بووبێ ئەسەر
د ڤێ ھلبژارتنا کو دێ د 14 گولانا 2023 ل ترکیێ و ل باکورێ کوردستانێ هێت ئەنجامدان، ژ بۆنا کوردان زەلالیەک باش، ھەلوەستێن نەتەوەیی و بریارێن د بەرژەوەندیا گەلێ کورد دا پر ب زەلالی ھاتن ئاڤێتن و ئەشکەرە کرن.
ژ بەر کو ل باکورێ کوردستانێ و د ناڤا پارتیێن کوردان دە، چاندا ب ھەڤرە کارکرن و یەکیتیێ تونەیە. لۆما چ دەما تێنە با ھەڤ، ب سالان ل سەر رێزک و بێژەین ڤالا دکەڤن قرکا ھەڤ. تالیا تالی ژی ئەو خەباتا ب سالان بێ ئەنجام دمینە و ھەرکەس ل مالا خوە ڤەدگەرن.
دەمەک تێ دیسا پێویستیا کو پارتی و رێخستنێن کوردان ب ھەڤرە کار بکن، دەردکەڤە ھۆلێ و وەکە چ تشت نەبوو بە، ئەڤ پارتی و رێخستنێن مە ژ نووڤە ل ھەڤ دجڤن. دیسا وەکە بەرێ ل سەر بێژەیێن ڤالا ب ھەڤرە دکەڤن گەنگەشیان و دیسا ھەرکەس ل حالێ خوە یێ بەرێ ڤەدگەرن. ئەڤ رەوشە ژ سالا 1979 و ھەتا نھا ھەر بەردەوامە.
ل گۆر باوەریا من ڤێ ھلبژارتنێ دەرسەکە باش دا کوردێن باکورێ کوردستانێ دا کو بکاربن بێنە سەر ھەشێ وان. لەورا ھاتە دیتن کو دێ ئەڤ ھلبژارتن ببە سەدەم ئێدی د ناڤا کوردان دە چاندا ب ھەڤرە کارکرن و دامەزراندنا ئەنیەکە نەتەوەیی.
ئەڤ ھلبژارتنە ئەزموونەکا باش بوو. د ڤێ ئەزموونێ دە کی\ێ چقاس ب سەرکەتن ھاتە دیتن. ئەڤ ئەزموونەکە وەھا بوو کو کوردێن نەتەوەپارێز بەرسڤا پرسێن ڤێ وەکە ھەڤدو دان و ب ھەڤرە ب سەرکەتن و دێ ھێژ ژی د گەلەک ئەزموونێن وەھا دە ب سەر ژی بکەڤن.
ژ بۆنا مرۆڤ ب ھەڤرە کار بکە و ئەنیەکە نەتەوەیی دامەزرینە پێویستیا کو مرۆڤ ب سالان ھەڤدیتنان بکە تونەیە. د دەستپێکێ دە مرۆڤ ل گۆر چەند خالێن کو بەرژەوەندیا گەلێ مرۆڤ تێ دە ھەبە ل ھەڤ دکە و مەسەلە ژ ڤر دە وێ دەستپێ ببە.
د ناڤ کار و خەباتێ دە ھم مرۆڤ فێری ھەڤدو و خەباتا ھەڤبەش دبە، ھم ھەڤدو باشتر ناس دکە و ھم ژی گرانیا کێ چقاسە تێ زانین، فێر دبن.
ھەتا کو مرۆڤ ب ھەڤرە کار نەکە، مرۆڤ ھەر تم ژ ھەڤ ب شکە. ھەتا کو تفاقا مرۆڤ خورت نەبە، کار و خەباتێن گەل ژی دێ پێشنەکەڤە. پێشکەتن ب سایا ھەڤکاری و ب ھەڤرە کارکرنێ دبە. ماف ب دەستخستن ب ھێز و یەک دەنگیێ پێک تێ.
نھا کێفخوەشم کو پاک و تەڤگەرێ ژی د ڤێ ھلبژارتنێ دە و ب کارانینا دەنگێ خوە و یێن ھەڤالبەندێن خوە، دێ ل گەل ھاک-پارێ بن. ھەتا کو مرۆڤ گاڤێن بچووک ژ بۆنا ھەڤکاریێن مەزن ناڤێژن مرۆڤ نکارە یەکیتیێن خورت و قەویم دامەزرینە.
دڤێت ئەم ڤێ ژی ژ بیر نەکن کو ھەگەر نە ژ کار و خەباتێن ھاک-پارێ بانا و ئەو نە خوەدی ڤێ ھەلوەستێبا دبوو کو ئیرۆ ئەڤ ھەڤکاریا دەلال پێک نەھاتبا. سپاس ژ بۆنا ڤێ ھەلوەستا ھاک-پارێیا نەتەوەیی کو بناغەیا یەکتیێ دانا…
ئەز وەھا باوەرم کو پشتی ھلبژارتنان دێ گاڤا یەکەم یا ژ بۆنا یەکیتیەکە نەتەوەیی یا کو ژ ھێز و پارتیێن کوردستانی پێک تێ، بێنە ئاڤێتن. ب ھێڤی مە کو د سالا 2026 دە کو سەد سالا لۆزانێیە، کوردێن مەیێن باکورێ کوردستانی ژی ببن خوەدیێ ئەنیەکە نەتەوەیی.
ئەڤ ئەنیا نەتەوەیی دێ گاڤ ب گاڤ، رۆژ ب رۆژ خەتا نەتەوەیی خورت بکە، مێژوو (دیرۆک) و زمانێ کوردی ل وان ڤەگەرینە. ھێڤی و باوەریەکە خورت بخولقینە کو روحیەتا کوردەوارییا تەکۆشەر گەش ببە.
ب ڤێ وەسیلەیێ سپاسی پاک و تەڤگەرێ دکم کو ئەو و ھەڤالبەندێن خوە، ژ ھاک-پارێ رە ببن پشتگر، ئەو دەنگێن کو دێ بێنە ب کارئانین دێ ببە دەنگ و رەنگێن کوردێن ژ وەلاتێ خوە حەز دکن.
د ڤێ ھلبژارتنێ دە گاڤا یەکەم یا ب ھەڤرە و ب پشتگریا ھەڤدو رە رابوونێ ھاتە ئاڤێتن. ب ھێڤیا کو ئەڤ گاڤ نە تەنێ ژ بۆنا ھلبژارتنان بە. پشتی وێ ژی کار و خەباتێن ب لەزگین ببە دا کو داخوازا گەل یا دامەزراندنا ئەنیەکە نەتەوەیی پێک بێ.
