورد ل پاریسێ بوونه دو جه‌مسه‌ر، جه‌مسه‌رێ یه‌كێ كو پرانییا پارتیێن كوردستانى یێن هه‌ر چار په‌رچه‌یان ب ره‌فتارێن ده‌مۆكراسی به‌ره‌ڤانیێ ژ كوردان دكن و ب رییا داخویانی و گۆتارێن سیاسی و مه‌شێن ئاشتیانه و ئه‌ڤ ژى كاره‌ك پڕ جوانه و ل جه‌م حكوومه‌تا فرانسایێ بوویه جیهێ دلخوه‌شیێ و كورد د چاڤێن وان ده مه‌زن بووینه.
جه‌مسه‌رێ دویه‌مین ب ته‌نێ رێخستنا په‌كه‌كێ یه، كو گره‌سه‌یا خوه یا ل پاریسێ ب ب ئۆرگانیزه‌كرنا خوه‌پێشاندانان ئه‌ركدار كری یه، لێ چ جوره خوپێشاندان؟
گه‌ر ئه‌و كارێ ته‌رۆریستی ل جه‌م فرا‌نسییان جیهێ شه‌رمه‌زاریێ ژی به، لێ د هه‌مان ده‌مێ ده وان خوپێشاندانێن په‌كه‌كێ ژی شه‌رمه‌زار كرن، چما؟
خوه‌پێشاندان شارستانى پێناسه‌یا خوه هه‌یه ل هه‌مان ده‌مێ خوه‌پێشاندانێن تێكده‌ر، ئه‌ڤ خوه‌پێشاندانین رێخستنا په‌كه‌كێ ب كاره‌كی تێكده‌ر هاتن حه‌ساب كرن، ژ به‌ر كو ده‌ما دكان و ئۆتۆمۆبیل بێن شكاندن و پۆلیس وه‌رن به‌ربارانكرن و جاده ژ هێلا خوه‌پێشانده‌رێن په‌كه‌كێ ڤه بێن گرتن و ئالایێ په‌كه‌كێ و وێنه‌یێن عه‌ڤدللا ئۆجالان بێن هلدان كو د فرانسایێ ئه‌ڤ رێخستن قه‌ده‌غه یه، ل وێ ده‌مێ ئه‌ڤ خوه‌پێشاندان ب كاره‌ك نه‌شارستانى تێن حه‌ساب كرن، ئه‌ڤ جوره خوه‌پێشاندان دبن سه‌ده‌م كو دۆزا كوردى و كه‌سێن كو بوونه جانگۆرى ببنه قوربانیێ ڤان جوره خوه‌پێشاندانێن نه‌شارستانى.
نه‌دبوو كورد ووسا بله‌ز ده‌وله‌تێن داگیركه‌ر ب ئه‌نجام دایینا ڤى كاری ته‌رۆریستی سووچبار بكن، ژ به‌ر كو ل ئه‌نجامێن به‌راهیێ خوه‌یا بوو كو كه‌سێ ئه‌ڤ كار ئه‌نجام داى نیژادپه‌رسته و به‌رێ ژی كارێن ووسا ل دژى كا‌مپێن په‌نابه‌ران ئه‌نجام دایه.
واته كورد دبێژن ل جیهێ ریها بتراشه، سمێل ژی ل سه‌ر دانان.
