خەباتکارێن پەکەکێ ل شنگالێ خەلکێ دجڤینن، ل دژی میر ھازم تەحسین بەگێ ئێزدی ئاخافتنێن درەو ڤەدهوینن و ھەول ددن کو خەلکێ دەڤەرێ ل دژی میری داخویانیان بدن.

پەکەکێ د ڤێ مەھا داوییێ دا درەوێن خوە یێن ل سەر شنگالێ زێدە کرنە، ب رێیا چاپەمەنییا خوە پلانەکا تاری ل سەر شەنگالێ پێک تینە. کەسێن بێگونەھ تێنە گرتن، ئیشکەنجە ل وان تێ کرن کو ئەو ببێژن ئەم سیخورین. ل ئالیێ دن دخوازن جڤاکا ئێزدی بەردن ھەڤدو کو ئەو شەرێ ھەڤ بکن.

پەکەکێ نھا ژی ل دژی میر ھازم تەحسین بەگێ ئێزدی دەست ب کامپانیایەک رەشکرنێ کریە. پەکەکە، ئەو خەباتێن دیپلۆماتیکێن میر ھازم تەحسین بەگ یێن ژ بۆ ناسکرنا جینۆسایدا ئێزدیان، بەرۆڤاژی دکە و دبێژن کو ئەو ئاخافتن زرارێ ددن ئێزدیان. ژ بلی ڤێ، پەکەکە ل سەر مالباتا جەنابێ میری، ژیانا وی یا شەخسی و ھتد درەوان پارڤە دکە.

د ھندەک ھەڤدیتنێن دیپلۆماتیک دا، ب بکارئانینا دو وێنەیێن ئەردۆگان و میرێ ئێزدییان ھازم تەحسین بەگ ب ھەڤ را، دخوازە تێگھشتنەکێ چێبکە کو ببێژە “میر تەحسین بەگ خزمەتا ترکان دکە”  پەکەکێ سازیەکا ئۆلی یا ب ناڤێ “مەجلیسا ئۆلی یا ئێزدیان” دامەزراندییە، ل سەر ناڤێ ڤێ مەجلیسێ ھەولێن ژ ھەڤ بژاندنا چڤاکا ئێزدی دمەشینە.

پەکەکە دخوازە گەلێ شنگالێ ژ لالەشێ قوت بکە

جڤاکا ئێزدی ژ بەر ھندەک مژارێن جڤاکی د ناڤا خوە دا خوەدی ناکۆکیانە. د ناڤبەرا باشیکا-شێخان و شنگالێ دا، ھندەک جوداھی ھەنە. ھەر دو ھەرێم ژ ئالیێ جوگرافی ڤە ژ ھەڤ دوورن و نفووسا ئێزدیان ل باشوورێ کوردستانێ زێدەتر ل شنگالێ یە، لێ گرانییا پەرەستگەھێن ئۆلی ل ھەرێما شێخانن. ھەروھا ژ بەر کو خەتا باشیکا-شێخان نێزیکی باژارێن کوردستانێیە، رەوشا وانا ئابۆری باشترە. ب سەر دا ژی مالباتا میری ل شێخانێ روودنە. ئەڤ رەوش ژ مێژ ڤە د ناڤا گەلێ شنگالێ دا بوویە جھێ نیقاشێ. لێ چ جاران د ناڤا ئێزدیان دا نەبوویە سەدەما دوبەندیێ. ب تایبەت ئێزدی ل ھەمبەری  میرگەھێ و پەرەستگەھا لالەشێ رێزدارن.

پشتی پەکەکە نەکاری ئێزدییا قازانج بکە، دەست ب پیلان و تەهدید و گەفان کر

پەکەکە ژ سالا 2015ێ و ڤرڤە دخوازە ھەموو ئێزدییان ل دۆرا خوە بجڤینە لێ د ڤێ پلانا خوە دا ب سەر نەکەت. دەما کو ب سەر نەکەتی، ڤێجا دخوازە ب رێیا ھندەک ناکۆکیێن جڤاکا ئێزدی وان ژ ھەڤ بژکینە و بەشەک ئێزدییان بکشینە گەل خوە. ب ڤێ ئارمانجێ دخوازە گەلێ شنگالێ ژ پەرەستگەھا لالەش دوور بخە و د ناڤا ئۆلا ئێزدییا دا ناکۆکیان گوور بکە.

پەکەکە ژ سالا 2015ێ و ڤر ڤە ب بێدەنگی ڤێ پۆلیتیکایا دابەشکرنێ دمەشینە، لێ نها فێم کر کو تەمەنێ وان یێ مایی ل شنگالێ کێم بوویە. ژ بەر کو نھا ئەورۆپا و ئەمەریکا ژ بۆ جێبەجێکرنا رێکەفتنا شنگالێ ھەولدانەکا مجد دمەشینن. ئەڤ رەوش پەکەکێ گەلەکی دترسینە.

پەکەکە دخوازە رەوشا بێسەروبەر یا ل شنگالێ بەردەوام بت، ژ بۆ کو رەوش ل شنگالێ ئاسایی نەبت و سەروەرییا خوە ژ دەست نەدت. ژ بۆ ڤێ ژی ب لەزگینی سیاسەتا پارچەکرنا ئێزدییان خست رۆژەڤێ و لیستکێن قرێژ دان دەسپێکرن. بەرەیەک ل دژی میر ھازم بەگی ئاڤا کرن ژی بەشەک ژ ڤێ لیستکێیە. میر ھازم بەگ ژ دوور ڤە ل ھەمبەر ھەموو ھێزێن کو دخوازن دەستوەردانا شنگالێ بکن رادوەستە. ناکەڤە ناڤا قادا سیاسەت و پارتییان دا. ژ بەر کو بەرێ ل ئەورووپایێ مایە، زمانی بییانی دزانە و د گەلەک سازیان دا، نەمازە ل ئەلمانیایێ، کەسەکی بباندۆرە. ھەتا نھا ل دژی پەکەکێ ھەلوەستەک  نیشان نەدایە، لێ نەکەتیە بن سەروەرییا پەکەکێ دا ژی. ل دژی سیاسەتا پەکەکێ یا پارچەکرنا ئێزدیان رادوەستە. پەکەکە ھەتا نھا نەکاریە میری بکشینە لایێ خوە، ئەو دزانە کو میر پەکەکێ ناپەژرینە. ژ بەر ڤێ یەکێ ژی دخوازە ھەری کێم باندۆرا میری د ناڤ جڤاکا ئێزدییان دا بشکینە و گەلێ ئێزدی ژ ھەجە ئانکو پەرەستگەھا لالەشا نوورانی دوور بخە.

پەکەکە تەهدید و گەفان ل میرێ ئێزدییان دکە

پەکەکە نھا سازییا ب سەر خوە ڤە “مەجلیسا ئۆلی یا ئێزدیان” ددە ئاخافتن. لێ ناڤا گەل دا ژی بنگەھێ فتنێ ئامادە دکە. پەکەکە د بن ناڤێ مەجلیسا گەل دا ل گوندان دگەرە، ل دژی میری پرۆپاگاندایان دکە و دبێژە خەلکێ شنگالێ، “میر و دەردۆرا وی هزرا وە ناکن، ژ بۆ خوە کار دکن، لەوما ئەو ناخوازن ژ کوردستانێ ڤەقەتن، میر ھازم بەگ پێیوەندی لگەل ترکیێ دا ھەنە. ترکیا دژمناتیا ئێزدیان دکە. وێ دەمێ چما میر ھازم لگەل دژمنێن ئێزدیان دا دانووستاندنان دکە و ھتد؟

پەکەکە  ل سەر جەنابێ میر ھازم بەگ زەختێ زێدە دکە کو ھندەک قەرەبوویان ژێ وەرگروە. ب راستی تەهدید و گەف ل میر ھازم بەگ دهێن کرن.

پەکەکە ب ڤان پلانان برینێن جڤاکا ئێزدی کوور دکە و دخوازە ئەو شەرێ ھەڤ بکن. ئەڤ ھەولێن پەکەکێ دێ زییانەک مەزن گهینن جڤاک و ئۆلا ئێزدیان و ھەرێما شنگالێ ژی دێ زەرەرمەند بکە.