رەوشا رۆژئاڤایێ کوردستانێ گەلەک ڤەکری و ئەشکەرەیە. لێ ئەڤ رەوش چەوا تێ دیتن و چەوا تێ نرخاندن گەلەکی گرینگە و جورەیێ دیتنا رەوشا ھەیی ل رۆژئاڤایێ کوردستانێ ژ کێمبوونا ئەخلاقێ سیاسییە. ئەڤ یەک ژ بۆ ھەرکەسی راستیا ھەیی نەبینە و بەحس نەکە دەرباس دبە.
گەلەک جاران مرۆڤ ھندەک چەوتیێن کو روو ددن ب سیاسەتێ ڤە گرێددە. گەلەک جاران بوویەرەک خراب رووددە یان ژی ل ھمبەر بوویەرا ھەلوەستەک نە راست تێ دایین، پاراستنا وێ ب ھێسانی کەتیە و تێ گۆتن؛ “سیاسەت”ە.
راستە دەما مرۆڤ چاڤێ خوە ل ھەموو راستیا ھەیی بگرە و تەنێ ل گۆرا ئایدۆلۆژیا تەنک کو د سەرێ مرۆڤ دە ھەیی گۆتنا ل ھمبەر ھەلوەستا چەوت ب “ئەڤ سیاسەتە” تێ دەرباسکرن. یان ژی دەما مرۆڤ ب تەنێ بەرژەوەندیێن خوە یێن کەسایەتی بنگەھ بگرە چاڤێ خوە ژ ھەموو پیساتیێ رە دگرە ب ڤێ یەکێ ب گۆتنا “سیاسەت”ە دەرباس دکە.
پرانیا جارا بەحسا ھەلوەستا دەولەتا ترک ل عەفرینێ و دەڤەرێن ل رۆژھلاتا کوردستانێ تێ کرن. دەولەتا ترک داگیرکەرە و بەشەک ژ رۆژئاڤایێ کوردستانێ داگیر کریە. ھەروەھا ل گۆرا ڤێ ژی ل ڤان دەڤەران تەڤدگەرە و ب راستەراست و رێیا ملیسێن خوەیێن چەکدار زۆرداریێ ل کوردا دکە و ھەول ددە دەمۆگرافیا دەڤەرێن کورد لێ نشتەجینە بگوھەرێ. ب کورتاوی داگیرکەرە.
لێ گەلۆ پەکەکە چیە و چ دکە. پەکەکە ژ بەری ھەر تشتەکی ناڤێ کوردستانێ داگیر کریە و ڤی ناڤی ل رۆژئاڤایێ کوردستانێ ب کار ناینە و ھەتا قەدەغەیە. دەزگەھەکی پەکەکێ ل رۆژئاڤایێ کوردستانێ ب ناڤێ کوردستانێ تنەیە. ژ ئالیەک دن تەعداریا پەکەکە ل رۆژئاڤایێ کوردستانێ دکە نە ژ یا دەولەتا ترک کێمترە. پەکەکە چ مافێ ژیانێ ژ بۆ دژبەرێن خوە ناھێلە.
لێ گەلۆ ژ بۆ چ پرانیا کوردا، سیاسەتمەدارا، رەوشەنبیرا و وەک دن ب ھەموو ئاوایی بەحسا ھۆڤتیا ترکیا ل رۆژئاڤایێ کوردستانێ دکن، لێ ل ھمبەر ھۆڤتیا پەکەکێ بێ دەنگن. ھەردەمی د مەدیایا خوە دە تەنێ وەسفا دەستھلاتداریا پەکەکێ ل رۆژئاڤایێ کوردستانێ ددن.
ھەتا راستیا ھەیی نەیێ دیتن چ چارەسەر ژێ پەیدا نابە.
نھا ل رۆژئاڤایێ کوردستانێ خەلک د دەستێ رێڤەبەریا پەکەکێ دە نەچار مایە و دبێژن خوەزیێن رێڤەبەریا رەژیما بەرێ. یانی رێڤەبەریا رەژیما ئەسەد ژ یا پەکەکێ باشتر دبینن.
پەکەکە وەک ھەموو کوردستانێ ل رۆژئاڤا ژی برینەک کوورە د لاشێ کوردان و کوردستانێ دە. پێدڤیە ئەڤ راستیە بێ دیتن و دەست ژ سیاسەتا دوروو و بێ ئەخلاقی بێتە بەردان. دێ دەمەکی ئەم دێ بەرێ خوە بدن رۆژئاڤایێ کوردستانێ لێ نە کوردا دبینین و نە ژی دکارین ئێدی بەحسا جورەیەکی کوردستانێ بکن. دێ پەکەکە ھەموویێ تێکببە. ژ بەر کو ئیرۆ پرانی ناخوازن ڤێ یەکێ ببینن و چاڤێن خوە ل راستیا رۆژئاڤایێ کوردستانێ دگرن.
بلا ھندەک رابن بەحسا جیاوازیا دەولەتا ترک و پەکەکێ بکن. گەلۆ نە ب ھەمان میتۆدێ ھەولددن کوردا و دۆزا کوردستانێ تێکببن؟ گەلۆ نە ژ بۆ ھەمان ئارمانجێ خزمەتێ دکن؟
ڕۆژەڤاکورد
