دارا بلەک
ل ترکیا ھلبژارتنێن سەرۆککۆماریێ و پارلەمەنتۆیا ترکیا تێنە چێکرن. ھەموو ئالیێن سیاسی ب ھەواری خوە ژ بۆ ڤان ھلبژارتنا ئامادە دکن. ژ بۆ ھلبژارتنا هەڤپەیمانی تێنە ئاڤاکرن و ھەر ئالی ل گۆرا خوە د ناڤا خەباتەکی دەیە. رۆژانە بەرنامەیێن تەلەڤزیۆنی ژ بۆ ئەنجاما ھلبژارتنا نرخاندنا دکن، نوونەرێن ئالیێن سیاسی پرۆپاگاندەیا خوە دکن. گەلەک ئالیێن سیاسی پرسا کورد تەنێ وەک ئالاڤەکی ژ بۆ دەستخستنا دەنگێ کوردا ب کارتینن. لێ ژ ئالیێ کوردان ڤە بێ دەنگیەک ھەیە. گەلۆ کورد چ دکن و دڤێ چ بکن. ژ ئالیەک دن ڤە ئارمانجا کوردا ژ کەتنا پارلەمەنتۆیا ترکیا دا چیە؟ گەرەک بەرسڤەک ژ بۆی ڤێ پرسێ ھەبە.
باوەرم بەری ھەر تشتەکی پیدڤیە دەما کورد ب ناسنامەیا خوە، وەک پارتیەک کورد بکەڤن ھلبژارتنا و بەحسا ئارمانجا خوەیا کەتنا پارلەمەنتۆیا ترکیا بکن، دێ گەلەک تشت هێن گوھەرتن و ئەڤ یەک دێ ببە خالەک گەلەک گرینگ کو گۆتوبێژ ل سەر بێنە کرن. ھەتا دکارە ببە زەمینێ ئاڤاکرنا بانەک نەتەوی ژ بۆ تەڤگەرا ئازادخوازا کورد ل باکورێ کوردستانێ.
ھەتا وەک ئیرۆ د دیرۆکا ھلبژارتنێن پارلەمەنتۆیا ترکیا دا گەلەک کورد کەتنە پارلەمەنتۆیێ دا و بوونە وەزیر و د جھێن بلند دا جھ گرتنە. تشتا کو ھندەک ژ وان کارینە بێژن ب تەنێ گۆتنە “ئەم کوردن” لێ ژ ڤێ پێڤە وەک کورد و ب ناڤێ کوردا تشتەک بەربچاڤ نایێ دیتن. ھندەک ژ وان ل ھەرێما کوردستانێ گەلەک کارێن باش یێن جڤاکی کرنە، لێ ئەڤ یەک ژی نە د بن ناسنامەیەک کوردی دا ھاتیە کرن.
ژ بۆ ڤێ یەکێ ژی دەما د پارلەمەنتۆیا ترکیا دا کەسەکی گۆتیە “ئەز کوردم “ژی وەک گاڤەک مەزن ھاتیە نرخاندن. لێ د ئەنجام دا د چەرچۆڤەیا پرسگرێکا کوردان دا چ گاڤەک نەھاتیە ئاڤێتن.
ژ بۆ ڤێ یەکێ ژی ئیرۆ پیدڤییە مرۆڤ بکاربە بپرسە: گەلۆ ئارمانجا کوردا ژ کەتنا پارلەمەنتۆیا ترکیا دا چیە؟ بێ گومان ھەر پارتیەک کورد خوەدیێ بەرنامەیەکییە و د بەرنامەیێن خوە دا بەحسا چارەسەریا پرسا کورد دکن. ئەگەر د پارلەمەنتۆیێ دا د چەرچۆڤەیا بەرنامەیێن خوە دا بکاربن پرسا کورد بینن رۆژەڤێ ئەڤە سەرکەفتنەکە و کارەک باشە و ھنگێ ژی ھەلوەستا وان دبە بەرسڤا پرسا “گەلۆ کورد د پارلەمەنتۆیا ترکیا دا چ دخوازن. “
نھا ل باکورێ کوردستانێ چ هەڤپەیمانیەک کوردستانی ژ بۆ ھلبژارتنا تونەیە. ھەروەھا ھەتا وەک ڤێ گاڤێ یێن ب دەنگێن کوردا چووین پارلەمەنتۆیێ، نەکارینە پرسا کورد بینن رۆژەڤێ و بەحسا مافێن کوردا یێن رەوا نەکرنە. پیتر د چارچۆڤەیا نیک دلەکێ “دەمۆکراتیک” دا بەحسا کوردا کرنە، چەرچۆڤەیا “مافێ مرۆڤان” دا بەحسا ھندەک بوویەرێن ل کوردستانێ روو ددن کرنە. مخابن دەما مرۆڤ ل خەباتێن پارلەمەنتۆیا ترکیا دنێریت نابینیت کو، ب ناڤێ کوردا هیچ پێشنیارەکی ژ بۆ دەستخستنا مافێن رەوا یێن ملەتێ کورد ھاتیە کرن.
ژ بۆ ڤێ یەکێ کەتنا ھلبژارتنا ب ناڤێ کوردان گەلەکی گرینگە. وەک تێ زانین، ھەدەپە ل دەردۆرا خوە ھندەک پارتیێن ڤەدەر کۆم کرنە و نیک دلەکی هەڤپەیمانیا کوردستانی پێکانیە. لێ ھەرکەسەک د پراکتیکێ دا دیت کو، ئەو تەنێ دەما پێوست ڤی ناڤی ب کارتینن و چ گاڤەک ژ بۆ دەستکەفتیەک نەتەوی کوردستانی نەھاتیە ئاڤێتن. ژ خوە ھەدەپە ب خوە ژی خوە وەک پارتیەک کورد نادە ناساندن و خوە وەک پارتیەکە تریکی ددە ناساندن. ئەڤ یەک ژی ددە کەشفکرن ھەر ئالیەک خوە ل دۆرا ھەدەپێ ھلتاڤێژە تەنێ ئارمانجا وان کەتنا پارلەمەنتۆیێ یە و ئەڤ یەک ژی ژ بۆ بەرژەوەندیێن کەسایەتیە.
نھا ل باکورێ کوردستانێ ئالیێن سیاسی د ناڤا ھەولدانەکی دا نە کو ژ بۆ ھلبژارتنا پلاتفۆرمەک نەتەوی کوردستانی ئاڤا بکن. ئیرۆ حالێ حازر دا ئالیێن کوردی نکارن ل سەر ناڤێ خوە بکەڤن ھلبژارتنا پارلەمەنتۆیێ. ئەڤ مافە ل گۆرا یاسایا ھلبژارتنان دەستڤە ناهێت.
لێ تەنێ پارتیا ماف و ئازادیان ھاک-پار مافێ کەتنا ھلبژارتنا دەستڤە ئانیە. یانی ھاک-پار ل سەر ناڤێ پارتیا خوە وەک ئالیەک کورد دکارە بکەڤە ھلبژارتنان دا. ژ بۆ ڤێ یەکێ گەرەک ھاک-پار ڤێ یەکێ ل گەل ئالیێن کورد پارڤە بکە و بکاربن پلاتفۆرمەک کوردستانی ئاڤابکە و بکەڤن ھلبژارتنا دا و د پێڤاژۆیا ھلبژارتنان دا پرۆپاگاندەیا دەستخستنا مافێن رەوایێن ملەتێ کورد بکن و ھەولبدن کوردێن نەتەوی کو ل سەر خەتەک نەتەوی سیاسەتێ دکن ل دۆرا خوە کۆم بکن و بکەڤن د ناڤا چالاکیەکی دا. پێڤاژۆیا ھلبژارتنا ژ بۆ وان دبە فرسەندەک دیرۆکی کو پرسگرێکا کورد د قادا سیاسی دا بدن ناساندن.
د ڤێ پێڤاژۆیێ دا بارەک و بەرپرسیاریەک دکەڤە ل سەر ملێ ھاک-پارێ و بانگەکی ژ بۆ ئالیێن دن یێن سیاسی و کوردستانی بکە دا کو پالاتفۆرکی ل سەر خەتا نەتەوی ئاڤاببە. ژ ئالیەل دن پێوستە، پاک، پەسەکە، کەدەپە و تەڤگەرا دەمۆکراتیکا کوردستانێ و ھەموو ئالیێن لەگال (تشتێ کو لگۆر دەستۆرێ بنگەهین رێک پێ دهگێت دان) یێن کورد، بەرسڤەک ئەرێنی بدن بانگا ھاک-پارێ و ھیمێن پلاتفۆرمەک نەتەوی کوردستانی ژ بۆ ھلبژارتنا باڤێژن. یانی ب ئاوایەک دن دڤێت کوردا بێ ئالتەرناتیف نەھێلن. ئەڤ یەک دێ ببە تەجرووبەیەک گەلەک باش ژ بۆ تەڤگەرا ئازادخوازا کورد ل باکورێ کوردستانێ. گەرەک ھەر کوردەک نشتمانپەروەر د ڤێ دەربارێ دا بەرپرسیاریا خوە بینە جھ.
تەنێ ئەڤ یەک د پێڤاژۆیا ھلبژارتنان دا ، خەتا زیز د ناڤبەرا بەرژەوەندیێن کەسایەتی و نەتەوی دا ئەشکەرە دکە.
