Skip to contentئەردهەژ و کوردستان
دو ئەردهەژێن مەزن، ل سینۆرێ کوردستانێ یێ رۆژئاڤا دان، «عەفرین، عەنتاب، مەرەش، سەمسوور و مەلەتی»، ب هەزاران خانی کاڤل بوون، ب دەهـان هەزار مرۆڤ مرن و ب ملیۆنان دەربەدەر بوون، ناڤەندا ئەردهەژێ و خەتا وێ ل سەر سینۆرێ مە و ئەردنیگارییا عەرەبێن نوسه‌یری بوو.
ئەڤ ده‌ڤه‌ره، مه‌یدانا جینۆسایدێ یا دەولەتا داگیرکەرە، ئەڤ سەد سالن، دەولەت دخوازە ڤێ ده‌ڤه‌رێ ژ راستییا وێ ب دوور بخە و بکە پارچەیەک ژ وەلات و مللەتێ ترک، ژ بەر ڤێ یەکێ ئەڤ ئەردهێژێن مەزن بۆ دەولەتێ ده‌لیڤه‌یه‌ك سیاسی یە.
گوهـ نەدن گۆتن و خەمگینیێن سەختە
گوهـ نەدن گۆتن و خەمگینیێن سەختە، دەولەت دێ ڤێ کارەساتێ وەک ئامرازه‌كێ جینۆسایدێ ب کار بینە و یا ب کار تینە.
سێ رۆژێن ئەول نە دەولەت داکەته مه‌یدانا ئه‌ردهه‌ژێ و نه‌ژی رێ دا تیمێن ئالیکاریێ و رزگاریێ یێن بیانی داکەڤن، مەبەستا دەولەتێ ئەو بوو کو هەژمارا مرییان زێدە بکە، سێ رۆژێن ئەول ژ بۆ زیندی دەرخستنا مرۆڤان ژ بنێ کاڤلان رۆژێن ژیانی بوون، پشتی 3 رۆژان رەوشا ئاوارتە (ئۆهال) راگهاندن ژ بۆ كو مه‌یدانێ کۆنترۆل بکن و رێ نەدن كار یان چالاکیێن ل دژی دەولەتێ بهێن كرن، دا کو بکارن گوهەرینا دەمۆگرافیک ل گۆری دلێ خوە بکن.
پشتره ده‌وله‌ت هات و هەر رۆژ د دەهان که‌نال و تی ڤی یێن خوە ده پرۆپاگاندایا رزگارکرنا چەند مرۆڤان ژ بنێ کاڤلان کر، ئارمانجا ڤێ گاڤێ ڤه‌شارتنا مرنا دۆرێن 150 هەزار مرۆڤانه.
هەدەفا دەولەتێ ل گۆری کاراکتەرێ وێ یێ قڕكرنێ، كوشتنا ب دەهان هەزار مرۆڤان بوو و ب سەدان هەزار مرۆڤ ژی کۆچبەر ببن، مرۆڤێن مایی ژی دێ پێدڤی ب دەولەتێ بن (چێکرنا خانییێن نوو، ئالیکارییا خوارن، ڤەخوارن، پەرە…هتد).
ژ بەر ڤێ یه ئه‌و شوكر دكن و تەکبیران تینن، دەست ب چێكرنا چیرۆکێن «دل ب ئێش» کرنە، ئه‌وێ، ئێشێ دکشینن خوەدی پرانی کوردن، عەرەب، عه‌له‌وی و نوسه‌یری نه، ئەون یێن کو دەولەت دخوازە راستییا وان ژ هۆلێ راکە. د ڤان شەرت و مەرجان دە چیرۆکێن مرۆڤایه‌تی ژ بۆ ڤه‌شارتنا داگیرکەریێ یە.
گازندێن کو دەولەت ڤێرا نه‌گه‌هشت، ئۆرگانیزە نه‌بوو، بورۆکراسی سست دخەبتە، زمانێ ترکان و ترکیێ یە، بانگا کو ئارتێش چما زوو نەهات مه‌یدانێ بێمەژیتی یە، ئارتێش وەره ل مه‌یدانێ و وەزیفەیا خوە یا ئەسلی دکە: داگیرکەری.
مللەتێ مە وەک هەر جار ب گیانەکی پشتگریێ ل مه‌یدانێ بەلاڤ بوویە، ب سەدان جوانێن مە ب لەزگینی داکەتنە مه‌یدانا ئەردهەژێ و ب فەداکاری خەبتین و دخەبتن، ئەڤ و یەکگیانییا هەر چار پارچەیێن کوردستانێ د ڤان رۆژێن گران دە جهێ بەختەوه‌ری و هێڤیێ یە.
تونەبوونا دەزگەهێن نەتەوەیی ژ هەر دەمێ پێتر خوە نیشان دا و ددە، پێویستییا یەکیتیا نەتەوەیی و شۆرەشگەری هین بەر ب چاڤ بوویە.
دیسا هات فاهمکرن کو ئاڤاکرنا رێخستنا شۆرەشگەری کارێ مەیێ هەری لەزگینە.
ژ بەر ڤان کێمانییان ل مه‌یدانا ئەردهەژێ چالاکییێن دژی داگیرکەریێ پێک نەهاتن، بەرۆڤاژی وێ بانگ ل دەولەتێ هات کرن کو زوو وەرن.
ل کوردستانێ ئارامی ب ڤێ دەولەتێ نایێ، بەرۆڤاژی دێ ب قەشتاندنا ڤێ دەولەتێ ژ سەر ئاخا مە دێ بێ.
مخابن مە نەکاری کو ئەم ڤێ درووشمێ ل مه‌یدانێ بلند بکن.
ئەڤ ژی جهێ شەرمێ و هەتا جهێ روورەشییێ یە ژ بۆ مە.
