ئیرۆ 11مین سالڤەگەرا کوشتنا نەسرەدین برھک یەک ژ رێڤەبەرێن پایەبلندێن پەدەکە-سێ یە. برھک بەریا 11 سالان د ئەنجاما گولـلەبارانا ل سەر رێیا قامشلۆ دا ب گرانی بریندار بوو.

برھک د ناڤا ترومبێلا دا بوو دەما د 13ێ سباتا سالا 2012ێ دا تەقە لێ هاتیە کرن و ئەو ب گرانی تێ دا بریندار بووی، دەستپێکێ ئەو بر نەخوەشخانەیا قامشلۆ و پشترا ژی بر حەلەبێ، لێ برھک د 22ێ سباتا سالا 2012ێ ئانکو پشتی 9 رۆژان ژ برینداربوونێ وەفات کر.

برھک سیاسەتمەدارەک بوو کو ھەم ژ ئالیێ پەیەدێ و ھەم ژی ژ ئالیێ رەژیما ئەسەد ڤە بەردەوام دھاتە تەھدیدکرن. هەتا نها چ کەسەک ژ بەر کوشتنا وی نەهاتیە بنچاڤکرن و گرتن. ئەو ژی مینا مەشعەل تەمۆ و بەھزاد تورسون دژمنێ هەڤبەشێ پەیەدێ و رەژیما ئەساد بوو، و وەک ھەڤالێن خوە یێن دن ژی بوو قوربانیێ کوشتنەکا سیاسی. پشتی سالا 2011ێ کو ل رۆژئاڤا و سووریەیێ پێڤاژۆیا سیاسی دەست پێ کری، گەلەک سیاسەتمەدار ھاتن تەسفیەکرن و ب ڤێ یەکێ ھاتە خواستن کو کوردێن رۆژئاڤا خەتێن خوەیێن سیاسی و سەربخوە ئاڤا نەکن. ھوون دکارن ل سەر ڤێ مژارێ ل دۆسیایا مەیا بەرێ ئامادەکری بنێرن: https://darkamazi.net/archives/1035533

نەسرەدین برھک کییە؟

نەسرەدین برهک د سالا 1960ێ دا ل گوندێ «کەڤرێ دەنا» یێ گرێدایی باژارۆکێ چلاخا یێ دێرکێ ژ دایک بوویە. ئامادەییا ئەلەکتریکێ ب دوماهی ئانیە. د تەمەنەکی پڕ بچووک دا تەڤلی کەڤنەشۆپیا سیاسی یا بارزانی بوو. دەستپێکێ بوو ئەندامێ پارتیا سووریەیا دەمۆکراتیک، ئەل-پارتی و د سالا 1998ێ دا بوو ئەندامێ سەرکردایەتیا ڤێ پارتیێ.

ھەتا رۆژا کو ھاتیە کوشتن ژ ئالیێ رەژیما سووریێ ڤە گەلەک جاران راستی گەفان ھات و د سالا 2004ێ دا دەمەکێ د زندانێ دا ما. د سالا 2009ێ دا دیسا ھات گرتن. د سالا 2011ێ دا ژ بۆ پێشەنگیا تەڤگەرا گەل یا رۆژئاڤا دەست ب خەباتەکا مەزن کر. ئەو ژ ئالیێ ھێزێن ھەرێمی یێن پەیەدێ ڤە ھات تەھدیدکرن. پەکەکێ گەلەک جاران ب رێیا ئاغایێن ھەرێمێ گەف ل وی کرن کو ئەو خوە ژ سیاسەتێ ڤەکشە.

پەیەدە یەکەم ئالی بوو کو ھەم ژ ئالیێ مالباتا وی و ھەم ژی ژ ئالیێ پارتیا وی ڤە ب گولـلەبارانکرنا برھک ھاتیە تاوانبار کرن. ژ ئالیێ دن ڤە پەیەدێ ھەتا نھا دەربارێ مژارێ دا چ داخویانی نەدانە.

نەسرەدین برھک کو د 22یێ سباتا 2012ێ دە ھات تەرۆرکرن، ب ناڤێ ئەبوو عەلا ئانکو بابێ عەلا دھات ناسکرن. بابێ عەلا ل گوندێ خوە “کەڤرێ دەنا” ب مەراسیمەکا مەزن ھات ب ئاخێ سپارتن.

پارتیا دەمۆکراتا کوردستان-سووریێ (پەدەکە-س)ێ ئیسال نەسرەدین برھک ب مەراسیمەکێ ب بیر ئانی.