ل ترکیێ و باکورێ کوردستانێ رۆژەڤ ھلبژارتنێن سەرۆککۆماریا ترکیێ و پارلەمەنتۆیا ترکیێیە. ھەر ئالیەک سیاسی خوە ل گۆرا ڤێ یەکێ ئامادە دکە، ب ھەزاران کەس ژ بۆ بکەڤن پارلەمەنتۆیێ دا، د ناڤا ھەولدانا دا نە.
ئەڤ ھلبژارتن ژ بۆ کوردا چقاس گرینگە و دێ ژ بۆ کوردا چ بێ گوھەرتن، باشتر دبە یان خرابتر دبە، نە زەلالە. ژ بەر کو د بەرنامەیا چ ئالیەکی دا ژ بۆ کوردا تشتەکی زەلال تونەیە.
دەستھلات ھەولددە دەستھلاتا خوە ب ئاوایەکی بپارێزە و ئۆپۆزسیۆنا ھەیی ژی، ھەولددە ببە دەستھلات. رۆژانە راپرسین تێنە ئەنجامدان و ل گۆرا وێ ژی ھەولددن تێبگھن کا رەوش د بەرژەوەندیا کیژان ئالیەکی دایە.
ژ بۆ کوردا تشتەک تونەیە. دەما مرۆڤ د پەنجەرەیا کوردان دا رەوشا ھەیی دنرخینە، رەوشا کوردا نە باشە و ئالیێن سیاسی کو ئیدیعا دکن ب ناڤێ کوردا تەڤدگەرن نە خوەدیێ ھەلوەستەک ب ئیستیقرارن. مخابن ئەڤینیا کەتنا پارلەمەنتۆیێ سیبەرا خوە بەردایە سەر ھەر تشتەکی و ئەڤ یەک ژی دبە سەدەما بێ ھەلوەستیێ.
گەلەک ئەشکەرەیە کو، قەندیل و جەهەپێ ل ھەڤکریە و دێ د سەرۆککۆماریێ دا ھەدەپە پشتگریا کەمال کلچدارۆغلو بکە. چ پەیمانەک ئەشکەرە د ناڤبەرا جەهەپێ و ھەدەپێ دا دیار نیە. ژ خوە د ڤان ھلبژارتنان دا ھەدەپە تەنێ بێ دەنگ فەرمانا قەندیل ب جھ تینە. قەندیل پشتگریا خوە ژ بەری بەرپرسێن ھەدەپێ گاڤەکی باڤێژن ژ بۆ کلچدارۆغلو دان خویاکرن. د ناڤبەرا قەندیل و هەڤپەیمانیا ملەت دە پەیمانەک نھێنی چێبوویە. گەلۆ قەندیل چ ژ هەڤپەیمانیا ملەت خواستیە نایێ زانین. لێ ئەڤ پرس تێ کرن و موخاتابێ ڤێ پرسێ ژی تونەیە.
ھندەک پارتیێن ب ناڤێ کوردا تەڤدگەرن و چ بنگەھەک وان تونەیە ل بەر دەریێ ھەدەپێ نۆبەتێ دگرن ژ بۆ ھەدەپە جھێ پارلەمەنتەرەکی بدە وان. لێ دخویە لیستا ھەدەپێ وەک ھەر جاری ژ قەندیل تێ دەستنیشان کرن و دێ پرانی چەپێن ترکان بن ژی.
گەلەک جارا ھاتیە گۆتن : ژ بۆ چ ب دەنگێ کوردا چەپێن ترک دبن پارلەمەنتەر؟ ئارمانج ژ ڤێ یەکێ چیە؟ بەرسڤا ڤان پرسا ئاسان و ڤەکریە، لێیا گرینگ ئەوە کو ئەوێن دەنگێ خوە ددن ھەدەپێ یان ژی پارتیا قەندیل دەستنیشان دکە بکاربن بەرسڤا ڤان پرسان بدن.
نھا قەندیل وەک ب ناڤێ پارتیا چەپا کەسک دکەڤە ھلبژارتنا. ناڤێ پارتیێن قەندیل چبە رەوش وەک ھەڤە. ناڤێ پارتیێن قەندیل، ھەدەپە بە، پارتیا چەپا کەسک بە چ واتەیا وێ تونەیە.
ژ ئالیەک دن ڤە مخابن کوردا نەکاری پلاتفۆرمەک نەتەوی کوردستانی ئاڤا بکن. ئەگەر د ڤان ھلبژارتنا دا پالاتفۆرمەک نەتەوی کوردستانی بھاتا ئاڤاکرن، دا بکاربوونا دەما پرۆپاگاندەیێ دا کێماسی راستیا پرسگرێکا کورد ل باکورێ کوردستانێ بدن خویاکرن. چەند کێم با ژی لێ دا بکاربن رێ ل بەر ئیستسمارکرنا کوردا ب ناڤێ کوردایاتیێ بگرن.
وەک گەلەک جارا ھاتی گۆتن، ئەم جارەک دن دوبارە سێبارە دکن کو پیڤان دەستخستنا مافێن نەتەوییێن رەوا یێن ملەتێ کوردە. دەما ئەڤ پیڤان ڤەکری ژ ئالیێ پارتیێن کوردان ڤە بێکو حەسابێن بەسیت بکن بنگەھ بێ گرتن، کورد دکارن گەلەک تشتا بکن، دەنگێ راستیا کوردا بگەهینن و رۆژ ب رۆژ بەر ب رەوشەک باشتر ڤە بچن.
رۆژەڤاکورد
