شاندەکا ھەدەپێ ل گرتیگەھێ سەردانا ھەڤسەرۆکێ بەرێ یێ ھەدەپێ سەلاحەدین دەمیرتاش کر و پێشنیار بۆ کر کو ببیتە بەربژێرێ ھەدەپێ یێ سەرۆککۆماریا ترکیا.
ل گۆر داخویانیا ھەدەپێ، سەلاحەدین دەمیرتاش سپاسیا شاندێ کریە و دیار کریە کو رەوشا وییا یاسایی ژ بۆ بەربژێریا سەرۆککۆماریێ دەست نادە.
دەمیرتاش ئەشکەرە کریە، ئەو دێ پشتگریێ بدە کاندیدێ کو «تفاقا کەد و ئازادیێ» وەک کاندیدێ ھەڤپار ژ بۆ سەرۆککۆماریێ دیار بکە.
ھەدەپە ھەتا وەک ڤێ گاڤێ ددە خویاکرن کو ئەو دێ بەربژێرێ پارتیا خوە ژ بۆ سەرۆککۆماریێ دەستنیشان بکە. خوە ھەدەپێ دا خویاکرن کو ئەڤە دەمەکە ئەو د ناڤا خوە دا ژ بۆ دەستنیشانکرنا بەربژێرێ سەرۆککۆماریێ راپرسینێ چێدکن و ھەری داوی ل سەر دو ناڤان سەکنینە. ل گۆرا ھەدەپێ یەک ژ وان دەمیرتاشە و دەمیرتاش ژ بەر کو رەوشا وی دەست نادەت، قەبوول نەکریە. باشە بەربژێرێ دی کیە؟ گەرەک ھەدەپە ڤێ یەکێ ئەشکەرە بکە.
لێ ھەدەپە دلەیزە و ب ھەموو ئاوایی ھەولددە کو ل گەل جەهەپێ ب ئاوایەک ئەشکەرە بکەڤە د ناڤا ھەڤکاریەکی دا. ژ بەر کو ھەدەپە ناخوازە وەک ھلبژارتنێن شارەداریا ب ڤەشارتی پشگریا جەهەپێ بکە. دهێت زانین کو ئاوایێ تفاقا نەھینی د ناڤبەرا ھەدەپێ و جەهەپێ دا ببوو سەدەما گەلەک گۆتوبێژان و ھەردو ئالیان ھەڤ تاوانبار دکرن و د ڤێ دەربارێ دا ھەلوەستا ھەدەپێ گەلەک ھاتبوو رەخنەکرن.
خالەک گەلەک ڤەکری ھەیە کو ئەگەر ھەدەپە بەربژێرێ خوە یان ژی بەربژێرەک ھەڤبەش ل گەل تفاقا کو سەرکێشیا وێ دکە یا «کەد و ئازادیێ» دەستنیشان بکە، ئەڤە ڤەکری ب واتەیا هاریکاریا ئەردۆگان دهێت. نا ئەگەر تو بەربژێرا دەستنیشان نەکەی و پشتگریا کلچدارۆغلو بکەی، یان ژی بێژی ئەم ھلبژارتنا سەرۆککۆماریێ بایکۆت دکن، ئەڤ یەک ژی تێ واتەیا کو ھەدەپێ ل گەل جەهەپێ وەک ھلبژارتنا شەرەداریان ل ھەڤھاتنەکا نھینی کریە.
ژ ئالیەک دن پرسا ھەری گرینگ ئەوە کو بریارا ھەدەپێ ژ کو دەردکەڤە. گەلۆ قەندیل بریارێ ددە یان دەستھلاتا ھەدەپێ خوەدییێ بریارێ یە د ڤێ دەربارێ دا؟
کەسایەتییێن وەک ئەحمەد تورک ڤەکری دبێژن ئەم دێ پشتگریا سەرۆکێ جەهەپێ کلچدارۆغلو بکن. مەیلا قەندیل ژی ل سەر کلچدارۆغلویە. لێ گاڤا داوی چ دبە پیچەک گۆمان ل سەر ھەیە.
رۆژەڤا کورد
