پشتی کو سەرۆکا IYI پارتییێ مەرال ئاکشەنەر دەست ژ میزەیێ 6 قۆلی بەردای و دیسا لێ ڤەگەرییای، سەرۆکێ جەهەپێ کەمال کلچدارۆغلو ژ ئالی مێزەیێ 6 قۆلی ڤە وەک کاندیدێ سەرۆککۆمارییێ ھات دەستنیشانکرن و قەیرانا ل سەر سەرۆککۆمارییێ ب داوی بوو. مەرال ئاکشەنەر ب تەرککرنا میزەیا 6 قۆلی خوە و پارتییا خوە خستبوو مەترسیێ و ئەگەرا کو د ھلبژارتنێ دا پارتییا وێ د بنێ باراژێ «پلەیا ژ سەدێ کو ئەگەر پارتیەک ژ وێ رێژەیا هاتیە دەستنیشانکرن کێمتر دەنگان وەرگرە ھنگێ نکارە بکەڤە پارلەمانێ» را بمینە و نەکەڤە پارلامەنتۆیێ ھەبوو. ئەڤێ یەکێ و ھنەک سەدەمێن دن ھشت کو مەرال ئاکشەنەر تفا خوە داعویرە و دیسا ڤەگەرە مێزەیا 6 قۆلی. ژ خوە د مەراسیما پێشکێشکرنا کاندیدێ سەرۆککۆمارییێ ژ وێنەیێ وێ خویابوو کو گەلەک تشت نە ب دلێ وێ نە و روویێ وێ ترش و شەرمۆکە بوو.
پشتی کو کلچدارۆغلو وەک کاندیدێ سەرۆککۆمارییێ ھات دەستنیشانکرن، ئیجار دێ پێڤاژۆیا ھەڤدیتنێن دگەل پارتییێن دن دا هێت دەستپێکرن و ژ وان پارتییان یا ھەری گرینگ ژی بێگومان ھەدەپەیە. ھەر چقاسی گەلەک ژ رێڤەبر و سەرکێشێن ھەدەپێ نە کورد بن و سیاسەتەکا ترکایەتی و ترکییەبوونێ دکن ژی، سەدی نۆتێ بنگەھا وێ کوردە و ب دەنگ و رایێن کوردان د پارلامەنتۆیێ دایە. ژ بەر ڤێ، ھەدەپە وەک پارتییەک کورد دهێت قەبوولکرن یان ددن قەبوولکرن و قەدەرا ھلبژارتنان ژی د دەستێ وێ و دەنگ و رایێن کوردان دایە. دهێت تەخمینکرن کو کاندیدێ سەرۆککۆمارییێ کەمال کلچدارۆغلو و ئەرکانێن خوە سەردانا ھەدەپێ بکن و ل سەر ھلبژارتنا سەرۆککۆمار بپەیڤن. ژ خوە ھەر دو ھەڤسەرۆکێن ھەدەپێ میتحەد سانجار و پەرڤین بولدان بانگا سەردانێ ل کلچدارۆغلو کربوون و ھەڤسەرۆکێ کەڤن سەلاحەدین دەمیرتاش ژی ژ گرتیخانێ ھەمان بانگ کربوو.
ل گۆر تێ گۆتن، ھندەک ژ ئەرکان و رێڤەبرێن جەهەپی گۆتنە کو د سەردان و ھەڤدیتنا لگەل ھەدەپێ دا ئەو چ بازاران ناکن و تەنێ ل سەر ڤەکرنا رێیێن سیاسەتا دەمۆکراتیک دێ ئاخڤن. ژ خوە ھەڤسەرۆکێ ھەدەپێ میتحەد سانجار ژی گۆتبوو کو ئارمانجا وان نە داخوازێن مەزنن، ئەو دخوازن ل سەر دەمۆکراسی و دەمۆکراتیزەکرنا ترکیێ باخڤن. ھەڤسەرۆکا ھەدەپێ پەرڤین بولدان ژی د ئاخاڤتنا خوە دا ئانی زمان کو ئەو دێ ل گۆر نیقاش و ئەنجاما نیقاشان کاندیدێ خوەیێ سەرۆککۆمارییێ دەستنیشان بکن. ل ڤر ھەگەر کلچدارۆغلو و ھەدەپە ل سەر خالێن ھەڤبەش ل ھەڤ بکن، دێ ھەدەپە کاندیدێ سەرۆککۆمارییێ دەرنەخە و پشتگرییا کلچدارۆغلو و مێزەیا 6 قۆلی بکە. ئەڤ تێ واتەیا کو د ھلبژارتنا یەکەم دا مەسەلا سەرۆککۆمارییێ سافی ببە و ئیحتیمالەک مەزن کلچدارۆغلو ببە سەرۆککۆمارێ 13ەمینێ ترکیێ. نا ھەکە ل ھەڤ نەکن، دێ ھەدەپە سەربخوە کاندیدێ خوە دەرێخە و دێ سەرۆککۆمار د ھلبژارتنا دویەم دا ئاشکەرا ببە. ئەڤ یەک ژی ژ بۆ میزەیا 6 قۆلی و کلچدارۆغلو مەترسییە و دێ رێ ژ بۆ سەرکەتنا ئاکەپێ و ئەردۆگان ڤەکە.
ھەدەپە و رێڤەبرێن وێ ژ رۆژا رۆژ دا چ تشتەکی بەربچاڤ ژ بۆ کوردان نەخواستیە و ناخوازن. سیاسەت و ئارمانجا وێ تەنێ ئەڤە کو کوردان ب ترکیێ ڤە پینە بکن و وان ژ ھەستێن نەتەوی، ژ داخوازێن نەتەوی دوور بخن. ژ رۆژا کو کەتنە پارلامەنتۆیێ و ھەتا ئیرۆ، داخوازنامە یان پێشنیازەک ب تەنێ ژی ژ بۆ فەرمییەتا زمانێ کوردی و پەروەردەیا ب زمانێ کوردی نەدانە مەجلیسێ. ژ بۆ ھەر کاری کۆمسیۆن چێکرنە لێ ژ بۆ زمانێ کوردی چێنەکرنە. سەدەما ھەری مەزن یا ئاسیمیلاسیۆنێ و ئاسیمیلەکرنا«بشافتنا» کوردان یەک ژێ ئەڤە. ترکییە، ترکییەیی بوونە، سیاسەتا لگەل ترکیێ و بەرژەوەندییێن دەولەتا ترکە. یانی، ھەدەپێ ھەتا ئیرۆ ب وێرەکی ژ بۆ کوردان تشتەک نەخوەستیە. ھەر جارێ د بن سیاسەتا دەمۆکراسی و دەمۆکراتیزەکرنا ترکیێ دا داخوازێن کوردان بنجل کرینە و ئیرۆ ژی دکە.
وەک مە ل ژۆر ژی گۆت، سەرێ بەندکی د دەستێ ھەدەپێ و دەنگ و رایێن کوردان دایە. چ تفاقا ئەردۆگان بە، چ تفاقا کلچدارۆغلو بە، ھەردو ئالی ژی موحتاجی دەنگ و رایێن کوردانە. ئانگۆ، موحتاجی ھەدەپێ نە. دڤێت ئەندام و ئالیگرێن ھەدەپێ، کەدکار و فەداکارێن ھەدەپێ ئێدی بێدەنگ نەمینن و ب وێرەکی دۆزێ ل ھەدەپێ و رێڤەبرێن وێ بکن کو د ھەڤدیتن و مزاکەرەیان دا ب وێرەکی داخوازان بکن، ب وێرەکی گاڤان باڤێژین و ژ بۆ کوردان ھندەک خواستەکان بدەستخن. ب کێماسی و یا ھەری گرینگ، فەرمییەتی و پەروەردەیا ب زمانێ کوردی دڤێت یەک ژ وان داخوازێن سەرەکە و بنگەھین بە.
رۆژەڤاکورد
