د 23یێ کانوونێ دە ل پایتەختا فرەنسا پاریسێ د ئێریشا ل دژی کوردان دە میر پەروەر (مەحمەت شیرین ئایدن)، ئەبدولرەحمان کزل و ئامینا کارا ب کۆدناڤ ئەڤین گۆیی ژیانا خوە ژ دەست دابوون.
ئەڤین گۆیی ئەنداما پەکەکێ یە و د سالا 1988ێ دە ژی تەڤلی بوویە. کەسەکە کو د ئاستا کۆنسەیا رێڤەبەرا کەجەکێ دە جیھ دگرە. پشتی بوویەرێ پەکەکێ ناسنامەیا ئەڤین گۆیی ڤەشارت. دەستپێکێ دارکا مازی ناسنامەیا راستەقینە یا ئەڤین گۆیی ئەشکەرە کر.
لێ بەلێ پشتی بوویەرێ ب ھەفتەیەکێ پەکەکێ ناسنامە و ئەرکا ئەڤینا گۆیی ئاشکەرە کر. ژ بۆ بەرژەوەندیێن خوە ب شەرمۆکی گۆت کو ئەڤین گۆیی ئەنداما کۆنسەیا رێڤەبەرا کەجەکێ یە. د داخویانیێن ل سەر ناڤێ پەکەکێ و کەجەکێ دە، دەسپێکێ ئەڤین گۆیی وەکە ئەنداما کۆنسەیا کەجەکێ نەھات ناساندن. تەنێ بەسێ ھۆزات د ھەڤپەیڤینا خوە دە گۆت کو ئەڤین گۆیی ئەنداما کۆنسەیا رێڤەبەرا کەجەکێ یە. ھەتا ھندەک چاڤکانیان گۆتن کو ئەڤین گۆیی تەنێ ھەیامەکێ ئەنداما کۆنسەیێ بوویە.
بەلێ، ھەر چەندە نە ب فەرمی ل ئەڤین گۆیی خوەدیدەرکەتنەک چێنەببە ژی، لێ ژ بۆ جەنازەیێ وێ بۆ خوە بکن ئاموورەکی پرۆپاگاندایێ ڤردا و وردا دگێرینن. ئەڤین ژ باژارۆکێ ھلالێ یێ سەر ب قلابانێ یە. مافێ ھەری خوەزایی یێ مرۆڤی ئەوە کو ل جھێ لێ ژ دایک بوویە ب ئاخێ بهێتە سپارتن. ھەر وھا یەک ژ کادرۆیێن دامەزرینەرێن پەکەکێ ساکینە جانسز کو د سالا 2013ێ دە ل پاریسێ ھاتبوو قەتلکرن، برن باکورێ کوردستانێ و ل دێرسمێ ب خاکێ سپارتن.
گەلۆ چما، ئەڤین گۆیی دبن قەندیلێ. ژ بەر کو پێویستیا پەکەکێ ب مژارەکا پرۆپاگاندایێ ھەیە کو وەرزێ زڤستانێ ھەیا بھارێ ل سەر وێ مفا وەربگرە.
بەلێ، راستی تەحلە؛ ئەڤین گۆیی ژ بۆ پرۆپاگاندایا پەکەکێ بوویە مۆدێلا مژارێ. پشتی کو پەکەکێ ل ئەورۆپایێ ب تێرا خوە پرۆپاگاندا ل سەر ڤان جەنازەیان کری، ڤێ جارێ ژی جەنازەیێ ئەڤین گۆیی دبە قەندیلێ دا کو ل باشوور ژی بنگەھەکی پرۆپاگاندایێ ئاڤا بکە. ژ بەر کو پەکەکە نھا ل باشوور د رەوشەکا راوەستایی دایە. گەل ژ پەکەکێ سار بوویە. ھەمان تشت ل دەڤەرا پشدەرێ ژی ئانکو رانیا و قەلادزێ ژی هەیە. ئەڤ دەمەکە پەکەکە نکارە شەرڤانان تەڤلی بکە. پرسگرێکێن پەکەکێ ب کامپا مەخموورێ را ژی ھەنە. گەر گەل دەنگێ خوە نەکە ژی جوان ب بێدەنگی رێیا ئەورۆپا و ترکیایێ ھلدبژێرن و ژ کامپا مەخموورێ درەڤن. پەکەکە ژ بەر چوونا جوانان بۆ ترکییێ و ئەورۆپا نەچار مایە و ھندەک بریارێن تووند ل دژی جوانێن مەخموورێ دەرکرنە. ئەڤە دەمەکی درێژە ژ مەخموور چ شەرڤان تەڤلی پەکەکێ نابن. ئارمانجا پەکەکێ ئەوە کو ب مەراسیما جەنازەیێ ئەڤین گۆیی ل باشوور دەستکەفتەکێ چێبکە. جەوەکێ ھەستییار ل سەر کەمپا مەخموور و گەلێ باشوور ئاڤا بکە کو بکارە سالا 2023یێ دە خوە ژ ڤێ کریزا رێخستنی، لەشکەر و سییاسی رزگار بکە.
دبە کو دەما ئەم ڤان گۆتنان دبێژن پەکەکەیی بەرتەکێ نیشان بدن و ڤێ وەکە کو ئەم سڤکاتیێ ب ئەڤینا گۆیی دکن دەستنیشان بدن. لێ دڤێت ھەری زێدە ئەندامێن پەکەکێ بەرتەکێ نیشانی ڤێ یەکێ بدن کو جەنازەیێ ئەڤین گۆیی وەلات وەلات، باژار ب باژار دهێت گێراندن، ئەڤ بێرێزییەکا مەزنە ل ڤان کەسان دهێت کرن. جەنازا نە ئاموورەکێ پرۆپاگادێ یە. پەکەکە کو حەش مریان دکە.
میناک عەلی حەیدەر قەیتان ئەندامێ دامەزرینەرێ پەکەکێ بوو. کەسێ ھەری زێدە وێژەیا پەکەکێ بەلاڤ کری عەلی حەیدەر بوو، لێ پەکەکێ مرنا وی ژی نە راگھاندن. ھەلبەت پەکەکەیا کو ئەندامێ خوەیێ دامەزرینەر عەلی حەیدەر قەیتان (فووئاد) ھەمبێز ناکە، تەنێ ژ بەر کو ژ ئەڤین گۆیی حەز دکە ژ ئەورۆپایێ جەنازە ناینە قەندیلێ. پێدڤیا پەکەکێ ب جەنازەیێ ئەڤینێ ھەبوو، نھا ئەوێ چیرۆکێن قەهرەمانیێ ل سەر ئەڤین بنڤیسن. لێ ھێژ مرنا عەلی حەیدەر یێ کو دامەزرینەرێ پەکەکێ و ھەمان دەم یەکەم ھەڤالێ عەڤدلا ئۆجەلانی یە ئاشکەرە نەکرییە.
ژ بەر کو پەکەکە تەڤگەرەکا بەرژەوەندی پەرەستە. پەکەکە تەڤگەرەکە کو ب مرنێ خوەدی دبە. مرۆڤ چقاس بمرن، پەکەکە ئەوقاسی مەزن دبە و دکارە پرۆپاگاندایێ بکە. ئەو ب مرنێ دژی. لێ پەکەکە ل ھەر مرییەکی خوەدی دەرناکەڤە. دەما کو پێویست بە ژی ژ کەسێن ژییانا خوە ژدەست دایی مفا وەردگرە. پەکەکە ل زندییان خوەدی دەرناکەڤە. میناک ئەڤین گۆیی نھا ژ بەر کو پێویستیا پەکەکێ پێ ھەیە تێ ھەمبێزکرن. لێ د ناڤا پەکەکێ دە ب دەھان کەسێن مینا ئەڤین گۆیی ھەنە کو کەڤن دا تەڤلی بوونە، ژ بەر کو نەکارینە ب باندۆر بخەبتن ھاتنە ژبیرکرن. دەما کو ئەو بمرن، گەر پیدڤی بکە دێ پەکەکە وان وەکە لەھەنگ پێناسە بکە. وەکی دن ناڤێ وان نایێ زانین.
دیسا ئەم پرسا چارەنڤیسا ئەندامەکی دنێ دامەزرینەرێ پەکەکێ رزا ئالتوون دکن. چ ب سەرێ رزا هاتیە؟ ما ئەڤ چ کارە، ھوونێ پەکەکێ ئاڤا بکن، ھوونێ 45 سالێن خوە بوو ڤێ رێخستنێ تەرخان بکن و دێ چارەنڤیسا وە نەدییار بە. وێ دەمێ بەسێ ھۆزات، مستەفا قاراسوو، جەمیل بایک و چەند ناڤێن دن دێ هێن با ھەڤ و بپەیڤن، گەلۆ ئەم مرنا وی ئەشکەرە بکن دێ سوودمەندتر بە یان ژی بڤەشێرین. مرۆڤ د ناڤا پەکەکێ دا ئاموورە. چاوا پیدڤی بکە ووسا دهێت بکارئانین.
ژ بەر ڤێ سەدەمێ دەما کو ئەم دبێژن ئەڤین گۆیی وەکی ماددەیێ پرۆپاگاندایێ دهێت بکارئانین، نە سڤکاتیە کو ئەم ل ئەڤینا گۆیی دکن. ئەم د شەخسێ ئەڤین گۆیی دا ژ ئەندەمێن پەکەکێ رە دبێژن ل ژییانا خوە خوەدی دەرکەڤن. خوە ژ ڤێ رێخستنا مریحەز رزگار بکن.
