ل رۆژا 28 سباتا 2023، هەڤسەرۆکا کۆنسەیا رێڤەبەرا کەجەکێ به‌سێ هۆزات به‌شداری به‌رنامه‌یا تایبه‌ت یا «مه‌دیا هه‌به‌ر تی ڤی» یا په‌كه‌كێ بوو، بەسێ هۆزات د ڤێ بەرنامەیێ دە نرخاندن ل دۆر «تەجریدا ل سەر عەڤدللا ئۆجالان»، ئەردھەژ، بوویەرێن پشتی ئەردھەژێ و رۆژەڤا ھلبژارتنێ کر.
بەسێ د نرخاندنێن خوە دە دیسا کەرب و کینا خوە یا ل همبەر پەدەکێ و کەڤنەشۆپیا بارزانی دیار کر و جارەکە دن ب ئاخافتنێن وەکە خوە گەنی هەژمارەک دەرەو دەربارا باشوورێ کوردستانێ و پەدەکێ رێز کرن.
د نرخاندنێن خوە دە هۆزات راگهاند کو دەولەت، رەژیما ئاکەپێ-مەھەپێ خوەدی وێ پلانێیە کو هەرێمێن ئەردهەژ لێ چێبووی ھەموویان ژ کوردان، ژ عەلەویان خالی بکە، ب ڤی رەنگی خوەدی پلانەکا قرکرنێ نە و گۆت، “ژ بۆ پووچکرنا ڤێ یەکێ ژی دڤێ تەقەز خاکا خوە نەتەرکینن، خاکا خوە، جھ و وارێ خوە، مال و ملکێ خوە نەفرۆشن دەولەتێ. ئەگەر ئەڤ پشتەڤانی و پشتگری دەوام بکە ئەمێ کاربن گوندێن خوە، باژارۆکێن خوە ب خورتی ئاڤا بکن. ب پشتەڤانیێ، ب روحەکا ھەڤپار، ب مەعنەویاتێن ھەڤپار و ب پشتگریا مادی ئەمێ کاربن ڤان دەران بکن قادا ژیانێ.” ئەڤ ئاخافتنێن بەسێ د دەمەکی دە نە کو ب سەدەما سیاسەتا شاش و شەرێ سەختە یێ پارتیا بەسێ هەژمارەک هەری زێدە ژ گوند و باژارێن باشوور و باکورێ کوردستانێ ژ خەلکێ هاتنە ڤالاکرن و خەلک کۆچبەری باژارێن مەزن بوونە و نها ژ ئالیەکی ترک و ژ ئالیەکی دن پەکەکە ل گوندێن وان دمینن.
مرۆڤ حەیری دمینە، بەسێ ژ ئالیەکی دبێژە، دڤێ گەلێ مە تەقەز خاکا خوە نەتەرکینن، خاکا خوە، جھ و وارێ خوە، مال و ملکێ خوە نەفرۆشن دەولەتێ، لێ ژ ئالیەکێ دن بەسێ و پارتیا وێ یێن بووی سەدەم ب هەزاران کەس ژ گەلێ کورد ئەردێن خوە، مال و ملکن خوە ب جی بهێلن و هەرن جهێن ئەولە هەیا کو نەبن قوربانیێن شەرێ سەختە یێ د نێڤبەرا دەولەتا داگیرکەرا ترکیێ و پارتیا کرێ گرتیا دەولەتێ ئانکو پەکەکێ، گەر بەسێ راست دبێژە و ناخوازە گەل مال و ملکێن خوە بتەرکینن ژ کەرەما خوە بلا ئەو جیهێن نها پارتیا وێ وەکە جیهێن لەشکری بناڤ کرین و شەرەکی سەختە تێدە دمەشینە ڤالا بکە، دا کو شێنیێن وان گوندان ڤەگەرن سەر مال و مولکێن خوە، ئەو مال و مولکێن ئەڤ نیزی 40 سالانە پەکەکێ دەست ب سەردا گرتی و ناهێلە کەسەکی سڤیل دەرباسی وان هەرێمان ببە.
تشتا هەری بالکێش د ئاخافتنێن بەسێ دە ئەڤ بوو کو دبێژە، “ب پشتگری و ھەڤگرتنا گەلێ مە ھەتا نھا ل ھوندر و دەرڤەیی وەلات ئالیکاری و پشتگرییەکا مەزن دەرکەتیە ھۆلێ. گەر کو ئەم ڤێ کۆمبوونێ بگھینن ھەڤ، گەر ئەڤ پشتگری و ھەڤگرتن بەردەوام بکە، ئەم دکارن گوندێن خوە ژ نوو ڤە ئاڤا بکن.” بەلێ چ کەس نکارە ئینکار بکە کو ئالیکاری ژ بووی زەرەرمەندێن ئەردهەژی ژ هەر چار پەرچەیێن کوردستانێ و ل دەرڤەی ولات ژی هاتنە کومکرن، لێ بەلێ، هەر کەس ڤێ یەکێ ژی دزانە کو ئەڤ ئالیکاری نە ئەو قاس مەزنن کو گەلێ مە بکارە جارەکە دن گوند و باژارێن خوە پێ ئاڤا بکە، گەر بەسێ و پارتیا وێ راست دبێژن و دخوازن گەل گوند و باژارێن خوە ئاڤا بکە، بلا ژ وی پارەیێ کو وەکە باج ژ خەلکێ هەژار یێن ناڤچەیێن سینۆری دستینن، ژ پەرەیێ کو ب دارێ زۆرێ ژ گەلێ مە یێ ل ئەورۆپایێ دژی دستینە، ژ وی پارەیێ کو ب دارێ زۆرێ ژ کارساز و کارکەرێن کورد دستینە بدە زەرەرمەندێن ئەردهەژێ، بێ گومان ب وی پارە نە ب تەنێ گوند و باژارێن ژ بەر ئەردهەژێ خەراب بوویی دێ هێن ئاڤاکرن، بەلکو د شیان دا یە باژار و گوندێن هەری باشتر ژی ئاڤا بکن، ب ئالیکاریێن هاتی کۆمکرن چ گوند و باژار ئاڤا نابن.
تەڤی کو حەرامە و گەلێ مە یێ کورد ڤێ یەکێ قەبوول ناکە ژی، لێ بەلێ گەر بەسێ راست دبێژە، بلا ژ کەرەما خوە ب تەنێ 10% یا وی پارەیێ پارتیا وێ ژ بازرگانیا مادەیێن هشبەر ب دەست دخە ب مەخدوورێن ئەردهەژێ بدە، بێی گومان ب ڤی پەرە وێ تەڤ گەلێ مە بکارە ل گوند و باژارێن خوە نە ب تەنێ ئاڤاهیێن دو قاتی بەلکو ئاڤاهیێن 20 قاتی ژی ئاڤا بکە.
ل داویێ بەسێ یا گەنی دیسا کەرب و کینا خوە یا ل همبەر پەدەکێ نە ڤەشارت و پر ب روو قاییمی هەر وەک گەلێ کورد ب چاڤێن خوە ل سەر ئەکرانێن تەڤ تەلەفزیۆن و سۆسیال مەدیایێ نەدیتبە ژ باشوور چ قاس ئالیکاری هاتن کۆمکرن و پەدەکە ژی چ قاس ئالیکاربوویە ژ بۆی کۆمکرن و شاندنا ڤان ئالیکاریان، گۆت، “پەدەکێ گەلێ مەیێ ل باشوورێ کوردستانێ ئاستەنگ کر، دەولەتا ترک پێشی ل وان گرت”، بەلێ، ئەڤ ئاخافتن ب تەنێ بەسە کو مرۆڤ بەسێ یا دەرەوین ناس بکە، ژ بەر کو هەر کەس شاهدە ل سەر ڤێ یەکێ کو باشوورێ کوردستانێ نە ب تەنێ ئالیکاریا باکور بەلکو ئالیکاریا رۆژئاڤا ژی کر و نها ژی بەردەوامە ل سەر ئالیکاریان، هەرێما کوردستانێ یەکەم ئالی بوو کو ئالیکاری گهاندی باکور و رۆژئاڤا کوردستانێ، ڤیدیۆیێن د مەدیایێ دە هاتین پارڤە کرن بەلگەیێن حاشاهەلنەگرن ل سەر ڤێ یەکێ، بەسێ یا گەنی نکارە ب دەرەوان روویێ رەشێ خوە و پارتیا خوە سپی بکە.
